ନୂଆଦିଲ୍ଲୀ,୧୯ ।୭: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚଳିତ ବର୍ଷର ମୌସୁମୀ ଅଧିବେଶନରେ ଯୋଗ ଦେବାକୁ ସୋମବାର ସଂସଦରେ ପହଞ୍ଚିଥିଲେ । ଏହି ସମୟରେ ସେ ଖବରଦାତାଙ୍କ ସହ ଏକ ସଂକ୍ଷିପ୍ତ ସାକ୍ଷାତ୍କାର ଦେଇଥିଲେ । ମୋଦି ପ୍ରଥମେ କରୋନା ଭାଇରସକୁ ନେଇ କିଛି କହିବାକୁ ଚାହିଁଥିଲେ । ସେ କହିଥିଲେ କରୋନ ଏବେ ସାରା ବିଶ୍ୱକୁ ତା’କବଳକୁ ନେଇ ସାରିଛି । ହେଲେ ଦେଶରେ ଟିକାକରଣ ଯୋଗୁ ଆମେ ଅନେକ ଜୀବନ ବଞ୍ଚାଇବାରେ ବୋଧହୁଏ ସକ୍ଷମ ହୋଇଛୁ । ପ୍ରାୟତଃ ସମସ୍ତେ କରୋନା ଟିକାର ଗୋଟିଏ ଡୋଜ ନେଇ ସାରିଥିବେ । ଏହାପରେ ବି ଆମକୁ କରୋନା କଟାକଣା ମାନି ଚଳିବାକୁ ପଡିବ । ଏହି ସମୟରେ ମୋଦି କହିଥିଲେ ଟିକା ବାହୁରେ ନିଆଯାଉଛି । ଆଉ ଯିଏ ଏହାକୁ ନେଉଛି ସେ ‘ବାହୁବଳୀ’ ପାଲଟି ଯାଉଛି । କୋଭିଡ ଯୁଦ୍ଧରେ ଲଢୁଥିବା ଲୋକଙ୍କ ମଧ୍ୟରୁ ୪୦ କୋଟିରୁ ଅଧିକ ଲୋକ ଏବେ ବାହୁବଳୀ ପାଲଟି ଯାଇଛନ୍ତି । ତେଣୁ ଟିକାକରଣକୁ ଆହୁରି ଆଗକୁ ବଢାଇବାକୁ ଲକ୍ଷ୍ୟ ରଖାଯାଇଛି । ସେଥିପାଇଁ ଆମେ ଚାହୁଁଛୁ ଏହାକୁ ନେଇ ଗୃହରେ ଆଲୋଚନା ହେଉ ।
