ଦାହୋଡ୍ (ଗୁଜରାଟ),୧୧।୫: କଂଗ୍ରେସ ନେତା ରାହୁଲ ଗାନ୍ଧୀ ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି। ମୋଦି ଦୁଇଟି ଭାରତ ସୃଷ୍ଟି କରିଛନ୍ତି, ଗୋଟିଏ ଧନୀଙ୍କ ପାଇଁ ଓ ଅନ୍ୟଟି ଗରିବଙ୍କ ପାଇଁ। ଦେଶର ସମ୍ବଳକୁ କେନ୍ଦ୍ରର ଭାଜପା ନେତୃତ୍ୱାଧୀନ ସରକାର ଅଳ୍ପ କେତେଜଣ ଧନୀ ଲୋକଙ୍କ ହାତରେ ଟେକି ଦେଇଥିବା ରାହୁଲ ଅଭିଯୋଗ କରିଛନ୍ତି। ଚଳିତ ବର୍ଷ ଶେଷ ଭାଗରେ ଗୁଜରାଟ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଥିବାବେଳେ ରାହୁଲ ମଙ୍ଗଳବାର ଆଦିବାସୀ ବହୁଳ ଦାହୋଡ ଜିଲାରେ ଦଳର ପ୍ରଚାର ଅଭିଯାନ ଆରମ୍ଭ କରିଛନ୍ତି। ସେଠାରେ ‘ଆଦିବାସୀ ସତ୍ୟାଗ୍ରହ ରାଲି’କୁ ଉଦ୍ବୋଧନ ଦେଇ ରାହୁଲ କହିଥିଲେ, ଏଥର ଗୁଜରାଟରେ କଂଗ୍ରେସ ନିଶ୍ଚୟ କ୍ଷମତାକୁ ଆସିବ। ୨୦୧୪ରେ ମୋଦି ପ୍ରଧାନମନ୍ତ୍ରୀ ହେବା ପୂର୍ବରୁ ଗୁଜରାଟ ମୁଖ୍ୟମନ୍ତ୍ରୀ ଥିଲେ। ସେ ଗୁଜରାଟ ମଡେଲ ନାମରେ ଉକ୍ତ ରାଜ୍ୟର କାର୍ଯ୍ୟଶୈଳୀକୁ ଦେଶରେ ପ୍ରୟୋଗ କରୁଛନ୍ତି। ଫଳରେ ଆଜି ଦେଶରେ ଦୁଇଟି ଭାରତ ସୃଷ୍ଟି ହୋଇଛି। ଗୋଟିଏ କ୍ଷମତା ଓ ପ୍ରତିପତ୍ତି ଥିବା କୋଟିପତି ଓ ବ୍ୟୁରୋକ୍ରାଟମାନଙ୍କ ପାଇଁ ଏବଂ ଅନ୍ୟଟି ସାଧାରଣ ଲୋକଙ୍କ ପାଇଁ ବୋଲି କଂଗ୍ରେସ ନେତା କହିଥିଲେ। ଭାଜପା ମଡେଲରେ ଜଳ, ଜଙ୍ଗଲ, ଜମି ଭଳି ଲୋକଙ୍କ ସମ୍ପତ୍ତିକୁ ଅଳ୍ପ କେତେଜଣ ଧନୀଙ୍କୁ ଦିଆଯାଇଛି। ରାଜ୍ୟରେ ଭାଜପା ସରକାର ଆଦିବାସୀମାନଙ୍କୁ ସେମାନଙ୍କ ଅଧିକାରରୁ ବଞ୍ଚତ୍ତ କରିଥିବା ରାହୁଲ ଅଭିଯୋଗ କରିଥିଲେ। ଭାଜପା ସରକାର ଆଦିବାସୀମାନଙ୍କୁ କିଛି ଦେଇନାହିଁ କିନ୍ତୁ ସବୁକିଛି ଛଡ଼ାଇନେଇଛି। ଆଦିବାସୀମାନେ ସେମାନଙ୍କ ଅଧିକାର ଛଡ଼ାଇ ଆଣିବାକୁ ହେବ। ତା’ହେଲେ ସେମାନେ ସବୁକିଛି ଫେରିପାଇବେ ବୋଲି ରାହୁଲ କହିଥିଲେ।
