ପାରାଦୀପ,୨୬।୨(ସ୍ବ.ପ୍ର.): କେନ୍ଦ୍ର ସରକାର ଅନେକ ରାଷ୍ଟ୍ରାୟତ୍ତ ଉଦ୍ୟୋଗକୁ ଘରୋଇ ପୁଞ୍ଜିପତିଙ୍କ ହାତରେ ଟେକି ଦେଉଛନ୍ତି ବୋଲି ଦେଶରେ ଚର୍ଚ୍ଚା ଜୋର ଧରିଛି। ଏବେ ଆଉ ଏକ ସରକାରୀ ଉପକ୍ରମ ଓଡ଼ିଶାରେ ବନ୍ଦ ହେବାକୁ ଯାଉଛି। ତାହା ହେଲା ଏମ୍ଏମ୍ଟିସି (ମିନେରାଲ ମେଟାଲ ଟ୍ରେଡିଂ କର୍ପୋରେସନ)ଲିମିଟେଡ। ପାରାଦୀପ, ଯାଜପୁର ଓ ଭୁବନେଶ୍ୱରଠାରେ ଏହି ରାଷ୍ଟ୍ରାୟତ୍ତ ସଂସ୍ଥା ୧୯୬୦ରୁ ଏପର୍ଯ୍ୟନ୍ତ ରହିଛି। କିନ୍ତୁ ପାରାଦୀପରେ ଚାଲିଥିବା ପଣ୍ୟ କାରବାର ୨୦୨୦ରୁ ସମ୍ପୂର୍ଣ୍ଣ ବନ୍ଦ ରହିଛି। ଏବେ କେବଳ ଅଫିସ ଓ ଆବାସିକ ସ୍ଥାନ ରହିଛି। କାର୍ଯ୍ୟାଳୟରେ ଏବେ କେବଳ ୪ ଜଣ କର୍ମଚାରୀ ବସି ଦରମା ନେଉଥିତ୍ବା ଜଣାପଡ଼ିଛି।
କେନ୍ଦ୍ର ବାଣିଜ୍ୟ ମନ୍ତ୍ରଣାଳୟ ଅଧୀନରେ ଥିବା ଏମ୍ଏମ୍ଟିସି ଏକଦା ପାରାଦୀପ ବନ୍ଦରର ମୁଖ୍ୟ ବ୍ୟବହାରକାରୀ ସଂସ୍ଥା ଥିଲା। ୧୯୬୨ରେ ବନ୍ଦର ପ୍ରତିଷ୍ଠା ହେବା ପରେ ଏହି ସଂସ୍ଥା ୧୯୬୫ରୁ ପଣ୍ୟ ବୋଝେଇ, ଖଲାସ ଓ ପରିବହନ ଆଦି କାମ କରିଆସୁଥିଲା। ସେଥିପାଇଁ ପାରାଦୀପ ବନ୍ଦର ପ୍ରଶାସନ ସଂସ୍ଥାକୁ ବନ୍ଦର ନିଷିଦ୍ଧାଞ୍ଚଳରେ ପ୍ଲଟ୍ ଯୋଗାଇ ଦେଇଥିଲେ। ଏହାର ଅଫିସ ଓ କର୍ମଚାରୀଙ୍କ ରହଣି ପାଇଁ ସ୍ବତନ୍ତ୍ର ଭାବେ ମଧୁବନ ଜଗନ୍ନାଥ ମନ୍ଦିର ପାଖରେ ଜାଗା ଯୋଗାଇ ଦେଇଥିଲେ। ସେଠାରେ ସଂସ୍ଥା ପକ୍ଷରୁ ଏକ ସ୍ବତନ୍ତ୍ର କଲୋନୀ କରାଯାଇ ୪୮ କ୍ୱାର୍ଟର୍ସ, ଖେଳପଡ଼ିଆ ଆଦି କରାଯାଇଥିଲା। ୧୯୬୦ରୁ ୧୯୯୦ ପର୍ଯ୍ୟନ୍ତ ୮୦ କର୍ମଚାରୀ ଏଠାରେ କାମ କରୁଥିବାବେଳେ ଅନେକ ଯାନ୍ତ୍ରିକ ଉପକରଣ ଥିଲା। ୧୯୯୧ ଜୁନ ୨୪ରେ ତତ୍କାଳୀନ କେନ୍ଦ୍ର ସରକାର ଏଲ୍ପିଜି (ଉଦାରୀକରଣ, ଘରୋଇକରଣ, ଜଗତୀକରଣ)ନିୟମ ପ୍ରଣୟନ କଲେ। ତା’ପରଠାରୁ ଧୀରେ ଧୀରେ ଏମ୍ଏମ୍ଟିସିର ବ୍ୟବସାୟ ହ୍ରାସ ପାଇଲା। ସେହି ସ୍ଥାନରେ ଘରୋଇ ଷ୍ଟିଭେଡର୍ସ ସଂସ୍ଥା ବନ୍ଦର ପଣ୍ୟ କାରବାରରେ ପ୍ରବେଶ କଲା। ଏମିତି ଧାରା ୨୦୨୦ ପର୍ଯ୍ୟନ୍ତ ଚାଲିଲା। ୨୦୨୦ କରୋନା କଟକଣା ସମୟରୁ ସମ୍ପୂର୍ଣ୍ଣ କାରବାର ବନ୍ଦ ହୋଇଗଲା ବୋଲି ଏମ୍ଏମ୍ଟିସି କାର୍ଯ୍ୟାଳୟର ଶ୍ୟାମସୁନ୍ଦର ନାୟକ ନାମକ କର୍ମଚାରୀ କହିଛନ୍ତି। ପଣ୍ୟ କାରବାର ବନ୍ଦ ହୋଇଗଲା ପରେ ଏମ୍ଏମ୍ଟିସି ପକ୍ଷରୁ ବନ୍ଦର ନିଷିଦ୍ଧାଞ୍ଚଳରେ ଥିବା ପ୍ଲଟକୁ ପାରାଦୀପ ବନ୍ଦର ପ୍ରଶାସନକୁ ହସ୍ତାନ୍ତର କରାଯାଇଛି ବୋଲି ଉକ୍ତ କାର୍ଯ୍ୟାଳୟରୁ ସୂଚନା ମିଳିଛି। ସେହିପରି ଏମ୍ଏମ୍ଟିସି ପକ୍ଷରୁ ଯାଜପୁରସ୍ଥିତ ଏନ୍ଆଇଏନ୍ଏଲ୍(ନୀଳାଚଳ ଇସ୍ପାତ ନିଗମ ଲିମିଟେଡ)ରେ ୪୯ ପ୍ରତିଶତ ପୁଞ୍ଜି ବିନିଯୋଗ କରାଯାଇଥିଲା। ସେଠାରେ ପିଗ୍ ଆଇରନ ଉତ୍ପାଦନ ହେଉଥିଲା। ତାହା ମଧ୍ୟ କିଛି ବର୍ଷ ବନ୍ଦ ରହିବା ପରେ ଗତବର୍ଷ ଏକ ଘରୋଇ ସଂସ୍ଥା ହାତକୁ ସରକାର ଟେକି ଦେଇଛନ୍ତି। ଏବେ ଏମ୍ଏମ୍ଟିସିର ଓଡ଼ିଶାରେ ଆଉ କିଛି ବ୍ୟବସାୟ ନାହିଁ ବୋଲି ଜଣେ କର୍ମଚାରୀ ସ୍ବୀକାର କରିଛନ୍ତି। ଯେଉଁ କ୍ୱାର୍ଟର୍ସ ପାରାଦୀପରେ ଥିଲା ସେଥିରେ ଏବେ ୪୦ରୁ ଅଧିକ ଘରୋଇ ସଂସ୍ଥାର କର୍ମଚାରୀଙ୍କୁ ଦିଆଯାଇଛି। ଅଫିସରେ କିଛି କାମ ନାହିଁ। ସରକାରୀ ବୋର୍ଡରୁ ରଙ୍ଗ ଉଡି ଗଲାଣି। ଏଭଳି ସ୍ଥିତିରେ କେନ୍ଦ୍ର ସରକାର ଯେକୌଣସି ସମୟରେ ଏହାକୁ ଯେ ବନ୍ଦ ଘୋଷଣା ନ କରିବେ ସେ କଥା ଏଡ଼ାଇ ଦିଆ ଯାଇ ନ ପାରେ।
