ଲକ୍ଷ୍ନୌ,୧୨।୩: ଭାରତୀୟ ମହିଳା ଦିନିକିଆ କ୍ରିକେଟ ଟିମ୍ର ଅଧିନାୟକ ମିତାଲି ରାଜ ଶୁକ୍ରବାର ଦକ୍ଷିଣ ଆଫ୍ରିକା ମହିଳା କ୍ରିକେଟ ଟିମ୍ ବିପକ୍ଷରେ ଖେଳାଯାଉଥିବା ତୃତୀୟ ଦିନିକିଆରେ ରେକର୍ଡ କରିଛନ୍ତି। ୩୮ ବର୍ଷୀୟ ମିତାଲି କ୍ରିକେଟର ଭାବେ ନିଜର ୧୦,୦୦୦ ରନ୍ ପୂରଣ କରିଛନ୍ତି। ତେବେ ସେ ଏଭଳି କରିଥିବା ପ୍ରଥମ ଭାରତୀୟ ମହିଳା କ୍ରିକେଟର ପାଲଟିଛନ୍ତି। ସେହିଭଳି ବିଶ୍ୱରେ ୧୦,୦୦୦ ରନ୍ ପୂରଣ କରିଥିବା ଦ୍ୱିତୀୟ ମହିଳା କ୍ରିକେଟର ସେ ପାଲଟିଛନ୍ତି। ତୃତୀୟ ଦିନିକିଆରେ ୩୫ରନ୍ ପୂରଣ କରିବା ମାତ୍ରେ ସେ ଇତିହାସ ରଚିଥିଲେ। ଏଯାବତ ସେ ୩୧୧ ମ୍ୟାଚ୍ ଖେଳିଥିବା ବେଳେ ୭୫ ଅର୍ଦ୍ଧଶତକ ଏବଂ ୮ ଶତକ ବଳରେ ୧୦୦୦୧ରନ୍ କରିଛନ୍ତି।
