ଆବୁଧାବି,୧୦।୧୧: ଗତ ଦୁଇ ଥର ଭଳି ଏଥର ଇଂଲଣ୍ଡ ପାଖରେ ହାରିନାହିଁ ନ୍ୟୁଜିଲାଣ୍ଡ। ଚଳିତ ଟି୨୦ ବିଶ୍ୱକପ୍ରେ ପ୍ରଥମ ସେମିଫାଇନାଲରେ ନ୍ୟୁଜିଲାଣ୍ଡ ୫ ଉଇକେଟରେ ଇଂଲଣ୍ଡକୁ ହରାଇ ଫାଇନାଲରେ ପ୍ରବେଶ କରିଛି। ଗତ ଥର ୨୦୧୯ରେ କେନ ଓ୍ବିଲିୟମସନଙ୍କ ଦଳକୁ ବିଶ୍ୱକପ୍ ଟ୍ରଫିଠାରୁ ଫାଇନାଲରେ ଭାଗ୍ୟବଶତଃ ରୋକି ଦେଇଥିଲା ଇଂଲଣ୍ଡ। ତାହା ପୂର୍ବରୁ ୨୦୧୬ ଟି୨୦ ବିଶ୍ୱକପ୍ରେ ସେମିଫାଇନାଲରେ ମଧ୍ୟ ଇଂଲଣ୍ଡ କାରଣରୁ ନ୍ୟୁଜିଲାଣ୍ଡର ଅଭିଯାନ ଶେଷ ହୋଇଥିଲା। ଦୁଇ ପରାଜୟର ପ୍ରତିଶୋଧ ନେଇଛି ନ୍ୟୁଜିଲାଣ୍ଡ।
୧୬୭ ରନ୍ର ବିଜୟଲକ୍ଷ୍ୟ ନେଇ ଓହ୍ଲାଇଥିବା ନ୍ୟୁଜିଲାଣ୍ଡ ମାତ୍ର ୧୩ ରନ୍ ପ୍ରମୁଖ ଦୁଇ ଉଇକେଟ ହରାଇ ସାରିଥିଲା। ମାର୍ଟିନ ଗୁପଟିଲ (୪) ଓ ଅଧିନାୟକ କେନ ଓ୍ବିଲିୟମସନ (୫) ଆଉଟ୍ ହେବା ପରେ ସ୍ଥିତି ସମ୍ଭାଳି ଥିଲେ ଡାରଲି ମିଚେଲ ଓ ଡେଭନ କନଓ୍ବେ (୪୬ ରନ୍, ୫ ଚୌକା ଓ ୧ ଛକା)ଙ୍କ ଯୋଡ଼ି। ଦୁହେଁ ୩ୟ ଉଇକେଟ ପାଇଁ ୮୨ ରନ୍ ଯୋଡ଼ିଥିଲେ। ତା’ ପରେ ଦଳ କ୍ରମାଗତ ବ୍ୟବଧାନରେ ଦୁଇ ଉଇକେଟ ହରାଇଥିଲା। କିନ୍ତୁ ସବୁ କିଛି ବଦଳି ଦେଇଥିଲା ଜେମ୍ସ ନିଶାମକ ଇନିଂସ। ସେ ୧୦ ବଲରେ ୧ ଚୌକା ଓ ୩ ଛକା ବଳରେ ୨୭ ରନ୍ କରିଥିଲେ। ଶେଷକୁ ଛକା ପରେ ଛକା ଲଗାଇ ମ୍ୟାଚ୍ ଛଡ଼ାଇ ଆଣିଥିଲେ ମିଚେଲ। ସେ ୪୭ ବଲରେ ଖେଳିଥିଲେ ଅପରାଜିତ ୭୨ ରନ୍ର ଦର୍ଶନୀୟ ଇନିଂସ। ତାଙ୍କ ପାଳିରେ ଥିଲା ୪ ଲେଖାଏ ଛକା ଓ ଚୌକା। ଫଳରେ ନ୍ୟୁଜିଲାଣ୍ଡ ୧୯ ଓଭରରେ ୫ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଛି।
