ରାଉରକେଲା,୨ା୧୧(ସଙ୍ଗୀତା ଜେନା): ରାଉରକେଲା ଇସ୍ପାତ କାରଖାନା (ଆର୍ଏସ୍ପି) କର୍ମଚାରୀ ଗୌତମ ଘଡେଇଙ୍କ ଏକ ମାତ୍ର ପୁଅ ଶମ୍ଭୁନାଥ ଘଡେଇ(୨୭)ଙ୍କ ସନ୍ଦେହଜନକ ମୃତ୍ୟୁ ହୋଇଛି। ରାଉରକେଲାରୁ ନିଖୋଜ ହୋଇଥିବାବେଳେ ୩୦ ତାରିଖରେ କୋରାପୁଟରୁ ମୃତଦେହ ଜବତ କରାଯାଇଛି। ବୁଲିବାକୁ ଡାକି ନେଇ ହତ୍ୟା କରାଯାଇଛି ବୋଲି ପରିବାର ପକ୍ଷରୁ ବୁଧବାର ଅଭିଯୋଗ ହୋଇଛି। ମୃତ୍ୟୁ ପଛରେ ସାଙ୍ଗମାନଙ୍କ ହାତ ଥିବା ଅଭିଯୋଗ କରି ପ୍ଲାଣ୍ଟସାଇଟ୍ ଥାନାରେ ପରିବାର ଲୋକେ ଏତଲା ଦେଇଥିଲେ। ହେଲେ ପୋଲିସ ଏତଲା ଗ୍ରହଣ କରି ନ ଥିଲା।
ରାଉରକେଲା ଟିମ୍ବର କଲୋନିରେ ଶମ୍ଭୁନାଥଙ୍କ ଘର। ସେପ୍ଟେମ୍ବର ୨୫ରେ ତାଙ୍କ ଜନ୍ମ ଦିନ ଥିଲା। ତାଙ୍କର କେତେଜଣ ସାଙ୍ଗ ଘରକୁ ଆସି ଜନ୍ମ ଦିନ ପାଳନ କରିିଥିଲେ। ୨୬ ତାରିଖ ଭୋର ୩ ଜଣ ସାଙ୍ଗ ଶମ୍ଭୁଙ୍କୁ କାରରେ ବୁଲିବାକୁ ଜୋରଜବରଦସ୍ତି ନେଇ ଯାଇଥିଲେ। ୨୭ ତାରିଖରୁ ତାଙ୍କ ମୋବାଇଲ୍ ଫୋନ୍ ସୁଇଚ୍ ଅଫ୍ ଥିଲା। ସାଙ୍ଗମାନଙ୍କ ସହ ଯୋଗାଯୋଗ କରିଥିଲେ ମଧ୍ୟ କୌଣସି ସନ୍ତୋଷଜନକ ଉତ୍ତର ମିଳି ନ ଥିଲା। ଅନ୍ୟ ଉପାୟ ନ ପାଇ ପରିବାରବର୍ଗ ପ୍ଲାଣ୍ଟସାଇଟ୍ ଥାନାରେ ନିଖୋଜ ଏତଲା ଦେବାକୁ ଆସିଥିଲେ। ହେଲେ ପୋଲିସ ଏହାକୁ ଗ୍ରହଣ ନ କରି ୨ ଦିନ ଅପେକ୍ଷା କରିବାକୁ କହିଥିଲା। ୩୦ ତାରିଖ ଶମ୍ଭୁଙ୍କ ମୃତଦେହ କୋରାପୁଟ୍ ପଟ୍ଟାଙ୍ଗିରୁ ଜବତ ହୋଇଥିବା ପରିବାରବର୍ଗ ପୋଲିସଠାରୁ ସୂଚନା ପାଇଥିଲେ। ସାଙ୍ଗ ହତ୍ୟା କରିଥିବା ସନ୍ଦେହ କରି ପରିବାରବର୍ଗ ଏତଲା ଦେଇଥିଲେ ମଧ୍ୟ ତାହାକୁ ପୋଲିସ ନେଇ ନ ଥିଲା। ଏକ ନିଖୋଜ ମାମଲା ରୁଜୁ କରି ତଦନ୍ତ କରିଥିଲା। କୋରାପୁଟ୍ ପଟାଙ୍ଗିରୁ ମୃତଦେହ ଜବତ ହୋଇଥିବାରୁ ସେଠାରେ ହତ୍ୟା ମାମଲା ରୁଜୁ ହେବ ବୋଲି ପୋଲିସ କହି ପରିବାର ଲୋକଙ୍କୁ ଫେରାଇ ଦେଇଥିଲା। ଶମ୍ଭୁଙ୍କ ଜେଜେମା’ ସତ୍ୟ ଘଡେଇ କହିଛନ୍ତି, ଶମ୍ଭୁଙ୍କ ସହ ଯାଇଥିବା ସାଙ୍ଗ ସହ କିଛି ବର୍ଷ ପୂର୍ବେ ଗଣ୍ଡଗୋଳ ହୋଇଥିଲା। ପରେ ବନ୍ଧୁତା ହୋଇଥିଲା। ସାଙ୍ଗକୁ ପଚାରା ଯିବାରୁ ସେ ଠିକ୍ ଉତ୍ତର ଦେଇ ପାରି ନ ଥିଲେ। ଶମ୍ଭୁଙ୍କ ମୃତଦେହରେ ଅନେକ ସ୍ଥାନରେ କ୍ଷତଚିହ୍ନ ରହିଛି। ତେଣୁ ତାଙ୍କୁ ହତ୍ୟା କରାଯାଇଛି।
ଅପରପକ୍ଷରେ, ଥାନାଧିକାରୀ ଜ୍ୟୋତି ପତି କହିଲେ, ୩ଜଣ ସାଙ୍ଗଙ୍କ ସହ ଶମ୍ଭୁ କାରରେ ଯାଇଥିଲେ। ଅତ୍ୟଧିକ ମଦ୍ୟପାନ ଯୋଗୁ ଶମ୍ଭୁ ଅଧାରାସ୍ତାରେ ଅଚେତ ହୋଇ ପଡ଼ିଥିଲେ। ଅନ୍ୟ ଉପାୟ ନ ପାଇ ସାଙ୍ଗମାନେ ତାଙ୍କୁ ଏକ ପଡ଼ିଆରେ ଓହ୍ଲାଇ ଚାଲି ଆସିଥିଲେ। ଥାନାରେ ଜଣେ ସାଙ୍ଗ ଆତ୍ମସମର୍ପଣ କରିଛି। ପୋଲିସ ପଚରାଉଚୁରା ଜାରି ରଖିଛି। ପରିବାରବର୍ଗ ଥାନାରେ ନିଖୋଜ କହିଥିବାରୁ ଆମେ ତଦନ୍ତ କରି କୋରାପୁଟରେ ଏକ ଅଜଣା ମୃତଦେହ ମିଳିଥିବା ଜାଣି ଚିହ୍ନଟ କରାଇଥିଲୁ। ତେବେ ହତ୍ୟା ଅଭିଯୋଗ କୋରାପୁଟ ପଟାଙ୍ଗିରେ କରାଯିବା ନିୟମ ରହିଛି ବୋଲି ପତି କହିଥିଲେ। କୋରାପୁଟରେ ସ୍ଥାନୀୟ ପୋଲିସ ଅପମୃତ୍ୟୁ ମାମଲା ରୁଜୁ କରିଛି। ବୁଧବାର ଅପରାହ୍ନରେ ଶମ୍ଭୁଙ୍କ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ପୋଲିସ ହସ୍ତାନ୍ତର କରିଛି।
