ଦେବଗଡ଼,୧୬ା୯(ଶଶାଙ୍କ ଶେଖର ଝାଙ୍କର)- ଦେବଗଡ଼ ଆଦର୍ଶ ଥାନା ଅଞ୍ଚଳର ଜନୈକା ନାବାଳିକାଙ୍କୁ ଜଣେ ବ୍ୟବସାୟୀ ଯୌନ ନିର୍ଯାତନା ଦେଇଥିବା ବୁଧବାର ଅଭିଯୋଗ ହୋଇଥିଲା। ଏନେଇ ପୋଲିସ ଏକ ମାମଲା ରୁଜୁ କରିଛି। ହେଲେ ଇତିମଧ୍ୟରେ ୫ ଦିନ ବିତିଯାଇଥିଲେ ମଧ୍ୟ ଅଭିଯୁକ୍ତଙ୍କୁ ଗିରଫ କରିବାରେ ବିଫଳ ହୋଇଛି। ଅପରପକ୍ଷେ ସମ୍ପୃକ୍ତ ବ୍ୟବସାୟୀ ଜଣଙ୍କ ନାବାଳିକାଙ୍କ ପରିବାର ସଦସ୍ୟ ଓ ପୋଲିସକୁ ମୋଟାଅଙ୍କର ଟଙ୍କା ଦେଇ ଘଟଣାକୁ ଚପାଇ ଦେବା ପାଇଁ ଉଦ୍ୟମ କରିଥିବା ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି।
ମିଳିଥିବା ସୂଚନା ଅନୁଯାୟୀ, ଦେବଗଡ଼ ଜିଲା ସଦର ମହକୁମାସ୍ଥିତ ବାଳିକା ଉଚ୍ଚ ବିଦ୍ୟାଳୟ ଛକ ନିକଟ ଅଗ୍ରୱାଲ ସେଲ୍ସ ଲଜିଷ୍ଟିକ୍ରେ ସେଲ୍ସ ଗର୍ଲ ଭାବେ ସମ୍ପୃକ୍ତା ନାବାଳିକା କାମ କରୁଥିଲେ। ଦୋକାନ ମାଲିକ ଜିତେନ୍ଦ୍ର ଅଗ୍ରୱାଲ କିଛିଦିନ ହେବ ତାଙ୍କୁ ଯୌନ ନିର୍ଯାତନା ଦେଇଆସୁଥିଲେ। ଏପରି କି ସେ ଧମକ ଦେଇ କହିଥିଲେ, ପୋଲିସ ସହ ମୋର ଭଲ ସମ୍ପର୍କ, ତୁ ଥାନାରେ ଅଭିଯୋଗ କଲେ ମୋର କିଛି ହେବ ନାହିଁ। ହେଲେ ଗତ ୯ ତାରିଖ ସନ୍ଧ୍ୟା ୬ଟାରେ ନାବାଳିକା ଜଣଙ୍କ ଚାଇଲ୍ଡ ହେଲ୍ପଲାଇନ୍ ନମ୍ବର ୧୦୯୮ ନମ୍ବରକୁ ଫୋନ୍କରି କହିଥିଲେ, ମୁଁ ଅଗ୍ରୱାଲ ସେଲ୍ସ ଲଜିଷ୍ଟିକ୍ରେ କାମ କରୁଛି I ମାଲିକ ଜିତେନ୍ଦ୍ର ଅଗ୍ରୱାଲ ମୋତେ କିଛିଦିନ ହେବ ବାରମ୍ବାର ଯୌନ ନିର୍ଯାତନା ଦେଉଛନ୍ତି। ଖବରପାଇ ଜିଲା ଶିଶୁ ସୁରକ୍ଷା ଅଧିକାରୀ ରୋମିଓ ମହାପାତ୍ରଙ୍କ ନିର୍ଦ୍ଦେଶକ୍ରମେ ଚାଇଲ୍ଡ ହେଲ୍ପଲାଇନ୍ କର୍ମକର୍ତ୍ତା ସୂର୍ଯ୍ୟକାନ୍ତି ଭମସାଗର, ସୁଜିତ୍ ନାୟକ ଓ ପିଙ୍କୁ ମୁଣ୍ଡା ତୁରନ୍ତ ଘଟଣାସ୍ଥଳରେ ପହଞ୍ଚିବାବେଳକୁ ନାବାଳିକା ଜଣଙ୍କ ଦୋକାନ ସମ୍ମୁଖରେ ବସି କାନ୍ଦିବା ସହ ମାଲିକଙ୍କୁ ଜୋରରେ ପାଟିକରି ଗାଳି ଦେଉଥିବା ଦେଖିବାକୁ ପାଇଥିଲେ। ହେଲେ ମାଲିକ ଅଗ୍ରୱାଲ ସେତେବେଳେ ଦୋକାନ ଛାଡି ଚାଲିଯାଇଥିଲେ। ଚାଇଲ୍ଡ ଲାଇନ୍ କର୍ମକର୍ତ୍ତା ସେଠାରୁ ନାବାଳିକାଙ୍କୁ ଉଦ୍ଧାର କରି ନୂଆ ହସ୍ପିଟାଲସ୍ଥିତ ସଖୀ କେନ୍ଦ୍ରକୁ ନେଇଥିଲେ। ଏହା ପରଦିନ ଅର୍ଥାତ୍ ୧୦ ତାରିଖ ପୂର୍ବାହ୍ନରେ ନାବାଳିକା ଥାନାରେ ଏତଲା ଦେବାକୁ ଚାହିଁଥିଲେ। ହେଲେ ଘରଲୋକ ଦୋକାନ ମାଲିକଙ୍କ ଦ୍ୱାରା ଚାପଗ୍ରସ୍ତ ହୋଇ ଏତଲା ନ ଦେବାକୁ ନାବାଳିକାଙ୍କୁ ବୁଝାଇଥିଲେ I ମାତ୍ର ନାବାଳିକା ଘର ଲୋକଙ୍କ କଥାରେ ରାଜି ନ ହୋଇ ୧୦ ତାରିଖ ସନ୍ଧ୍ୟାରେ ଅଗ୍ରଓ୍ବାଲଙ୍କ ବିରୋଧରେ ଥାନାରେ ଏତଲା ଦେଇଥିଲେ I ଅଭିଯୋଗ ଆଧାରରେ ଫଳରେ ଭାରତୀୟ ନ୍ୟାୟ ସଂହିତାର ଦଫା ୭୫, ୭୮ ଓ ପୋକ୍ସୋ ଧାରା ୮ ଅନୁଯାୟୀ ମାମଲା(ନଂ.୪୨୭/୨୫) ରୁଜୁ କରିଥିଲା। ପରବର୍ତ୍ତୀ ସମୟରେ ସଖୀ କେନ୍ଦ୍ରରୁ ପୋଲିସ ସମ୍ପୃକ୍ତା ନାବାଳିକାଙ୍କୁ ନେଇ ଶିଶୁ ମଙ୍ଗଳ କମିଟି(ସିଡବ୍ଲ୍ୟୁସି)ରେ ହାଜର କରିଥିଲା। ଏ ସମ୍ପର୍କରେ ଦେବଗଡ଼ ଆଦର୍ଶ ଥାନା ଅଧିକାରୀ ସବ୍ୟସାଚୀ ଶତପଥୀ କହିଛନ୍ତି, ଉକ୍ତ ଘଟଣାରେ କୌଣସି ଟଙ୍କା କାରବାର ହୋଇନାହିଁ। ତଦନ୍ତ ଜାରି ରହିଛି। ଅଭିଯୁକ୍ତ ଫେରାର ଅଛନ୍ତି। ଖୁବ୍ଶୀଘ୍ର ତାଙ୍କୁ ଗିରଫ କରାଯିବ।
