ଝାରସୁଗୁଡା ଅଫିସ,୧୭।୫: ସ୍ବାସ୍ଥ୍ୟ ମନ୍ତ୍ରୀ ନବ କିଶୋର ଦାସଙ୍କ ନେତୃତ୍ୱରେ ଝାରସୁଗୁଡା ବ୍ଲକ ବ୍ରଜରାଜନଗର ନିର୍ବାଚନ ମଣ୍ଡଳୀର ୫ ପଞ୍ଚାୟତକୁ ନେଇ ଏକ କର୍ମୀ ସମ୍ମିଳନୀ ଅନୁଷ୍ଠିତ କରାଯାଇଛି । ଏଥିରେ କଟକ ମେୟର ସୁବାଷ ସିଂ, ଝାରସୁଗୁଡ଼ା ଜିଲା ସହ ପର୍ଯ୍ୟବେକ୍ଷକ ବିଷ୍ଣୁପ୍ରସାଦ କେଡ଼ିଆଙ୍କ ସହ ପଞ୍ଚାୟତସ୍ତରୀୟ କର୍ମକର୍ତ୍ତା ଉପସ୍ଥିତ ଥିଲେ। ଏହି ଅବସରରେ ସ୍ବାସ୍ଥ୍ୟ ମନ୍ତ୍ରୀ ନବ କିଶୋର ଦାସ କର୍ମୀମାନଙ୍କୁ ଏକଜୁଟ ହୋଇ ବିଧାୟକ ପ୍ରାର୍ଥୀନୀ ଅଳକା ମହାନ୍ତିଙ୍କୁ କିପରି ବିପୁଳ ଭୋଟରେ ବିଜୟୀ କରିବେ ଏନେଇ ଯୋଜନା ପ୍ରସ୍ତୁତ କରିଥିଲେ। ଏପରି କି ତୃଣମୂଳସ୍ତରରୁ କର୍ମୀଙ୍କୁ କାର୍ଯ୍ୟ କରିବାକୁ କହିଛନ୍ତି।
ଉପ ନିର୍ବାଚନରେ ୫୦ ହଜାରରୁ ଊର୍ଦ୍ଧ୍ୱ ଭୋଟରେ ବିଜେଡି ବିଜୟୀ ହେବ ବୋଲି ସ୍ବାସ୍ଥ୍ୟମନ୍ତ୍ରୀ ଦାସ ଦୃଢୋକ୍ତି ପ୍ରକାଶ କରିଛନ୍ତି। ପଞ୍ଚାୟତ ଓ ପୌର ନିର୍ବାଚନରେ ବ୍ରଜରାଜନଗରବାସୀ ଦଳକୁ ଆଶୀର୍ବାଦ କରିଛନ୍ତି l ଦଳର ଲୋକାଭିମୁଖୀ କାର୍ଯ୍ୟ ଯୋଗୁ ପୁଣି ଥରେ ଅଞ୍ଚଳବାସୀ ଅଳକାଙ୍କୁ ବିଜୟୀ କରାଇବେ ବୋଲି ସ୍ବାସ୍ଥ୍ୟ ମନ୍ତ୍ରୀ ଦାସ କହିଛନ୍ତି। ସେହିପରି କଟକ ମେୟର ସୁବାଷ ସିଂ କହିଥିଲେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଫୋକସ ଝାରସୁଗୁଡା ଜିଲା ଉପରେ ରହିଛି l ସ୍ବର୍ଗତ ବିଧାୟକ କିଶୋର ମହାନ୍ତି ଅଞ୍ଚଳରେ ଅନେକ ଉନ୍ନୟନମୂଳକ କାର୍ଯ୍ୟ କରିଛନ୍ତି। ଏନେଇ ଦଳ ଉପରେ ଅଞ୍ଚଳବାସୀଙ୍କ ଅତୁଟ ବିଶ୍ୱାସ ରହିଛି। ତେଣୁ ଉପ ନିର୍ବାଚନରେ ଅଳକାଙ୍କୁ ଜନସାଧାରଣ ଆଶୀର୍ବାଦ କରିବେ ବୋଲି ସୁବାଷ ସିଂ କହିଛନ୍ତି। ସମ୍ମିଳନୀରେ ଝାରସୁଗୁଡା ଜୋନ ୧ ଜିଲା ପରିଷଦ ସଭ୍ୟ ଝରଣା ସାଗର, ଝାରସୁଗୁଡା ବିଜେଡି ବ୍ଲକ ସଭାପତି ଦାମୋଦର ନାଥ, ପିନି ସାଏ, ହେମିନ ଦେଓ, ରାଜକୁମାର ସାଏ, ହର୍ଷ ଜଗତ, ଶରତ ପ୍ରଧାନ, ସଞ୍ଜୟ ସାଏ, ପପ୍ପୁ ରାଏ ପ୍ରମୁଖ କର୍ମକର୍ତ୍ତା ଉପସ୍ଥିତ ଥିଲେ । କର୍ମୀ ସମ୍ମିଳନୀକୁ ନଟବର ଶର୍ମା ଓ ପିଣ୍ଟୁ ପାଢ଼ୀ ପରିଚାଳନା କରିଥିଲେ।
