କଣାସ,,୧୯ା୧୧(ସ୍ବ.ପ୍ର.): ପୁରୀ ଜିଲା ପ୍ରତିବର୍ଷ ବନ୍ୟା, ବାତ୍ୟା ଭଳି ବିପର୍ଯ୍ୟୟର ସମ୍ମୁଖୀନ ହେଉଛି। ଏହି ବିପର୍ଯ୍ୟୟ ଦ୍ୱାରା ବିଶେଷ ଭାବେ କଣାସ ବ୍ଲକ ଅଞ୍ଚଳ ଅଧିକ ଖାଲୁଆ ଅଞ୍ଚଳ ହୋଇଥିବାରୁ ଚାଷ ସହ ଧନଜୀବନ କ୍ଷତି ହେଉଛି। ଏହି ବିପର୍ଯ୍ୟୟର ସ୍ଥାୟୀ ପ୍ରତିକାର ପାଇଁ ସ୍ଥାନୀୟ ଅଞ୍ଚଳର ବିଶିଷ୍ଟ ନେତା, ବ୍ୟକ୍ତିଙ୍କ ଅନୁରୋଧକ୍ରମେ ଗୁରୁବାର କେନ୍ଦ୍ର ଜଳଶକ୍ତି ଓ ଆଦିବାସୀ କଲ୍ୟାଣ ରାଷ୍ଟ୍ରମନ୍ତ୍ରୀ ବିଶେଶ୍ୱର ଟୁଡୁ କଣାସ ବ୍ଲକ ଆସିଥିଲେ। ଏପରିକି ଜାଗୁଳେଇପଦରକୁ ଯାଇ ଡଙ୍ଗା ଯୋଗେ ବଡ଼ଗୋଠ ଦେଇ ପୋତି ହୋଇପଡିଥିବା ନଦୀ ମୁହଁାଣ ପରିଦର୍ଶନ କରିଥିଲେ। ଏଥିସହ ଏହାର ସମାଧାନ ପାଇଁ କଣାସରେ ଆୟୋଜିତ ଏକ ସଭାରେ ଯୋଗଦେଇଥିଲେ।
ଜିଲାରେ ପ୍ରତିବର୍ଷ ବନ୍ୟା ଭଳି ବିପର୍ଯ୍ୟୟ ଯୋଗୁ ଜଳନିଷ୍କାସନ ହୋଇ ନ ପାରି ଅନେକ ଧନଜୀବନ କ୍ଷତିଗ୍ରସ୍ତ ହେଉଛି। ବିଶେଷ କରିି କଣାସ ସମେତ ଆଖପାଖ ଡେଲାଙ୍ଗ, ପିପିଲି, ବ୍ରହ୍ମଗିରି, ସତ୍ୟବାଦୀ ବ୍ଲକର ମଧ୍ୟ ଚାଷଜମି, ଜନସାଧାରଣ ଅଧିକ କ୍ଷତି ସହୁଛନ୍ତି। ଏହି ସମସ୍ୟାର ସ୍ଥାୟୀ ପ୍ରତିକାର ପାଇଁ ସତ୍ୟବାଦୀ ପୂର୍ବତନ ବିଧାୟକ ରମାରଞ୍ଜନ ବଳିଆରସିଂହ, ପୁରୀ ବିଧାୟକ ଜୟନ୍ତ ଷଡ଼ଙ୍ଗୀ, ପୁରୀ ଜିଲା ଭାଜପା ସଭାପତି ଆଶ୍ରୀତ୍ ପଟ୍ଟନାୟକ, ଓବିସି ମୋର୍ଚ୍ଚା ରାଜ୍ୟ ସଭାପତି ସୁରଥ ବିଶ୍ୱାଳ ଓ ବିରଞ୍ଚି ତ୍ରିପାଠୀ ସେପ୍ଟେମ୍ବର ୧୯ରେ କେନ୍ଦ୍ର ମନ୍ତ୍ରୀ ବିଶେଶ୍ୱର ଟୁଡୁଙ୍କୁ ଭୁବନେଶ୍ୱରରେ ଭେଟି ଅନୁରୋଧ କରିଥିଲେ। ଅନୁରୋଧ ରକ୍ଷାକରି ଗୁରୁବାର ରାଷ୍ଟ୍ରମନ୍ତ୍ରୀ ଟୁଡୁ କଣାସ ଆସିଥିଲେ। ପୂର୍ବତନ ବିଧାୟକ ବଳିଆରସିଂହଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ରାଷ୍ଟ୍ରମନ୍ତ୍ରୀ ଟୁଡୁ ଯୋଗଦେଇ ବନ୍ୟାର ପ୍ରତିକାର ପାଇଁ ବିଭିନ୍ନ ଦିଗ ଉପରେ ଉପସ୍ଥିତ ଅନ୍ୟ ନେତା ଓ ବ୍ୟକ୍ତିମାନଙ୍କ ସହ ଆଲୋଚନା କରିଥିଲେ। ଏଥିସହ ପ୍ରଶାସନ ଅଧିକାରୀମାନଙ୍କୁ ବିଭିନ୍ନ ପଦକ୍ଷେପ ବିଷୟରେ କହିଥିଲେ। ରାଜୁଆନଦୀର ଢୋଲପାଟଣାରେ ୨୦ବର୍ଷ ତଳେ ଆରମ୍ଭ ହୋଇଥିବା ବ୍ୟାରେଜ୍ ନିର୍ମାଣ କାର୍ଯ୍ୟ ଶୀଘ୍ର ସାରିବା, ମକରାନଦୀରୁ ବଡ଼ଓରା ପର୍ଯ୍ୟନ୍ତ ଯାଇଥିବା ଆଡିନଦୀକୁ ଖନନ କରିବା ଏବଂ କଣାସ ବ୍ରାଞ୍ଚ କେନାଲ୍କୁ ଆରଦଙ୍ଗାନାଳ ସହିତ ସଂଯୋଗ କରିବା ଆଦି ସମସ୍ୟା ନେଇ କେତେକ ସଂଗଠନ ମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରିଥିଲେ। ରାଷ୍ଟ୍ରୀମନ୍ତ୍ରୀ ଟୁଡୁ ଶେଷରେ ତାଙ୍କ ସହିତ ଆସିଥିବା କେନ୍ଦ୍ରୀୟ ଅଧିକାରୀ ଓ ପୁରୀ, ଖୋର୍ଦ୍ଧା ଜଳସେଚନ ବିଭାଗର ଅଧିକାରୀ ଏବଂ ଡ୍ରେନେଜ୍ ବିଭାଗର ଅଧିକାରୀ, କଣାସ ବିଡିଓ ଲୋଚନ ଦାସ, ତହସିଲଦାର ଲକ୍ଷ୍ମୀଧର ମହାରଣାଙ୍କୁ ଡାକି କଣାସ ଅଞ୍ଚଳର ବନ୍ୟା ସମ୍ଯଯା କିପରି ସ୍ଥାୟୀ ପ୍ରତିକାର କରାଯାଇପାରିବ ତାହାର ଏକ ମାଷ୍ଟରପ୍ଲାନ୍ ପ୍ରସ୍ତୁତ କରିବାକୁ କହିଥିଲେ। ଏହି ମାଷ୍ଟରପ୍ଲାନ୍କୁ କେନ୍ଦ୍ର ଜଳଶକ୍ତି ମନ୍ତ୍ରୀ ଓ ପ୍ରଧାନମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରି ବନ୍ୟା ସମସ୍ୟାର ଶୀଘ୍ର ପ୍ରତିକାର କରିବେ ବୋଲି ପ୍ରତିଶ୍ରୁତି ଦେଇଥିଲେ। ସଭାରେ ଆଶ୍ରୀତ ପଟ୍ଟନାୟକ, ଯୁବନେତା ଓମ୍ପ୍ରକାଶ ମିଶ୍ର, କୃଷ୍ଣଚନ୍ଦ୍ର ଜଗଦ୍ଦେବ, ବିରଞ୍ଚିନାରାୟଣ ତ୍ରିପାଠୀ, ସୁରଥି ବିଶ୍ୱାଳ, ସୁଶୀଲକାନ୍ତ ରାଉତ, ଲକ୍ଷ୍ମୀଧର ଜଗଦ୍ଦେବ, ଲତାମଣୀ ଜଗଦ୍ଦେବ, ଉମାକାନ୍ତ ମିଶ୍ର ଓ ପ୍ରେମାନନ୍ଦ ବେହେରା ପ୍ରମୁଖ ଉପସ୍ଥିତ ଥିଲେ।
