ଯୋଡ଼ା,୧୬।୫ (ଡି.ଏନ.ଏ.): କେନ୍ଦୁଝର ଜିଲା ଯୋଡ଼ା ଖଣି ଉପ ନିର୍ଦ୍ଦେଶାଳୟ କାର୍ଯ୍ୟାଳୟ ପଛ ପଟୁ ଯୋଡ଼ା ପୋଲିସ ମାଙ୍ଗାନିଜ ଖଣିଜ ସହିତ ବୋଝେଇ ହୋଇଥିବା ଏକ ବୋଲେରୋକୁ ଜବତ କରିଛି।
ସୂଚନା ଅନୁଯାୟୀ, ଯୋଡ଼ା ଖଣି ଉପନିଦ୍ଦେର୍ର୍ଶାଳୟ କାର୍ଯାଳୟଠାରୁ ୧୦୦ ମିଟର ଦୂରରେ ଥିବା ନେପାଳୀ ବସ୍ତିରେ ରବିବାର ଭୋର ୩ ଟାବେଳେ ଏକ ବୋଲେରୋ ଠିଆ ହେଉଥିବା ଦେଖି ବସ୍ତୀବାସୀନ୍ଦା ଥାନାକୁ ଖବର ଦେଇଥିଲେ। ଖବରପାଇ ପୋଲିସ ପହଞ୍ଚି ମାଙ୍ଗାନିଜ ବୋଝେଇ ଏକ ବୋଲେରୋକୁ ଜବତ କରିଥିଲା। ବିଭାଗ ପକ୍ଷରୁ ଖଣି ଅଧିକାରୀ ଦେବେନ୍ଦ୍ର ନାଥ ଦଳେଇ ସନ୍ଧ୍ୟା ସମୟରେ ଥାନାକୁ ଆସି ଖଣିଜର ଯାଞ୍ଚ କରିଥିଲେ। ଉକ୍ତ ଗାଡ଼ିରେ ପ୍ରାୟ ୫୦ କୁଇଣ୍ଟାଲ ଉନ୍ନତ ଧରଣର ମାଙ୍ଗାନିଜ ଥିବା କହିଛନ୍ତି। ଏନେଇ ଏକ ମାମଲା(ନଂ.୮୪/୨୦୨୨) ରୁଜୁ କରି ଅଧିକ ତଦନ୍ତ ଜାରି ରଖିଥିବା ଯୋଡ଼ା ଆଇଆଇସି ପଦ୍ମାଳୟା ସାହୁ ପ୍ରକାଶ କରିଛନ୍ତି। ତେଣେ ଖଣି କାର୍ଯ୍ୟାଳୟ ପଛପଟୁ ବିପୁଳ ପରିମାଣର ମାଙ୍ଗାନିଜ ଚାଲାଣ ହେବା ବିଭାଗୀୟ କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଖଣି ବିଭାଗ ପାଖରେ ଷ୍ଟେଟ ଲେବଲ ଏନଫୋର୍ସମେଣ୍ଟ ସ୍କ୍ବାଡ, ଡିିଷ୍ଟ୍ରିକ୍ଟ ଲେବଲ ଟାସ୍କ ଫୋର୍ସ, ଯୋଡ଼ା ଖଣି ବିଭାଗ ଟିମ୍ ଥାଇ ମଧ୍ୟ ସରକାରୀ କାର୍ଯ୍ୟାଳୟ ପଛ ପଟୁ କିପରି ଚୋରି ସମ୍ଭବ ତାହା ଚର୍ଚ୍ଚାର ବିଷୟ। ତେବେ ଏକ ନିର୍ଭରଯୋଗ୍ୟ ସୂତ୍ରରୁ ମିଳିଥିବା ତଥ୍ୟ ଅନୁଯାୟୀ, ଖଣି ଉପ ନିର୍ଦ୍ଦେଶାଳୟ କାର୍ଯ୍ୟାଳୟରେ ଜବତ ହୋଇ ପଡ଼ିଥିବା ମାଙ୍ଗାନିଜ ପଥରକୁ ଅଖାରେ ଭର୍ତ୍ତି କରି ସେଠାରୁ ଚୋରି କରି ନିଆଯାଉଛି। ଏହାର ଅଧିକ ତଦନ୍ତ କରାଗଲେ ବହୁ ରହସ୍ୟ ଉନ୍ମୋଚିତ ହୋଇପାରନ୍ତା।
