ବରଗଡ଼,୬।୧(ପ୍ରେମାନନ୍ଦ ଖମାରୀ): ଆଉ ୨ସପ୍ତାହ ପରେ ବରଗଡ଼ ଜିଲାରେ ଖରିଫ୍ ଧାନ ସଂଗ୍ରହ ପ୍ରକ୍ରିୟାକୁ ୨ମାସ ବିତିବ। ହେଲେ ଜିଲାରେ ଧାନ କିଣାବିକା ସମସ୍ୟା ଅସମାହିତ ରହିଛି। ଟୋକନ ସମସ୍ୟାକୁ ନେଇ ଚାଷୀମାନେ ମଣ୍ଡିକୁ ଧାନ ଆଣିପାରୁ ନଥିବାବେଳେ ମଣ୍ଡିକୁ ଆସିଥିବା ଧାନ ମଧ୍ୟ ଠିକ୍ଭାବେ ଉଠାଣ କରାଯାଉ ନଥିବାବେଳେ କଟ୍ନୀଛଟ୍ନୀ ଜୋର୍ ଧରିଛି। ଏଭଳି ସ୍ଥିତିରେ ପୂର୍ବ ଘୋଷଣା ଅନୁଯାୟୀ, ସୋମବାରରୁ ବିଭିନ୍ନ ଦାବି ନେଇ ମଣ୍ଡିଗୁଡ଼ିକରୁ ଧାନ ଉଠାଣ ପ୍ରକ୍ରିୟାକୁ ବନ୍ଦ କରି ଦେଇଛନ୍ତି। ଫଳରେ ପୂର୍ବାପେକ୍ଷା ଜିଲାର ଧାନ ସଂଗ୍ରହ ପ୍ରକ୍ରିୟା ଆହୁରି ଜଟିଳ ହୋଇପଡ଼ି ଥିବାବେଳେ ଚାଷୀଙ୍କ ଚିନ୍ତା ବଢ଼ିଯାଇଛି।
ଜିଲାରେ ଗତ ନଭେମ୍ବର ୧୮ତାରିଖରୁ ଖରିଫ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଛି। ଆରମ୍ଭରୁ ଧାନବିକ୍ରିରେ ଚାଷୀମାନଙ୍କୁ ବିଭିନ୍ନ ସମସ୍ୟାରେ ଛନ୍ଦି ହେବାକୁ ପଡ଼ିଛି। କେତେବେଳେ ଟୋକନ ସମସ୍ୟା ତ ଆଉକେବେ ମଣ୍ଡିରୁ ଧାନ ଉଠାଣରେ ମନ୍ଥରତା ଯୋଗୁ ଅନେକ ଚାଷୀ ଏପର୍ଯ୍ୟନ୍ତ ସେମାନଙ୍କ ଅମଳ ଧାନ ବିକ୍ରି କରି ପାରିନାହାନ୍ତି। ଅନ୍ୟପଟେ ନିଜ ପରିବାର ଗୁଜୁରାଣ ମେଣ୍ଟାଇବା ପାଇଁ କେତେକ ଚାଷୀ ବାଧ୍ୟ ହୋଇ ବେପାରୀ ହାତକୁ ଧାନ ଟେକିଦେବା ସାଧାରଣରେ ଆଲୋଚିତ ହୋଇଛି। ଏଭଳି ସ୍ଥଳେ ରାଜ୍ୟ ସରକାରଙ୍କ ପ୍ରତି ଚାଷୀଙ୍କ ବିଷୋଦ୍ଗାର ପରିଲକ୍ଷିତ ହୋଇଥିବାବେଳେ ଆନ୍ଦୋଳନ ପାଇଁ ଚାଷୀ ସଙ୍ଗଠନଗୁଡ଼ିକ ପୁଣି ପ୍ରସ୍ତୁତି ଆରମ୍ଭ କରି ଦେଇଛନ୍ତି। ଅପରପକ୍ଷେ ମିଲର୍ସଙ୍କ ଦ୍ୱାରା ଆରମ୍ଭ ହୋଇଥିବା ମଣ୍ଡିରୁ ଧାନ ଉଠାଣ ବନ୍ଦ ରାଜ୍ୟ ସରକାରଙ୍କୁ ଅଡୁଆରେ ପକାଇ ଦେଇଛି।
ଜିଲାରେ ଖରିଫ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେବା ପୂର୍ବରୁ ଅଲ୍ ଓଡ଼ିଶା ମିଲର୍ସ ଆସୋସିଏଶନ ବରଗଡ଼ରେ ଏକ ଖବରଦାତା ସମ୍ମିଳନୀ କରିଥିଲା। କଷ୍ଟମ ମିଲିଂ ଚାର୍ଜ ବୃଦ୍ଧି, ଧାନ ସଂରକ୍ଷଣ ଓ ରକ୍ଷଣାବେକ୍ଷଣର ଖର୍ଚ୍ଚ ପ୍ରଦାନ, ଧାନ ପରିବହନ ଖର୍ଚ୍ଚ ପ୍ରଦାନ, ମିଲ୍ ଗୋଦାମରେ ଗଚ୍ଛିତ ଚାଉଳ ଉଠାଣ ନେଇ ଆସୋସିଏଶନ ଦାବି କରିଥିଲା ଏବଂ ରାଜ୍ୟ ସରକାରଙ୍କୁ ଏ ନେଇ ଲେଖି ଜଣାଇଥିଲା। ତେବେ ସେତେବେଳେ ରାଜ୍ୟ ସରକାର ଓ ମିଲର୍ସ ଆସୋସିଏଶନ ମଧ୍ୟରେ ଆଲୋଚନା ହୋଇଥିଲା ଏବଂ ଦାବି ପୂରଣ ନେଇ ଆଶ୍ୱାସନା ମିଳିବା ପରେ ମିଲର୍ସମାନେ ଧାନ ଉଠାଣ ନେଇ ରାଜ୍ୟ ସରକାରଙ୍କ ଖାଦ୍ୟ ଯୋଗାଣ, ଖାଉଟି କଲ୍ୟାଣ ବିଭାଗ ସହିତ ଚୁକ୍ତିନାମା କରିଥିଲେ। ମାତ୍ର ଆଲୋଚନାର ଦୀର୍ଘଦିନ ପରେ ମଧ୍ୟ ମିଲର୍ସଙ୍କ ଦାବି ପୂରଣ ନ ହେବାରୁ ଗତ ୧ତାରିଖ ଅଲ୍ ଓଡ଼ିଶା ମିଲର୍ସ ଆସୋସିଏଶନ ପୁଣି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ମନ୍ତ୍ରୀଙ୍କୁ ଲେଖି ଜଣାଇଥିଲା ଏବଂ ୩ତାରିଖ ସୁଦ୍ଧା ଦାବି ପୂରଣ ନହେଲେ ୫ତାରିଖରୁ ମଣ୍ଡିରୁ ଧାନ ଉଠାଇବେ ନାହିଁ ବୋଲି ମିଲର୍ସ ଆସୋସିଏଶନ ଚେତାବନୀ ଦେଇଥିଲା। ଏହି କ୍ରମରେ ମିଲର୍ସ ଆସୋସିଏଶନ ମଣ୍ଡିରୁ ଧାନ ଉଠାଣ ପ୍ରକ୍ରିୟାକୁ ବନ୍ଦ କରିଦେଇଛି।
