ବାରିପଦା, ୭।୧(ନୀଳାଦ୍ରି ବିହାରୀ ଦଣ୍ଡପାଟ): ମୟୂରଭଞ୍ଜ ଜିଲା କରଞ୍ଜିଆ ବ୍ଲକ କୁଶପଦା ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ପୁଅର ଆକ୍ରମଣରେ ବାପା ସହ ପଡୋଶୀଙ୍କ ମୃତ୍ୟୁ ଘଟିଛି । ଏହା ସହିତ ଜଣେ ଗୁରୁତର ହୋଇ କରଞ୍ଜିଆ ଡାକ୍ତରଖାନାରେ ଚିକିତ୍ସାଧିନ ଅଛନ୍ତି । ଖବରପାଇ ପୋଲିସ ଘଟଣା ସ୍ଥଳରେ ପହଞ୍ଚି ଶବ ଦ୍ବୟକୁ ଜବତ କରିବା ସହିତ ଅଭିଯୁକ୍ତ ମଂଟୁ ପାତ୍ରକୁ ଅଟକ ରଖି ପଚରାଉଚୁରା ଜାରି ରଖିଛି । ମୃତକ ଦ୍ବୟ ହେଲେ ଅଭିଯୁକ୍ତର ବାପା ପ୍ରଫୁଲ୍ଲ ପାତ୍ର ଓ ଗଣେଶ୍ବର ପାତ୍ର ।
ସୂଚନାଯୋଗ୍ୟ, ବୁଧବାର ସନ୍ଧ୍ୟାରେ ମଂଟୁ କୌଣସି କାରଣକୁ ନେଇ ଉତକ୍ଷିପ୍ତ ହୋଇପଡିଥିଲା । ଏକ ଧାରୁଆ ଅସ୍ତ୍ରରେ ବାପା ପ୍ରଫୁଲ୍ଲ ପାତ୍ରକୁ ହାଣିଥିଲେ । ଏହି ଘଟଣାକୁ ପଡୋଶୀ ଗଣେଶ୍ବର ପାତ୍ର ଦେଖି ଦେବାରୁ ତାକୁ ମଧ୍ୟ ହାଣି ହତ୍ୟା କରିଥିଲେ। ତେବେ ଏହାକୁ ବିରୋଧ କରିବାକୁ ଯାଇଥିବା ଗଣେଶ୍ବରଙ୍କ ପୁଅ ମଧ୍ୟ ଆକ୍ରମଣର ଶିକାର ହୋଇଥିବା ଜଣାପଡ଼ିଛି । ତେବେ ସେ ବର୍ତ୍ତମାନ ଡାକ୍ତରଖାନାରେ ଚିକିତ୍ସାଧିନ ଅଛନ୍ତି । ରକ୍ତ ଜୁଡୁବୁଡୁ ଅବସ୍ଥାରେ ପ୍ରଫୁଲ୍ଲ ଓ ଗଣେଶ୍ବର ଦୁହେଁ ଘଟଣା ସ୍ଥଳରେ ମୃତ୍ୟୁ ବରଣ କରିଥିଲେ । ଏଭଳି ଲୋମହର୍ଷଣ ଘଟଣାକୁ ନେଇ ଅଂଚଳରେ ଭୟର ବାତାବରଣ ଖେଳିଯାଇଛି । ଆକ୍ରମଣକାରୀକୁ ଗ୍ରାମବାସୀ ଅଟକ ରଖି ପୋଲିସକୁ ଖବର ଦେଇଥିଲେ । ତେବେ ଅଭିଯୁକ୍ତ ଜଣକ ମାନସିକ ବିକୃତି ଥିବାରୁ ଏଭଳି ଘଟଣା ଘଟିଛି ବୋଲି ଅଂଚଳରେ ଆଲୋଚନା ହେଉଛି ।
