ନାପିତ୍ୱ,୧।୨: ମ୍ୟାନ୍ମାର୍ରେ ସୈନ୍ୟ ବାହିନୀ ପକ୍ଷରୁ କ୍ଷମତା ଦଖଲ କରାଯାଇଛି। ଦେଶର ସର୍ବୋଚ୍ଚ ନେତା ଷ୍ଟେଟ୍ କାଉନସିଲର ଆଙ୍ଗ ସାନ୍ ସୁକି, ରାଷ୍ଟ୍ରପତି ଓ୍ବିନ୍ ମିଣ୍ଟ୍ ଏବଂ ଶାସକ ଦଳର ବରିଷ୍ଠ ନେତାଙ୍କୁ ଅଟକ ରଖାଯାଇଛି। ବର୍ଷେ ପାଇଁ ଦେଶରେ ଜରୁରିକାଳୀନ ସ୍ଥିତି ଜାରି କରାଯାଇଛି। ଏନେଇ ଶାସକ ଦଳର ଜଣେ ପ୍ରବକ୍ତା ସୋମବାର ସୂଚନା ଦେଇଛନ୍ତି। ଦେଶର ରାଜନୈତିକ ନେତାଙ୍କ ଘରେ ସକାଳୁ ଚଢ଼ାଉ ଆରମ୍ଭ କରାଯାଇଥିବା ପ୍ରବକ୍ତା କହିଛନ୍ତି। ଏବେ ଦେଶର ସମସ୍ତ ବ୍ୟବସ୍ଥା ଉପରେ ସୈନ୍ୟ ବାହିନୀର ନିୟନ୍ତ୍ରଣ ରହିବ ବୋଲି ସୈନ୍ୟ ବାହିନୀର ଟେଲିଭିଜନ ପକ୍ଷରୁ କୁହାଯାଇଛି। କମାଣ୍ଡର୍-ଇନ୍-ଚିଫ୍ ମିନ୍ ଅଙ୍ଗ୍ ହ୍ଲିଙ୍ଗ୍ ଏବେ ଦେଶର ସର୍ବୋଚ୍ଚ କ୍ଷମତା ଦାୟିତ୍ୱରେ ରହିଛନ୍ତି। ବିଭିନ୍ନ ଅଞ୍ଚଳରେ ସୈନ୍ୟ ବାହିନୀକୁ ମୁତୟନ କରାଯାଇଛି। ଦେଶରେ ହୋଇଥିବା ସାଧାରଣ ନିର୍ବାଚନରେ ଅନୈତିକ ଉପାୟ ଅବଲମ୍ବନ କରାଯାଇଥିବା ଅଭିଯୋଗକ୍ରମେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ମୁଖ୍ୟ ସହର ରାଜଧାନୀ ୟାଙ୍ଗୁନର ସିଟି ହଲ ସମ୍ମୁଖରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ମୋବାଇଲ୍ ଏବଂ ଇଣ୍ଟରନେଟ୍ ସେବାକୁ ବନ୍ଦ କରି ଦିଆଯାଇଛି। ମ୍ୟାନ୍ମାର୍ରେ ୧୯୬୨ଠାରୁ ୨୦୧୧ ପର୍ଯ୍ୟନ୍ତ ସାମରିକ ଶାସନ ଜାରି ରହିଥିଲା। ୨୦୧୦ରେ ସାଧାରଣ ନିର୍ବାଚନ ପରେ ଦେଶରେ ୨୦୧୧ଠାରୁ ଗଣତାନ୍ତ୍ରିକ ସରକାର କାର୍ଯ୍ୟ କରୁଥିଲା।
