ମାଲକାନଗିର,୧୧।୬(ଡି.ଏନ୍.ଏ.): ମାଓବାଦୀଙ୍କୁ ଦମନ କରିବା ପାଇଁ ଡ୍ରୋନ୍ ମାଧ୍ୟମରେ ସୁରକ୍ଷା ବଳ ମାଓବାଦୀଙ୍କ ଉପରେ ନଜର ରଖୁଥିଲେ। ବର୍ତ୍ତମାନ ମାଓବାଦୀମାନେ ମଧ୍ୟ ଏହି ଡ୍ରୋନ୍ର ବ୍ୟବହାରକରି ସୁରକ୍ଷା ବଳ ଉପରେ ନଜର ରଖିବା ସହ ସେମାନଙ୍କ ସର୍ଚ୍ଚ ଅପରେଶନ ଉପରେ ମଧ୍ୟ ନଜର ରଖିବ ବୋଲି ସୂଚନା ମିଳିଛି। ପ୍ରାଥମିକ ଅନୁସନ୍ଧାନରୁ ଜଣାପଡ଼ିଛି, ଛତିଶଗଡ଼ ବସ୍ତରରେ କାର୍ଯ୍ୟ କରୁଥିବା ମାଓବାଦୀ ସଙ୍ଗଠନ ନିକଟରେ ୧୦ରୁ ଅଧିକ ଡ୍ରୋନ୍ ରହିଛି। ଯେଉଁଥିରେ ସେମାନେ ସୁରକ୍ଷା ବଳ ଉପରେ ନଜର ରଖି ସେମାନଙ୍କୁ ଟାର୍ଗେଟ କରୁଛନ୍ତି। କେବଳ ଏହି ସ୍ଥାନ ନୁହେଁ, ଛତିଶଗଡ଼ ଓ ତେଲଙ୍ଗାନାର ବିଭିନ୍ନ ମାଓବାଦୀ ସଙ୍ଗଠନ ପାଖରେ ଏହି ଡ୍ରୋନ୍ ଥିବା ସୂଚନା ମିଳିଛି। ତେବେ ବିଶେଷଜ୍ଞଙ୍କ କହିବା ଅନୁଯାୟୀ, ମାଓବାଦୀମାନେ ବ୍ୟବହାର କରୁଥିବା ଡ୍ରୋନ୍ ଅନ୍ଲାଇନରେ ସହଜରେ ଉପଲବ୍ଧ ହେଉଥିବାରୁ ସେମାନେ ଏହାକୁ ସହଜରେ ଆଣି ବ୍ୟବାହର କରିପାରୁଛନ୍ତି। ଡ୍ରୋନ୍ କ୍ରୟ ଏବଂ ବିକ୍ରୟ ସମ୍ବନ୍ଧୀୟ ନୀତି ସ୍ଥିର ହୋଇ ନ ଥିବାରୁ ମାଓବାଦୀମାନେ ଏହାର ଫାଇଦା ନେଉଛନ୍ତି। ତେବେ ଛତିଶଗଡ଼ର ବରିଷ୍ଠ ପୋଲିସ ଅଧିକାରୀ ମଧ୍ୟ ଏ ବିଷୟରେ ଚିନ୍ତିତ ଥିବା ଦେଖିବାକୁ ମିଳିଛି। ବିଗତ କିଛିଦିନ ପୂର୍ବରୁ ଛତିଶଗଡ଼ର ସୁକ୍ମା, ବିଜାପୁର ଏବଂ ନାରାୟଣପୁରରେ ସୁରକ୍ଷା ବାହିନୀ କ୍ୟାମ୍ପ ନିକଟରେ ଅନେକ ଥର ଡ୍ରୋନ୍ ଉଡୁଥିବା ଦେଖିବାକୁ ମିଳିଥିଲା। ଏହା ବ୍ୟତୀତ ଯେତେବେଳେ ତେଲଙ୍ଗାନାର ଚେର୍ଲା ନିକଟରେ ମାଓବାଦୀ କ୍ୟୁରିଅର ନାଗେଶ୍ୱରା ରାଓ, ମଲ୍ଲିକାର୍ଜୁନା ରାଓ ଏବଂ ପଙ୍ଗୁଲୁ ଉମାଶଙ୍କରଙ୍କୁ ପୋଲିସ ଗିରଫ କଲା, ସେତେବେଳେ ସେମାନଙ୍କଠାରୁ ଏକ ଡ୍ରୋନ୍ ମଧ୍ୟ ଜବତ କରାଯାଇଥିଲା। ଏଥିରୁ ସ୍ପଷ୍ଟ ହୋଇଛି, ମାଓବାଦୀମାନେ ବର୍ତ୍ତମାନ ସୁରକ୍ଷା ବାହିନୀକୁ ଚ୍ୟାଲେଞ୍ଜ କରିବା ପାଇଁ ଡ୍ରୋନ୍ ବ୍ୟବହାର କରୁଛନ୍ତି।
ସୂଚନାଯୋଗ୍ୟ, ଗତ ୭ ତାରିଖରେ ତେଲଙ୍ଗାନା ପୋଲିସ ୩ଜଣ ମାଓବାଦୀଙ୍କୁ ଗିରଫ କରିଥିଲା। ସେମାନଙ୍କ ନିକଟରୁ ଏକ ଡ୍ରେନ୍ ଜବତ କରାଯାଇଥିଲା।
