ଭଞ୍ଜନଗର,୨୬।୫(ବାବୁଲା ପ୍ରଧାନ):ଗଞ୍ଜାମ ଜିଲା ଘୁମୁସର ଭଞ୍ଜ ରାଜବଂଶର ସ୍ମୃତି ଭାବେ ପରିଚିତ କୁଲାଡ ଜଗନ୍ନାଥ ମନ୍ଦିର ୧୭୬୦ ମସିହାରେ ନିର୍ମାଣ ହୋଇଥିଲା। ସେ ସମୟରେ ମନ୍ଦିର ପରିଚାଳନା ପାଇଁ ଭଞ୍ଜ ରାଜବଂଶ ପକ୍ଷରୁ ହଜାର ହଜାର ଭରଣ ଜମି, କୋଟି କୋଟି ଟଙ୍କାର ଅଳଙ୍କାର ଦାନ କରାଯାଇଥିଲା । କିନ୍ତୁ ପର୍ଯ୍ୟାୟ କ୍ରମେ ଲୋକେ ମନ୍ଦିର ଜମିକୁ ଜବର ଦଖଲ କରିନେଲେ। ଏଥିସହ ମନ୍ଦିରର ଥିବା କୋଟି କୋଟି ଟଙ୍କାର ଅଳଙ୍କାର ୧୯୯୩ ମସିହାରେ ଚୋରି ହୋଇଗଲା।
ଚୋରି ଅଳଙ୍କାରକୁ ପୋଲିସ ଆଜି ପର୍ଯ୍ୟନ୍ତ ଉଦ୍ଧାର କରି ପାରିନାହିଁ। ତେଣୁ ସେହି ଦିନଠୁ ଠାକୁରଙ୍କ ସୁନା ବେଶ ଲୋକଙ୍କ ସହଯୋଗରେ ହେଉଛି। ସୁନା ବେଶ ଦିନ କିଛି ବଦାନ୍ୟ ବ୍ୟକ୍ତି ଏବଂ ସଂଘ ଅଳଙ୍କାର ଦାନ କରନ୍ତି। ଏହାପରେ ସୁନା ବେଶ ସରିଗଲା ପରେ ଅଳଙ୍କାର ସୁରକ୍ଷା ଦୃଷ୍ଟିରୁ ନିଜ ଅଧୀନକୁ ନେଇ ଯାଉଛନ୍ତି। ଏହିଭଳି ପରମ୍ପରା ଭକ୍ତଙ୍କ ଭାବନାକୁ ଆଘାତ ଦେଉଛି। ଅନ୍ୟପଟେ ମନ୍ଦିର ନାମରେ ଥିବା ଜମିରୁ ଖଜଣା ପ୍ରାୟ ଆସୁନାହିଁ। ଅଳ୍ପ କିଛି ଚାଷୀ ଖଜଣା ଦେଉଛନ୍ତି। ଯାହା ସମୁଦ୍ରକୁ ଶଙ୍ଖେ। ସେଥିରୁ ମନ୍ଦିର ପରିଚାଳନା କଷ୍ଟକର।
ତେଣୁ ନେତା, ଅଫିସର, ବ୍ୟବସାୟୀ ଏବଂ ସାଧାରଣ ଜନତାଙ୍କ ଦାନ ଅର୍ଥରେ ମନ୍ଦିର ପରିଚାଳନା ହେଉଛି। ଭଞ୍ଜ ରାଜବଂଶର ସ୍ମୃତି ଆଜି ଏଭଳି ଅବସ୍ଥାକୁ ନେଇ ଭକ୍ତ ମାନେ ଚିନ୍ତା ବ୍ୟକ୍ତ କରିଛନ୍ତି। ତେଣୁ ସରକାର ଏହିଭଳି ପୁରୁଣା ସ୍ମୃତି ମନ୍ଦିର ଗୁଡିକର ପରିଚାଳନା ପାଇଁ ସ୍ବତନ୍ତ୍ର କିଛି ପଦକ୍ଷେପ ନେବାର ଆବଶ୍ୟକତା ରହିଛି। ଇତିମଧ୍ୟରେ ରାଜ୍ୟ ସରକାରଙ୍କ ପକ୍ଷରୁ ୧ କୋଟି ୨୨ ଲକ୍ଷ ଟଙ୍କା ବ୍ୟୟରେ ମନ୍ଦିର ମରାମତି କରାଯାଇଛି । ଆଗକୁ ଜୁଲାଇ ୧୬ ତାରିଖରେ ରଥଯାତ୍ରା ପଡୁଛି। ତେଣୁ ରଥ ମରାମତି ଆବଶ୍ୟକ ଅଛି । ଏଥିସହ ମନ୍ଦିର ସମ୍ମୁଖ ଭାଗ ମଧ୍ୟ ଆଉ କିଛି ରଙ୍ଗ କାମ ଅଛି। ଏହିଭଳି ପରିସ୍ଥିତିରେ ମଙ୍ଗଳବାର ରଥ କିଭଳି ମରାମତି ହେବ ତାହାର ସମୀକ୍ଷା ମିଳିତ କମିଟି କରିଥିଲେ।
ଅତିରିକ୍ତ ତହସିଲଦାର ଅବିନାଶ କୁମାର ମାହାରଙ୍କ ନେତୃତ୍ୱରେ ଏକ ଟିମ ରଥର ସ୍ଥିତି ସମୀକ୍ଷା କରିଥିଲେ। ଏହି ସମୟରେ ରଥର କିଛି ଚକ ଓ ଅଖକୁ ବଦଳାଇବା ପାଇଁ କମିଟି ପରାମର୍ଶ ଦେଇଥିଲେ। ଏହାପରେ ବନ ବିଭାଗ ସହଯୋଗରେ ତାହାର ମରାମତି କରାଯିବା ପାଇଁ ନିଷ୍ପତ୍ତି ହୋଇଥିଲା। ଏହି କମିଟିରେ ଅନ୍ୟ ମାନଙ୍କ ମଧ୍ୟରେ ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ଗୋପାଳ ଚନ୍ଦ୍ର ବେହେରା, ରାଜସ୍ବ ନିରୀକ୍ଷକ ଭଗବାନ ବେହେରା, ବନପାଳ ଶରତ କୁମାର ମହାନ୍ତି, ମନ୍ଦିର ପରିଚାଳନା କମିଟି ସଭାପତି ବ୍ରହ୍ମାନନ୍ଦ ଦାସ, ସମ୍ପାଦକ ସଞ୍ଜୟ ପ୍ରଧାନ, ମୁଖ୍ୟ ମହାରଣା ତ୍ରିନାଥ ମହାରଣା ପ୍ରମୁଖ ଉପସ୍ଥିତ ଥିଲେ।
ରଥଯାତ୍ରା ପାଇଁ ଆବଶ୍ୟକ ଅର୍ଥର ଅଭାବକୁ ଦେଖି ଗତବର୍ଷ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ଲକ୍ଷାଧିକ ଟଙ୍କା ଦାନ କରିଥିଲେ। ଫଳରେ ରଥଯାତ୍ରା ଆକର୍ଷଣୀୟ ହୋଇପାରିଥିଲା। ଏହାପରେ ଯାତ୍ରା ସମୟରେ ମୁଖ୍ୟ ସଡ଼କରେ ଯେଉଁ ବିଦ୍ୟୁତ ତାର ସମସ୍ୟା ରହିଥିଲା ତାହାକୁ ବିଧାୟକଙ୍କ ନିର୍ଦ୍ଦେଶକ୍ରମେ ଅଣ୍ଡର ଗ୍ରାଉଣ୍ଡ କରି ଦିଆଯାଇଛି। ଏହିଭଳି ଅନେକ ସମସ୍ୟା ବିଧାୟକଙ୍କ ସହଯୋଗରେ ସମାଧାନ ହୋଇପାରିଛି। ଚଳିତବର୍ଷ ମଧ୍ୟ ବିଧାୟକଙ୍କ ସହଯୋଗରେ ଯାତ୍ରା ଭଲରେ ହେବ ବୋଲି ଆଶା କରାଯାଉଛି।
ସୂଚନାଯୋଗ୍ୟ, କୁଲାଡ ଜଗନ୍ନାଥ ମନ୍ଦିର ଦେବୋତ୍ତର ବିଭାଗ ଅଧୀନରେ ପରିଚାଳିତ ହେଉଛି। ତେଣୁ ଭଞ୍ଜନଗର ଉପଜିଲାପାଳ ତାହାର ମୁଖ୍ୟ ଦାୟିତ୍ୱରେ ଅଛନ୍ତି। ଉପଜିଲାପାଳ ଉମାଶଙ୍କର ବେହେରାଙ୍କ ନିର୍ଦ୍ଦେଶ କ୍ରମେ ତହସିଲଦାର ଏବଂ ଅତିରିକ୍ତ ତହସିଲଦାର ଯାତ୍ରା କିଭଳି ସଫଳତାର ସହ ହୋଇପାରିବ ତାହାର କାର୍ଯ୍ୟ ତଦାରଖ କରୁଛନ୍ତି। ଏଥିସହ ଗତବର୍ଷ ଠାରୁ ମନ୍ଦିର ପରିଚାଳନାରେ ସହଯୋଗ କରିବା ପାଇଁ ଏକ କମିଟି ମଧ୍ୟ ଗଠନ କରାଯାଇଛି ।
Dharitri – Odisha’s No.1 Odia Daily
