କୁଜଙ୍ଗ,୭ା୬ (ଡି.ଏନ୍.ଏ.):ଜଗତ୍ସିଂହପୁର ଜିଲା ଏରସମା ତହସିଲ ଅନ୍ତର୍ଗତ ପ୍ରସ୍ତାବିତ ଜେଏସ୍ଡବ୍ଲ୍ୟୁ ପ୍ରକଳ୍ପ ଅଞ୍ଚଳର ଢିଙ୍କିଆ ଗ୍ରାମକୁ ସୋମବାର ନର୍ମଦା ବଞ୍ଚାଅ ଆନ୍ଦୋଳନର ନେତ୍ରୀ ମେଧା ପାଟେକର ଆସିଥିଲେ। ଏହି ସମୟରେ ପ୍ରକଳ୍ପ ସପକ୍ଷବାଦୀଙ୍କ ବିରୋଧ ଯୋଗୁ ସେ ଗଁା ମୁଣ୍ଡରୁ ଫେରିଯିବାକୁ ବାଧ୍ୟ ହୋଇଛନ୍ତି। ଏହି ଅଞ୍ଚଳରେ ମାନବାଧିକାର ଉଲ୍ଲଂଘନ ହେଉଥିବା ଅଭିଯୋଗକୁ ଭିତ୍ତିକରି ମେଧାଙ୍କ ନେତୃତ୍ୱରେ ଏକ ପ୍ରତିନିଧିମଣ୍ଡଳୀ ସ୍ଥିତି ଅନୁଧ୍ୟାନ ପାଇଁ କୁଜଙ୍ଗ ଆସିଥିଲେ। ଏଥିରେ ସମାଜବାଦୀ ପାର୍ଟିର ସାଧାରଣ ସମ୍ପାଦକ ସୁଦର୍ଶନ ପ୍ରଧାନ, ଚାଷୀ ନେତା ଲିଙ୍ଗରାଜ ଓ ପ୍ରଫେସର ମନୋରଞ୍ଜନ ମହାନ୍ତି ସାମିଲ ହୋଇଥିଲେ। ସେମାନେ ପ୍ରଥମେ ସ୍ଥାନୀୟ ସବ୍ଜେଲ୍ରେ ବନ୍ଦୀ ଜୀବନ କାଟୁଥିବା ପ୍ରକଳ୍ପ ବିରୋଧୀ ନେତା ଦେବେନ୍ଦ୍ର ସ୍ବାଇଁଙ୍କୁ ଭେଟିଥିଲେ। ଏହାପରେ ସେମାନେ ଢିଙ୍କିଆ ଗ୍ରାମ ଅଭିମୁଖେ ଯାଇଥିଲେ। ଏ ସମ୍ପର୍କରେ କୌଣସି ସୂତ୍ରରୁ ଖବରପାଇ ପ୍ରକଳ୍ପ ସପକ୍ଷବାଦୀମାନେ ଢିଙ୍କିଆର ପାଟଣାପଟ ଗଁା ମୁଣ୍ଡରେ ସେମାନଙ୍କୁ ଅଟକାଇଥିଲେ।
ଗ୍ରାମବାସୀଙ୍କ ପକ୍ଷରୁ ଢିଙ୍କିଆ ଗ୍ରାମ୍ୟ କମିଟି ସଭାପତି ନୃସିଂହ ରାଉତ, ଉପଦେଷ୍ଟା ନିର୍ଭୟ ସାମନ୍ତରାୟ, ପୂର୍ବତନ ସରପଞ୍ଚ ଶିଶିର ମହାପାତ୍ର, ଅକ୍ଷୟ ବେହେରା, ଅକ୍ଷୟ ଦାସ, ସଂଗ୍ରାମ ସ୍ବାଇଁ, ଦେବଦତ୍ତ ସ୍ବାଇଁ ପ୍ରମୁଖ ଏହି ବିରୋଧର ନେତୃତ୍ୱ ନେଇଥିଲେ। କମିଟି ଉପଦେଷ୍ଟା ସାମନ୍ତରାୟ କହିଥିଲେ, ଆମେ ମେଧାଙ୍କୁ ବିରୋଧ କରୁନାହୁଁ। ମାତ୍ର ସମାଜବାଦୀ ପାର୍ଟିର ନେତା ପ୍ରଧାନ ଅତୀତରେ ଏହି ଗ୍ରାମକୁ ଆସି କେତେଜଣ ଲୋକଙ୍କୁ ମତାଇ ଠେଙ୍ଗା ରାଲି ବାହାର କରିଥିଲେ। ଏନେଇ ଗାଁରେ ଅଶାନ୍ତ ବାତାବରଣ ସୃଷ୍ଟି ହୋଇଥିଲା। ଏବେ ଆମ ଭିତରେ ଭାଇଚାରା ଫେରିଆସିଛି। ଆମେ ଆଉ ବାହାର ଲୋକଙ୍କୁ ଗାଁରେ ପୂରାଇ ଅଶାନ୍ତ ବାତାବରଣ ସୃଷ୍ଟି କରିବାକୁ ଚାହୁଁନାହୁଁ। ତେଣୁ ଆପଣମାନେ ଫେରିଯାଆନ୍ତୁ। ମେଧା କହିଥିଲେ, ମୁଁ ଏଠାକୁ ଜେଲ୍ରେ ଥିବା ସ୍ବାଇଁଙ୍କ ପରିବାରକୁ ଭେଟିବାକୁ ଆସିଛି। ମାତ୍ର ଗ୍ରାମବାସୀ ତାଙ୍କୁ ଭିତରକୁ ଛାଡ଼ି ନ ଥିଲେ। ପୂର୍ବତନ ସରପଞ୍ଚ ଶିଶିର ମହାପାତ୍ର କହିଥିଲେ, ଆମ ଜୀବନ ଜୀବିକାର ମୂଳ ଉତ୍ସ ପାନ ବରଜ କାରଖାନା ଉଦ୍ଦେଶ୍ୟରେ ଭାଙ୍ଗି ସାରିଛୁ। ସେଥିପାଇଁ କ୍ଷତିପୂରଣ ପାଇସାରିଛୁ। ଅନ୍ୟପକ୍ଷରେ ପାନ ବରଜରେ କାମ କରୁଥିବା ଶ୍ରମିକମାନେ ସେମାନଙ୍କର ଦଶ ବର୍ଷର ଭତ୍ତା ପାଇସାରିଛନ୍ତି। ଏହାଛଡ଼ା ଜଳବାୟୁ ପରିବର୍ତ୍ତନ ଯୋଗୁ ସମୁଦ୍ରପତ୍ତନ ବୃଦ୍ଧି ପାଇ ଏଠାକାର ଚାଷଜମିକୁ ଲବଣାକ୍ତ କରିଦେଇଛି। ଫଳରେ ଚାଷ ସମ୍ଭବ ନୁହେଁ, ଏହାକୁ ଦୃଷ୍ଟିରେ ରଖି ବିକଳ୍ପ ଜୀବିକା ନିମନ୍ତେ କାରଖାନା ହେଲେ ଆମେ ନିଯୁକ୍ତି ପାଇବୁ ବୋଲି ଯୁକ୍ତିରେ ସେ ଦର୍ଶାଇଥିଲେ। ଏ ପ୍ରସଙ୍ଗରେ ମେଧା କହିଥିଲେ, ଆପଣମାନଙ୍କୁ ଯଦି ସବୁ ଠିକ୍ଠାକ୍ ଲାଗୁଛି, ତାହା ହେଲେ ମୁଁ ଏଥିସହ ଏକମତ। ହେଲେ ପରବର୍ତ୍ତୀ ସମୟରେ ଅସୁବିଧାର ସମ୍ମୁଖୀନ ହେଲେ କିଛି କରାଯାଇପାରିବ ନାହିଁ। ଅତୀତରେ ଏଭଳି ବହୁ ଘଟଣା ନଜିର ରହିଛି। କିଛି କମ୍ପାନୀ ନିଯୁକ୍ତି ପ୍ରତିଶ୍ରୁତି ଦେଇ ପରେ ଓହରି ଯାଇଛନ୍ତି। ଫଳରେ ସେଠାରେ ଲୋକେ ଆନ୍ଦୋଳନକୁ ଓହ୍ଲାଇଛନ୍ତି। ଏଥିପାଇଁ ଯତ୍ନବାନ ହେବାକୁ ସେ ପରାମର୍ଶ ଦେଇ ଫେରିଯାଇଥିଲେ।
ଅପରପକ୍ଷେ ମେଧାଙ୍କ ଆସିବା ଖବରପାଇ କେତେଜଣ ଲୋକ ଢିଙ୍କିଆର ତ୍ରିଲୋଚନପୁର ପଟ ଗଁା ମୁଣ୍ଡରେ ଜଗିଥିଲେ। ସେଠାରେ ଢିଙ୍କିଆର ଗୀତାଞ୍ଜଳି ଦାସ ପହଞ୍ଚତ୍ ରୁଣ୍ଡ ହୋଇଥିବା ଲୋକଙ୍କୁ ବିରୋଧ କରିବା ସହ ମାହାଳର ଜଣେ ବ୍ୟକ୍ତିଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ଏନେଇ ଅଭୟଚାନ୍ଦପୁର ଥାନାରେ ଖବର ଦିଆଯାଇଥିବା ପରେ ପୋଲିସ ପହଞ୍ଚତ୍ ଦାସଙ୍କୁ ଗିରଫ କରି କୋର୍ଟ ଚାଲାଣ କରିଛି।
