ନୂଆଦିଲ୍ଲୀ,୨ା୮: ରାଜ୍ୟଗୋଷ୍ଠୀ କ୍ରୀଡ଼ାରେ ସଫଳ ପ୍ରଦର୍ଶନ ପରେ ଓ୍ବେଟଲିଫ୍ଟର ମୀରାବାଈ ଚାନୁ, ଲଭପ୍ରୀତ ସିଂଙ୍କ ସମେତ ଭାରତୀୟ ଖେଳାଳିଙ୍କ ପ୍ରଥମ ବ୍ୟାଚ୍ ରବିବାର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚିଛି। ସେମାନଙ୍କୁ ଶତାଧିକ ପ୍ରଶଂସକଙ୍କ ଉପସ୍ଥିତିରେ ସ୍ବାଗତ ସମ୍ବର୍ଦ୍ଧନା ଦିଆଯାଇଥିଲା।
୪୯ କେଜି କାଟେଗୋରିରେ କ୍ରମାଗତ ତୃତୀୟ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ଜିତିଥିବା ଅଲିମ୍ପିକ୍ ପଦକଧାରୀ ମୀରାବାଈ କହିଛନ୍ତି, ମଣିପୁରରୁ ଆସି ଦେଶ ପାଇଁ କିଛି ଭଲ କରିପାରିଥିବାରୁ ଗର୍ବିତ। ସେହିଭଳି ପୁରୁଷ ୧୧୦ରୁ ଊର୍ଦ୍ଧ୍ୱ କାଟେଗୋରିରେ ମାତ୍ର ୧ କେଜି ଓଜନ ବ୍ୟବଧାନରେ ସ୍ବର୍ଣ୍ଣ ପଦକ ହାତଛଡ଼ା କରିଥିବା ଲଭପ୍ରୀତ ସ୍ବର୍ଣ୍ଣ ପଦକ ନ ଜିତିବା ସମ୍ପର୍କରେ ପ୍ରକାଶ କରିଛନ୍ତି, ଖେଳରେ ଏମିତି ହୁଏ। କିନ୍ତୁ ମୁଁ କରିଥିବା କଠିନ ପରିଶ୍ରମର ଫଳ ମିଳିଛି। ଯେତେବେଳେ ଦୁଇ ଖେଳାଳି ମୁକାବିଲା କରନ୍ତି, ଜଣଙ୍କୁ ହାରିବାକୁ ପଡ଼େ। ମୁଁ ଏବେ ଏସିଆନ ଗେମ୍ସ ଲାଗି ପ୍ରସ୍ତୁତି କରିବି। ସ୍ବାଗତ ସମ୍ବର୍ଦ୍ଧନା ପ୍ରତି ଖୁସି ବ୍ୟକ୍ତି କରି ମହିଳା ୫୮ କେଜି ବର୍ଗରେ ବ୍ରୋଞ୍ଜ ପଦକ ଜିତିଥିବା ବିନ୍ଦ୍ୟାରାଣୀ ଦେବୀ ସୋରୋଖାଇବାମ କହିଛନ୍ତି, ସମସ୍ତେ ଆମକୁ ଏଭଳି ସ୍ବାଗତ କରୁଥିବା ଦେଖି ଖୁବ୍ ଖୁସି ଲାଗୁଛି। ଘର ଭଳି ଅନୁଭୂତି ଦେବା ପାଇଁ ସଭିଙ୍କୁ ଧନ୍ୟବାଦ୍। ଆଗାମୀ ପ୍ରତିଯୋଗିତା ପାଇଁ ମୁଁ ଏବେ ଅଧିକ କଠିନ ପରିଶ୍ରମ କରିବି।
ଉଲ୍ଲେଖଯୋଗ୍ୟ ଯେ, ଭାରତୀୟ ଭାରୋତ୍ତୋଳନମାନେ ମୋଟ ୮ଟି ପଦକ ଜିତିଛନ୍ତି, ଯେଉଁଥିରେ ୧ ସ୍ବର୍ଣ୍ଣ, ୬ ରୌପ୍ୟ ଓ ୧ ବ୍ରୋଞ୍ଜ ରହିଛି।
