ଭୁବନେଶ୍ୱର, ୨୪।୭(ବ୍ୟୁରୋ): ସରକାରୀ ଚାକିରିରେ ନିଯୁକ୍ତି ପାଇଁ ସର୍ବାଧିକ ବୟସସୀମା ୪୨ ବର୍ଷ ଧାର୍ଯ୍ୟ କରାଯାଉ। ରାଜ୍ୟରେ ୨୧ ବର୍ଷର ନିରଙ୍କୁଶ ଶାସନ ପରେ ମଧ୍ୟ ଯୁବପିଢ଼ି ନିଯୁକ୍ତି ନ ପାଇ ଦିଗହରା ହେବା ସହ ବେକାରି ସମସ୍ୟା ଦିନକୁ ଦିନ ଉକତ୍ଟ ହେବାରେ ଲାଗିଛି। ଓଡ଼ିଶା ପବ୍ଲିକ ସର୍ଭିସ କମିଶନ, ଓଡ଼ିଶା ସବ୍ ଅର୍ଡିନେଟ ଷ୍ଟାଫ୍ ସିଲେକଶନ କମିଶନ, ଓଡ଼ିଶା ଷ୍ଟାଫ୍ ସିଲେକଶନ କମିଶନ, ଷ୍ଟେଟ ସିଲେକଶନ ବୋର୍ଡ ନିୟମାନୁସାରେ ପ୍ରତିବର୍ଷ ଖାଲିଥିବା ପଦବୀଗୁଡ଼ିକୁ ପୂରଣ କରିବା କଥା। ମାତ୍ର ତାହା ନ ହେବା ଯୋଗୁ ବହୁ ଆଶାୟୀ ମେଧାବୀଙ୍କ ଉଜ୍ଜ୍ୱଳ ଭବିଷ୍ୟତ ଅନ୍ଧକାର ଆଡ଼କୁ ଠେଲି ହୋଇଯାଇଛି ବୋଲି ଯୁବକଂଗ୍ରେସ ସଭାପତି ସ୍ମୃତିରଞ୍ଜନ ଲେଙ୍କା ଅଭିଯୋଗ କରିଛନ୍ତି। କଂଗ୍ରେସ ଭବନଠାରେ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ସ୍ମୃତି କହିଛନ୍ତି, ଓଡ଼ିଶା ସରକାରୀ ଚାକିରି ପାଇଁ ଆଶାୟୀଙ୍କ ସର୍ବାଧିକ ବୟସସୀମା ୩୨ ବର୍ଷ ହୋଇଥିବା ଯୋଗୁ ବହୁ ମେଧାବୀ ସରକାରୀ ଚାକିରିରୁ ବଞ୍ଚିତ ହେଉଛନ୍ତି। ଦେଶର ଅନ୍ୟ କେତେକ ରାଜ୍ୟରେ ସରକାରୀ ଚାକିରି ପାଇଁ ସର୍ବାଧିକ ବୟସସୀମା ୪୦ ଉପରେ ରଖାଯାଇଛି। ଗୋଆରେ ୪୫, ଆସାମରେ ୪୪, ତେଲଙ୍ଗାନାରେ ୪୪, ଆନ୍ଧ୍ରରେ ୪୨, ଉତ୍ତରପ୍ରଦେଶ, ରାଜସ୍ଥାନ, ପଶ୍ଚିମବଙ୍ଗ ଓ ମଧ୍ୟପ୍ରଦେଶରେ ୪୦ ବର୍ଷ ରହିଛି। ତେଣୁ ପ୍ରଥମେ ରାଜ୍ୟରେ କେଉଁ ବିଭାଗରେ କେତେ ସଂଖ୍ୟାରେ ସରକାରୀ ଚାକିରି ପଦବୀ ଖାଲି ପଡ଼ିଛି ତାହାର ଶ୍ୱେତପତ୍ର ରାଜ୍ୟ ସରକାର ଜାରି କରନ୍ତୁ। ଦେଶର ଅଧିକାଂଶ ରାଜ୍ୟରେ ସରକାରୀ ନିଯୁକ୍ତି ବୟସସୀମା ବୃଦ୍ଧି ହୋଇସାରିଥିବା ବେଳେ ଆମ ରାଜ୍ୟରେ ନ ହେବାର ନିର୍ଦ୍ଦିଷ୍ଟ କାରଣ କ’ଣ ସରକାର କୁହନ୍ତୁ ବୋଲି ଯୁବ କଂଗ୍ରେସ ଦାବି କରିଛି। ଏନେଇ ସ୍ମୃତିଙ୍କ ନେତୃତ୍ୱରେ ଏକ ପ୍ରତିନିଧି ଦଳ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କୁ ଦାବିପତ୍ର ପ୍ରଦାନ କରିଛନ୍ତି।
