ଢେଙ୍କାନାଳ ଅଫିସ, ୧୨।୬ ଢେଙ୍କାନାଳର ପର୍ଯ୍ୟଟନସ୍ଥଳୀର ବିକାଶ ପାଇଁ ଖୁବ୍ଶୀଘ୍ର ମାଷ୍ଟର ପ୍ଲାନ୍ କରାଯିବ। ଜନପ୍ରତିନିଧି, ଜିଲାପାଳ, ରାଜ୍ୟସ୍ତରୀୟ ସଚିବମାନଙ୍କ ସହ ଏ ନେଇ ଆଲୋଚନା କରାଯିବ। ଏହାପରେ ପର୍ଯ୍ୟାୟକ୍ରମେ ପର୍ଯ୍ୟଟନସ୍ଥଳୀର ଉନ୍ନତୀକରଣ ହେବ। ସମସ୍ତଙ୍କ ସହଯୋଗରେ ଓଡ଼ିଆ ଭାଷା ଓ ସାହିତ୍ୟ ରୁଦ୍ଧିମନ୍ତ ହୋଇପାରିବ ବୋଲି କହିଛନ୍ତି ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଅଶ୍ୱିନୀ କୁମାର ପାତ୍ର। ସପ୍ତଶଯ୍ୟାସ୍ଥିତ କଳାକୃତି ଗ୍ରାମ ସଦେଇବେରେଣୀ-ନବଜୀବନପୁରରେ ଦୁଇଦିନ ଧରି ଚାଲିଥିବା ପ୍ରଥମ ସପ୍ତଶଯ୍ୟା ହସ୍ତଶିଳ୍ପ ଓ ସାଂସ୍କୃତିକ ମହୋତ୍ସବର ଶନିବାର ଉଦ୍ଯାପନୀ ସନ୍ଧ୍ୟାରେ ମୁଖ୍ୟ ଅତିଥି ଭାବେ ଯୋଗଦେଇ ମନ୍ତ୍ରୀ ଏହା କହିଛନ୍ତି।
ରାଜ୍ୟ ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ, ଓର୍ମାସ, ଜିଲା ପ୍ରଶାସନ ଏବଂ ଜିଲା ସଂସ୍କୃତି ପରିଷଦର ମିଳିତ ସହଯୋଗରେ ଆୟୋଜିତ ଏହି ମହୋତ୍ସବରେ ସମ୍ମାନିତ ଅତିଥି ଭାବେ ଯୋଗଦେଇ ପରଜଙ୍ଗ ବିଧାୟକ ଡା. ନୃସିଂହ ଚରଣ ସାହୁ କହିଲେ, ଢେଙ୍କାନାଳରେ କପିଳାସ, ସପ୍ତଶଯ୍ୟା, ଯୋରନ୍ଦା, କୁଅଁାଳୋ ଅଷ୍ଟଶମ୍ଭୁ ମନ୍ଦିର, ଅନନ୍ତଶୟନ, ଦଦରାଘାଟି, ଦଣ୍ଡାଧାର ଜଳଭଣ୍ଡାର ଭଳି ପ୍ରସିଦ୍ଧ ପର୍ଯ୍ୟଟନସ୍ଥଳୀ ରହିଛି। ଏହାକୁ ଆହୁରି ଆକର୍ଷଣୀୟ କରିବାକୁ ସେ ନିବେଦନ କରିଥିଲେ। ବିଧାୟକ ସୁଧୀର କୁମାର ସାମଲ କହିଲେ, ଡୋକ୍ରା ହସ୍ତଶିଳ୍ପ ପାଇଁ ପ୍ରସିଦ୍ଧ ନବଜୀବନପୁରରେ ଏଭଳି ମହୋତ୍ସବର ଆୟୋଜନ କରାଯିବା ସ୍ବାଗତଯୋଗ୍ୟ। ଏହାଦ୍ୱାରା ଜାତୀୟସ୍ତରରେ ପ୍ରସିଦ୍ଧି ଅର୍ଜନ କରିଥିବା ଡୋକ୍ରା ହସ୍ତଶିଳ୍ପର ପ୍ରଚାରପ୍ରସାର ହୋଇପାରିବ। ଜିଲାର ଐତିହ୍ୟସମ୍ପନ୍ନ ମଠମନ୍ଦିରଗୁଡ଼ିକର ବିକାଶ ପାଇଁ ରାଜ୍ୟ ସରକାର ୫୦ କୋଟି ଟଙ୍କା ଦେଇଛନ୍ତି। ପର୍ଯ୍ୟଟକଙ୍କ ସୁବିଧା ପାଇଁ ଗଁଦିଆ, ସପ୍ତଶଯ୍ୟାରେ ମୋବାଇଲ ଟାୱାର ସ୍ଥାପନ କରିବା ପାଇଁ ବିଧାୟକ ପ୍ରସ୍ତାବ ଦେଇଥିଲେ। ଜିଲାପାଳ ସରୋଜ କୁମାର ସେଠୀଙ୍କ ସଭାପତିତ୍ୱରେ ସମ୍ମାନିତ ଅତିଥି ଭାବେ ଜିଲା ପରିଷଦ ସଭାନେତ୍ରୀ ଅର୍ଚ୍ଚନା ପୁହାଣ, ସିଡିଏମ୍ଓ ଡା. ଅଶୋକ କୁମାର ଦାଶ ଉପସ୍ଥିତ ଥିଲେ।
ଏହି ଅବସରରେ ଜିଲା ପ୍ରଶାସନ ପକ୍ଷରୁ କାର୍ଯ୍ୟକାରୀ ହେଉଥିବା ବିଭିନ୍ନ ଉନ୍ନୟନମୂଳକ ଯୋଜନାକୁ ନେଇ ପ୍ରସ୍ତୁତ ପୁସ୍ତିକା ‘ମାଇଲ୍ସ ଟୁ ଗୋ’ ଉନ୍ମୋଚିତ ହୋଇଥିଲା। ସମାଜସେବା ପାଇଁ ଗଙ୍ଗାଧର ସାମଲ, ଡାକସେବା ପାଇଁ ସୋହନ କୁମାର ମାହୁନ୍ତ, କୃଷି ପାଇଁ ଅଜୟ ପୃଷ୍ଟି, ଅଜିତ ମହନ୍ତ, ଅଶୋକ ପାଣି, ହସ୍ତଶିଳ୍ପ ପାଇଁ ରାଘବ ମହାରଣା, ଦଣ୍ଡନୃତ୍ୟ କଳାକାର ମଦନ ଭୋଳ, ପାଲାଗାୟକ କପିଳେଶ୍ୱର ବେହେରା, ବାଲୁକାଶିଳ୍ପୀ ଦୁଃଖବନ୍ଧୁ ପାତ୍ରଙ୍କୁ ସମ୍ବର୍ଦ୍ଧିତ କରାଯାଇଥିଲା। ପୂର୍ବତନ ବିଚାରପତି ଭିକାରି ଚରଣ ରାଉତ, ଅବନୀ ମିଶ୍ର, ସତ୍ୟସ୍ବରୂପ ଦାସ, ସୁଶାନ୍ତ ପାଣି, ପିଙ୍କି ଝାଙ୍କୁ ମଧ୍ୟ ସମ୍ମାନିତ କରାଯାଇଥିଲା। ଅତିରିକ୍ତ ଜିଲାପାଳ(ରାଜସ୍ବ) ଉଦୟ ମହାପାତ୍ର ସ୍ବାଗତ ଭାଷଣ ଦେଇଥିବାବେଳେ ଅତିରିକ୍ତ ଜିଲାପାଳ (ସାଧାରଣ) ରମେଶ ଚନ୍ଦ୍ର ସେଠୀ ଧନ୍ୟବାଦ ଅର୍ପଣ କରିଥିଲେ।
