ପରଜଙ୍ଗ, ୧୧।୮(ଡି.ଏନ୍.ଏ.): ଲଘୁଚାପଜନିତ ଲଗାଣବର୍ଷା ଚାଷୀକୁଳ ପାଇଁ ପାଲଟିଛି ଆଶୀର୍ବାଦ। ହେଲେ ଝୁମ୍ପୁଡ଼ି ଘରେ ରହୁଥିବା ଗରିବ ପରିବାରର ସ୍ଥିତି ଦୟନୀୟ ହୋଇପଡ଼ିଛି। କେଉଁଠି ମାଟିକାନ୍ଥ ଭୁଶୁଡ଼ି ପଡ଼ିଛି ତ, ଅନ୍ୟ କେଉଁଠି ନଇଁ ପଡ଼ିଛି ଝାଟିମାଟି ଘର। ବର୍ଷା ବିତ୍ପାତରେ ଢେଙ୍କାନାଳ ଜିଲା ପରଜଙ୍ଗ ଅଞ୍ଚଳର ବହୁ ଘର ଧରାଶାୟୀ ହୋଇଯାଇଛି। କେବଳ ରୋଡ୍ ପଞ୍ଚାୟତ ଗଇଲୋ ଗ୍ରାମର ୫ ପରିବାର ବାସହରା ହୋଇଯାଇଥିବା ଅଭିଯୋଗ ହୋଇଛି। ରାଜକିଶୋର ସାହୁ, ତାଙ୍କ ଭାଇ ଦୁର୍ଯ୍ୟୋଧନ ସାହୁ, ଦୁର୍ମୂଖ ସାହୁ, ଭଜମନ ସାହୁ, ଭୀମସେନ ସାହୁଙ୍କ ୪୫ ବର୍ଷ ପୁରାତନ ପୈତୃକ ଘର ଭୁଶୁଡ଼ି ପଡ଼ିବାରୁ ପରିବାର ସଦସ୍ୟଙ୍କ ସମସ୍ୟା ବଢ଼ିଛି।
ପରିବାର ସଦସ୍ୟଙ୍କ କହିବା କଥା, ଉକ୍ତ ପୁରୁଣା ପୈତୃକ ଘରେ ସମସ୍ତେ ମିଳିମିଶି ରହି ଆସୁଥିଲେ। ଘରର ମାଟି କାନ୍ଥ ଫାଟି ଯାଇଥିଲା। ଗତ ଦୁଇଦିନ ହେଲା ଜାରି ରହିଥିବା ଲଗାଣବର୍ଷାରେ ଘର ସମ୍ପୂର୍ଣ୍ଣ ଭୁଶୁଡ଼ି ପଡ଼ିଛି। ତେବେ ସୌଭାଗ୍ୟବଶତଃ ପରିବାର ଲୋକେ ଅଳ୍ପକେ ବର୍ତ୍ତିଯାଇଛନ୍ତି। ଆଗକୁ ଆହୁରି ବର୍ଷା ହେବାର ସମ୍ଭାବନା ଥିବାରୁ ଏହି ଯୌଥ ପରିବାର କେଉଁଠି ରହିବେ ତାହାକୁ ନେଇ ଚିନ୍ତାରେ ପଡ଼ିଛନ୍ତି।
ସମ୍ପୃକ୍ତ ପରିବାର ସମ୍ପର୍କରେ ସୂଚନା ପାଇ ସରପଞ୍ଚ ବିଶ୍ୱଜିତ୍ ନାୟକ ନିଜସ୍ବ ଅନୁଦାନରୁ ଏକ ମାସର ରାଶନ ଏବଂ ପଲିଥିନ ଯୋଗାଇ ଦେଇଛନ୍ତି। ସେମାନଙ୍କ ଅସ୍ଥାୟୀ ଭାବେ ରହିବା ଲାଗି ବ୍ୟବସ୍ଥା କରାଯିବ। ପୂର୍ବରୁ ଆବାସ ଯୋଜନାରେ ୩ ଜଣଙ୍କ ନାମ ପଞ୍ଜୀକରଣ କରାଯାଇଥିବାବେଳେ ଅନ୍ୟ ୨ ଭାଇଙ୍କୁ ମଧ୍ୟ ଏଥିରେ ଅନ୍ତର୍ଭୁକ୍ତ କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି।
