ଦିଗପହଣ୍ଡି,୧୬।୬(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଚୌଧୁରୀ ଟିକରପଡ଼ା ପଞ୍ଚାୟତ ବଜ୍ରଗୁମ୍ମା, ଟିକରପଡ଼ା, ଢେପାପେଣ୍ଠ ପ୍ରଭୃତି ଗ୍ରାମମାନଙ୍କରେ ଗତ କିଛିଦିନ ହେଲା ଅଜଣା ରୋଗରେ ବହୁ ସଂଖ୍ୟକ ଛେଳି,ମେଣ୍ଢା ମୃତ୍ୟୁବରଣ କରିଥିବା ଜଣାପଡିଛି। ବଜ୍ରଗୁମ୍ମା ଗ୍ରାମର ଉଦୟ ନାଥ ଗୌଡ଼, କୁରେଶୁ ଅଧିକାରୀ,ସହଦେବ ଗୌଡ଼,କୈଳାସ ନାଇକ,ପୂର୍ଣ୍ଣ ନାଇକ, ରାଜ କିଶୋର ମିଶ୍ର,ଭାସ୍କର ନାଇକଙ୍କ ସମେତ ଅନ୍ୟ କିଛି ବ୍ୟକ୍ତିଙ୍କ ଛେଳି,ମେଣ୍ଢାଙ୍କ ମୃତ୍ୟୁ ହୋଇଛି। ଏନେଇ ଦାୟିତ୍ୱରେ ଥିବା ପ୍ରାଣୀଧନ ନିରୀକ୍ଷକ ବାଳକୃଷ୍ଣ ପ୍ରଧାନଙ୍କୁ ପଚାରିବାରୁ ତାଙ୍କ ନିକଟରେ ଏନେଇ କୌଣସି ଖବର ନଥିବା ସହ କୌଣସି ବ୍ୟକ୍ତି ଅଭିଯୋଗ କରିନଥିବା କହିଛନ୍ତି। ସେ ଭ୍ରମରପୁର,ଚୌଧୁରୀ. ଟିକରପଡ଼ା ଓ ଗଡ଼ ଗୋବିନ୍ଦପୁର ପଞ୍ଚାୟତ ଅଧିନ ସମସ୍ତ ଗାଁର ଦାୟିତ୍ୱରେ ରହିଥିବା କହିଛନ୍ତି। ବମକୋଇ ଗ୍ରାମ ପ୍ରାଣୀଧନ ଚିକିତ୍ସାଳୟର ଡ଼ା. ସଂଗ୍ରାମ ସାହୁଙ୍କୁ ପଚାରିବାରୁ ଖବର ପାଇବା ପରେ ପ୍ରାଣୀଧନ ନିରୀକ୍ଷକ ବାଳକୃଷ୍ଣ ପ୍ରଧାନ,ପ୍ରାଣୀମିତ୍ର ଅନନ୍ତ ବାଡ଼ତ୍ୟା ଓ ଅନ୍ୟ କର୍ମଚାରୀ ବୃନ୍ଦ ବିଭିନ୍ନ ଗାଁକୁ ଯାଇଥିଲେ। ସେଠାରେ ବିଭିନ୍ନ ଚାଷୀଙ୍କୁ ପଚାରିବାରୁ ସେମାନେ ଛେଳି,ମେଣ୍ଢା ପଲଙ୍କୁ ପାତ୍ରପୁର ସୀମାନ୍ତକୁ ମନ୍ଦା ପକାଇବା ପାଇଁ ନେଇଯାଇଥିବା କହିଛନ୍ତି। ଅସୁସ୍ଥ ଛେଳି,ମେଣ୍ଢାଙ୍କୁ ସେମାନେ ଆଣିଲେ ପ୍ରତିଷେଧକ ଔଷଧ,ଇଞ୍ଜେକସନ ଦିଆଯିବା ସହ ଚିକିତ୍ସା କରାଯିବ ବୋଲି କହିଛନ୍ତି।ସେହିପରି ଦିଗପହଣ୍ଡି ବ୍ଲକ ପ୍ରାଣୀଧନ ଚିକିତ୍ସିକା ଡ଼ା. ମଧୁସ୍ମିତା ପଣ୍ଡାଙ୍କୁ ପଚାରିବାରୁ ଏହି ଋତୁରେ ଛେଳି,ମେଣ୍ଢାଙ୍କୁ ଗୁହାଳରେ ରଖାଯିବା ଆବଶ୍ୟକ।କାଳବୈଶାଖୀ ପ୍ରଭାବରେ ହେଉଥିବା ବଜ୍ରପାତ ଓ କୁଆପଥର ଝଡ଼ ବର୍ଷାରେ ଯଦି ଛେଳି,ମେଣ୍ଢା ଭିଜି ଯାଆନ୍ତି ତା ହେଲେ ସେମାନଙ୍କୁ ଆନ୍ତ୍ରିକ ଜ୍ୱର ହେବ। ବିନା ଔଷଧରେ ଜ୍ୱର ଛାଡ଼ିବ ନାହିଁ। ଜ୍ୱର ହୋଇ ମୁହଁ ଫୁଲିବା ସହ ଛେଳି,ମେଣ୍ଢା ମୃତ୍ୟୁବରଣ କରିବାର ସମ୍ଭାବନା ଅଧିକା ଥାଏ।ସେମାନଙ୍କୁ ପ୍ରତିଷେଧକ ଔଷଧ,ଇଞ୍ଜେକସନ ଦିଆଯିବାର ଆବଶ୍ୟକତା ରହିଥିବା କହିଛନ୍ତି। ତେବେ ଦିଗପହଣ୍ଡି ଅଞ୍ଚଳରେ ଛେଳି,ମେଣ୍ଢା ମଡ଼କ ନେଇ ତାଙ୍କ ନିକଟରେ କୌଣସି ଖବର ନଥିବା କହିଛନ୍ତି।
