କଟକ ଅଫିସ, ୪ା୧୦: ସେ ପାଠ ପଢ଼ିବା ପାଇଁ କଟକ ଆସିଥିଲେ। ଟ୍ୟୁଶନ କରି ପାଠ ପଢ଼ୁଥିଲେ। ହଠାତ କୋଭିଡ୍ ସ୍ଥିତି ଯୋଗୁ ଲକ୍ଡାଉନ୍ ଘୋଷଣା ହେଲା। ଏହି ସମୟରେ ଟ୍ୟୁଶନ ବନ୍ଦ ହୋଇଗଲା। ତେଣୁ କ’ଣ କରିବେ ସେନେଇ ଚିନ୍ତାରେ ପଡ଼ିଗଲେ। ତେବେ ମିଳୁଥିବା ସମୟର ସଦୁପଯୋଗ ଲାଗି ସେ ପ୍ରଥମେ କେତୋଟି ନିଆରା କଳାକୃତି କଲେ। ଏସବୁର ଫଟୋ ସୋସିଆଲ ମିଡିଆରେ ପୋଷ୍ଟ କଲେ। ତାଙ୍କୁ ଢ଼େର୍ ପ୍ରଶଂସା ମିଳିଲା। ଏହା ତାଙ୍କୁ ପ୍ରେରଣା ଦେଲା। ଫଳରେ ସେ ଭିନ୍ନ କଳାକୃତି କରିବା ନିଶାରେ ପଡ଼ିଗଲେ। ନିଆରା କଳାକୃତିର ଏହି ଅନୁପମ କାରିଗର ଜଣକ ହେଉଛନ୍ତି କଟକ ସିଡିଏ-୭ରେ ରହୁଥିବା ମନୋଜ କୁମାର ସାହୁ (୨୫)। ତାଙ୍କ ଜନ୍ମ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅନ୍ତର୍ଗତ କୁମ୍ଭାରପଡ଼ା ଗ୍ରାମରେ। ବାପା ହେଉଛନ୍ତି ରାମଚନ୍ଦ୍ର ସାହୁ ଓ ମାଆ ପ୍ରମିଳା ସାହୁ।
ମନୋଜ କାଜୁରେ ଜଗନ୍ନାଥ, ଧାନରେ ରଥ, ସାବୁନରେ କଟକ ଚଣ୍ଡୀ, ଆଇସକ୍ରିମ କାଠିରେ ଅରଟ ଓ ଦୁର୍ଗା, ଗୋଟାଗୁଆରେ ଲକ୍ଷ୍ମୀ ପ୍ରଭୃତି ବହୁ କଳାକୃତି କରିଛନ୍ତି। ଏସବୁ ତାଙ୍କୁ ଜଣେ ନିଆରା ଚିତ୍ରକରର ପରିଚୟ ଦେଇଛି। ତାଙ୍କର ବିଭିନ୍ନ କଳାକୃତି ସୋସିଆଲ ମିଡିଆରେ ଭାଇରାଲ ହେବା ସହ ପ୍ରଶଂସା ସାଉଣ୍ଟୁଛି। ମନୋଜ କହିଛନ୍ତି, ତାଙ୍କ ଲକ୍ଷ୍ୟ ଥିଲା ଅଲଗା। ସେ ପାଠ ପଢ଼ିବା ପାଇଁ କଟକ ଆସିଥିଲେ। ଟ୍ୟୁଶନ କରି ପଢ଼ୁଥିଲେ। ମାତ୍ର ଲକ୍ଡାଉନ୍ ସମୟରେ ଟ୍ୟୁଶନ ବନ୍ଦ ହୋଇଯାଇଥିଲା। ଏହି ସମୟରେ ସେ କଳାକୃତି ନିଶାରେ ପଡ଼ିଗଲେ। ସେ ପ୍ରଥମେ କାଗଜରେ ଶ୍ରୀଜଗନ୍ନାଥଙ୍କ ପ୍ରତିଛବି ତିଆରି କରି ସୋସିଆଲ ମିଡିଆରେ ପୋଷ୍ଟ କଲେ। ଏହାକୁ ଦେଖି ବହୁ ଲୋକ ତାଙ୍କୁ ପ୍ରଶଂସା କଲେ। ଏହାପରେ ସେ ଡାଲିରେ ସାନ୍ତାକ୍ଲଜ୍, ଚକଲେଟ୍ରେ ଜଗନ୍ନାଥ, ବଳଭଦ୍ର ଓ ସୁଭଦ୍ରା, ରସୁଣରେ ଶିବ, କଉଡ଼ିରେ ଜଗନ୍ନାଥ, ଭଙ୍ଗାଦୀପରେ ଗଣେଶ ଏବଂ ଅଣ୍ଡାପେଟିରେ ଶିମିଳିପାଳ ଜଙ୍ଗଲ ଆଦି କଳାକୃତି ତିଆରି କରି ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ଏପର୍ଯ୍ୟନ୍ତ ସେ ୩୦ରୁ ଉର୍ଦ୍ଧ୍ୱ କଳାକୃତି ତିଆରି କରିସାରିଲେଣି। ଯଦି ସରକାରଙ୍କ ତରଫରୁ ତାଙ୍କୁ କିଛି ପ୍ରୋତ୍ସାହନ ମିଳନ୍ତା, ତେବେ ସେ ଆଗକୁ ଆଗେଇବା ସହ ଅନେକ ନିଆରା ଓ ମନଲୋଭା କଳାକୃତି ତିଆରି କରି ରାଜ୍ୟ ପାଇଁ ଗୌରବ ଆଣିପାରନ୍ତେ ବୋଲି ମନୋଜ କହିଛନ୍ତି।
