ନୂଆଦିଲ୍ଲୀ,୨୦।୫: ଦିଲ୍ଲୀ ଅବକାରୀ ନୀତି ଅନିୟମିତତା ମାମଲାରେ ଜେଲରେ ବନ୍ଦଥିବା ଆମ ଆଦମୀ ପାର୍ଟି(ଏଏପି)ନେତା ତଥା ଦିଲ୍ଲୀର ପୂର୍ବତନ ଉପ ମୁଖ୍ୟମନ୍ତ୍ରୀ ମନିଷ ସିସୋଡିଆ ଡିଜିଟାଲ ତଥ୍ୟ ନଷ୍ଟ କରିଥିବା ମାନି ଯାଇଛନ୍ତି। ରିପୋର୍ଟ ଅନୁଯାୟୀ ସିସୋଡିଆ ସିବିଆଇ ସାମ୍ନାରେ ସ୍ବୀକାର କରିଛନ୍ତି କି ସେ ଦୁଇଟି ମୋବାଇଲ ଫୋନ ନଷ୍ଟ କରିଛନ୍ତି।
ଦିଲ୍ଲୀର ଅବକାରୀ ନୀତି ମାମଲାରେ ସିସୋଡିଆଙ୍କୁ ଅଭିଯୁକ୍ତ ନମ୍ବର ଏକ କରାଯାଇଛି। କିଛି ମଦ ବ୍ୟବସାୟୀଙ୍କ ସପକ୍ଷରେ ନୀତି ଉପସ୍ଥାପନ କରିବା ଏବଂ ପ୍ରମାଣ ନଷ୍ଟ କରିବା ଅଭିଯୋଗରେ ସିବିଆଇ ସିସୋଡିଆଙ୍କୁ ଅନ୍ୟ ଅଭିଯୁକ୍ତଙ୍କ ସହ ଗିରଫ କରିଥିଲା।
ଇଣ୍ଡିଆ ଟୁଡେର ଏକ ସିପୋର୍ଟରେ ସିବିଆଇ ସୂତ୍ରରୁ ମିଳିଥିବା ସୂଚନା ଆଧାରରେ ପ୍ରକାଶ କରିଛି ଯେ ଜାନୁଆରୀ ୨୦୨୦ରୁ ଅଗଷ୍ଟ ୨୦୨୨୨ମଧ୍ୟରେ ମନିଷ ସିସୋଡିଆ ତିନୋଟି ମୋବାଇଲ ହ୍ୟାଣ୍ଡସେଟ ବ୍ୟବହାର କରିଥିଲେ। ଅଗଷ୍ଟ ୧୯, ୨୦୨୨ ରେ ତାଙ୍କ ଘରେ ଖୋଜାଖୋଜି ବେଳେ ସିବିଆଇ ତାଙ୍କର ଗୋଟିଏ ଫୋନ ଜବତ କରିଥିଲା। ସିସୋଡିଆ କହିଛନ୍ତି ଯେ ଜବତ ହୋଇଥିବା ଫୋନ ସିସୋଡିଆ ଜୁଲାଇ ୨୨, ୨୦୨୨ରୁ ବ୍ୟବହାର କରୁଥିଲେ। ସେହି ଦିନ ସ୍ବରାଷ୍ଟ୍ର ମନ୍ତ୍ରଣାଳୟ ମାମଲାର ତଦନ୍ତ ସିବିଆଇକୁ ହସ୍ତାନ୍ତର କରିଛି।
