କେନ୍ଦୁଝର, ୩୦।୧୦ (ସ୍ବ.ପ୍ର./ଡି.ଏନ.ଏ.): କେନ୍ଦୁଝର ଜିଲାପାଳଙ୍କ କାର୍ଯ୍ୟାଳୟ ପରିସରରେ ଶୁକ୍ରବାର ରାଜ୍ୟର ପ୍ରଥମ ମାଣ୍ଡିଆ ଶକ୍ତି କାଫେ ଭର୍ଚୁଆଲ ମୋଡ୍ରେ ମହିଳା ଓ ଶିଶୁ ବିକାଶ ତଥା ମିଶନ ଶକ୍ତି ମନ୍ତ୍ରୀ ଟୁକୁନି ସାହୁଙ୍କ ଦ୍ୱାରା ଉଦ୍ଘାଟିତ ହୋଇଯାଇଛି। ମିଶନ ଶକ୍ତି କମିଶନର ସୁଜାତା ଆର୍ କାର୍ତ୍ତେକେୟନ ଉପସ୍ଥିତ ଥିଲେ। ଜିଲାପାଳ ଆଶିଷ ଠାକ୍ରେଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମନ୍ତ୍ରୀ ସାହୁ କେନ୍ଦୁଝର ଜିଲା ପ୍ରଶାସନର ପୁରା ଟିମ୍କୁ ଏଥିପାଇଁ ପ୍ରଶଂସା କରିଥିଲେ। ମାଣ୍ଡିଆ ଆମର ପାରମ୍ପରିକ ଓଡ଼ିଆ ଖାଦ୍ୟ। ଏହି କାଫେ ଖୋଲାଯିବା ଦ୍ୱାରା ଚାଷୀମାନେ ଲାଭବାନ ହେବେ ଏବଂ ମହିଳାମାନେ ଅଧିକ ସ୍ବାବଲମ୍ବୀ ହେବା ସହ ସଶକ୍ତିକରଣ ହୋଇପାରିବେ ବୋଲି କୁହାଯାଇଛି। ପଞ୍ଚାୟତ ସ୍ତରରେ ଏଭଳି କାଫେ ହେଲେ ମହିଳାମାନେ ଅଧିକ ସ୍ବାବଲମ୍ବୀ ହୋଇପାରିବେ। ତେବେ ଜିଲାର ୩୩୦ ପଞ୍ଚାୟତରେ ଏଭଳି କାଫେ ଖୋଲିବା ପାଇଁ ମିଶନ ଶକ୍ତି ଜରିଆରେ ଘର ତିଆରି ଚାଲିଥିବା ଜିଲାପାଳ କହିଛନ୍ତି।
ଏଠାରେ ଲୋକେ ମାଣ୍ଡିଆରେ ପ୍ରସ୍ତୁତ ବିଭିନ୍ନ ପ୍ରକାର ଗରମ ଖାଦ୍ୟ ଓ ସ୍ବାଦିଷ୍ଟ ତଥା ସ୍ବାସ୍ଥ୍ୟ ପକ୍ଷେ ହିତକର ଖାଦ୍ୟ ପାଇପାରିବେ। ମିଲେଟ ମିଶନ ଓ ମିଶନ ଶକ୍ତିର ମିଳିତ ଉଦ୍ୟମରେ ଏହା ଚାଲୁଥିବା ବେଳେ ଆଗାମୀ ଦିନରେ ରାଜ୍ୟର ବିଭିନ୍ନ ଅଞ୍ଚଳରେ ଏଭଳି କାଫେ ଖୋଲି ମାଣ୍ଡିଆ ଖାଦ୍ୟ ଓ ଚାଷକୁ ପ୍ରସାରିତ ଲାଗି ସରକାର ପଦକ୍ଷେପ ନେଉଥିବା ଅବଗତ କରାଯାଇଥିଲା। ସୂଚନାଯୋଗ୍ୟ, ଓଡ଼ିଶା ମିଲେଟ ମିଶନ ୨୦୧୯ରେ ଆରମ୍ଭ ହୋଇ ଜିଲାର ୭ ବ୍ଲକରେ ଏହି ଚାଷ କରାଯାଇ ପାଖାପାଖି ୪ହଜାର ଚାଷୀ ଉପକୃତ ହେଉଛନ୍ତି। ସେହିପରି ମାଣ୍ଡିଆ ଲଡୁ ଆଇସିଡିଏସ୍ ସ୍କିମ୍ରେ ଅଙ୍ଗନଓ୍ବାଡି କେନ୍ଦ୍ରର ଶିଶୁମାନଙ୍କୁ ଖାଇବାକୁ ଦିଆଯାଉଛି।
