ଖ୍ରୀଷ୍ଟଚର୍ଚ୍ଚ,୮।୩: ଭାରତୀୟ ମହିଳା କ୍ରିକେଟ ଟିମ ଚଳିତ ଆଇସିସି ମହିଳା ବିଶ୍ୱକପରେ ଜବରଦସ୍ତ ଆରମ୍ଭ କରିଛି। ଭାରତ ତା’ର ପ୍ରଥମ ମ୍ୟାଚରେ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୧୦୭ ରନର ପରାସ୍ତ କରିଛି। ପଡିଆ ଭିତରେ ଦମଦାର ପ୍ରଦର୍ଶନ ପରେ ଟିମ ଇଣ୍ଡିଆ ଏକ ଭଲ କାମ କରି ସମସ୍ତଙ୍କ ହୃଦୟ ଜିତିଛି। ମ୍ୟାଚ ଜିତିବା ପରେ ଭାରତୀୟ ଖେଳାଳିମାନେ ପାକିସ୍ତାନ ଟିମର କ୍ୟାପଟେନ ବିସମା ମାରୁଫଙ୍କ ଝିଅଙ୍କ ସହ ଖୁବ ସମୟ ବିତାଇଥିଲେ, ଯାହାର ଫଟୋ ଓ ଭିଡିଓ ସୋଶାଲ ମିଡିଆରେ ଶେୟାର୍ ହୋଇଛି। ଏହି ଫଟୋ ଦେଖି ସମସ୍ତେ ଭାରତୀୟ ଦଳକୁ ପ୍ରଶଂସା କରୁଛନ୍ତି। କେବଳ ଏତିକି ନୁହେଁ, ଭାରତୀୟ ଓପନର୍ ବ୍ୟାଟ୍ସମ୍ୟାନ ସ୍ମୃତି ମନ୍ଧାନାଙ୍କ ବାର୍ତ୍ତା ସମସ୍ତଙ୍କ ହୃଦୟ ଜିତିଛି। ଇନଷ୍ଟାଗ୍ରାମରେ ମନ୍ଧାନା ପାକିସ୍ତାନ ଅଧିନାୟକ ବିସ୍ମା ମାରୁଫ୍ଙ୍କୁ ପ୍ରଶଂସା କରିଛନ୍ତି ଏବଂ ତାଙ୍କୁ ସମସ୍ତଙ୍କ ପାଇଁ ପ୍ରେରଣା ବୋଲି ବର୍ଣ୍ଣନା କରିଛନ୍ତି। ସେ ଲେଖିଛନ୍ତି, ୬ ମାସ ମଧ୍ୟରେ ଗର୍ଭଧାରଣରୁ ଫେରିବା ଏବଂ ଅନ୍ତର୍ଜାତୀୟ କ୍ରିକେଟ ଖେଳିବା ଅତ୍ୟନ୍ତ ପ୍ରେରଣାଦାୟକ। ବିଶ୍ୱର ଖେଳାଳିଙ୍କ ପାଇଁ ମାରୁଫ୍ ଏକ ଉଦାହରଣ ପାଲଟିଛନ୍ତି। କ୍ରିକେଟ୍ କିମ୍ବଦନ୍ତୀ ସଚିନ ତେନ୍ଦୁଲକର ମଧ୍ୟ ମହିଳା କ୍ରିକେଟର୍ଙ୍କ ଏଭଳି ସ୍ପିରିଟ୍ ଦେଖି ଆଶ୍ଚର୍ଯ୍ୟପ୍ରକଟ କରିଛନ୍ତି।
