ଖୋର୍ଦ୍ଧା ଅଫିସ,୬ା୯: ବେଗୁନିଆ ଥାନା ଅଧୀନ କଡ଼ବ ଗ୍ରାମର ମାଗୁଣି ନାୟକ ଓ ତାଙ୍କ ପୁଅ ଆନନ୍ଦଙ୍କୁ ଏକ ବନ୍ଦ କୋଠରିରେ ମାନବବାଦ ସଙ୍ଗଠନ କର୍ମକର୍ତ୍ତା ନିସ୍ତୁକ ମାଡ଼ ମାରିବା ମାମଲାରେ ରବିବାର ୩ ଅଭିଯୁକ୍ତଙ୍କ ରିମାଣ୍ଡ ଅବଧି ସରିଛି। ସମ୍ପୃକ୍ତ ୩ ଅଭିଯୁକ୍ତ ବୈକୁଣ୍ଠ ନାୟକ, ସ୍ବପ୍ନେଶ୍ୱର ନାୟକ ଏବଂ ଟୁଲୁ ବେହେରାଙ୍କ ରିମାଣ୍ଡ ଅବଧି ସରିବା ପରେ ପୋଲିସ ସେମାନଙ୍କୁ ଜେଲ ହାଜତକୁ ପଠାଇ ଦେଇଛି। କଡ଼ା ସୁରକ୍ଷା ମଧ୍ୟରେ ପୋଲିସ ଏହି ୩ ଅଭିଯୁକ୍ତଙ୍କୁ ନେଇ ଡାକ୍ତରୀ ଚିକିତ୍ସା କରାଇବା ପରେ ଖୋର୍ଦ୍ଧା ଏସ୍ଡିଜେଏମ୍ଙ୍କ କୋର୍ଟରେ ହାଜର କରିଥିଲା। ପରେ ସେମାନଙ୍କୁ ପୁଣି ଖୋର୍ଦ୍ଧା ସବ୍ଜେଲକୁ ଫେରାଇ ନିଆଯାଇଛି। ଅନ୍ୟପକ୍ଷରେ ମାନବବାଦ ସଙ୍ଗଠନ ତଥା ରାଷ୍ଟ୍ରୀୟ ସାମାଜିକ ନ୍ୟାୟ ମଞ୍ଚର ମୁଖ୍ୟ ତଥା ଆତ୍ମଘୋଷିତ ଗୁରୁଜୀ ମାନସ ଦାସ ଓ ତାଙ୍କ ପୁଅ ମନୋରଞ୍ଜନଙ୍କୁ ପଚରାଉଚରା ଲାଗି ରିମାଣ୍ଡରେ ଆଣିବା ପାଇଁ ପୋଲିସ ପ୍ରକ୍ରିୟା ଆରମ୍ଭ କରିିଛି। ଏନେଇ ଖୋର୍ଦ୍ଧା ସଦର ଏସ୍ଡିପିଓ ସୁଶୀଲ କୁମାର ମିଶ୍ର କହିଛନ୍ତି, ମାନସ ଓ ମନୋରଞ୍ଜନଙ୍କୁ ରିମାଣ୍ଡରେ ଅଣାଯିବା ନେଇ ଯୋଜନା ରହିଛି। ତେବେ ଏ ସଂକ୍ରାନ୍ତରେ ଏପର୍ଯ୍ୟନ୍ତ କିଛି ଚୂଡ଼ାନ୍ତ ହୋଇନାହିଁ।
ଅନ୍ୟପଟେ ମାନସଙ୍କ ଓକିଲ ଶରତ ଚନ୍ଦ୍ର ମାନସିଂ କହିଛନ୍ତି, ସତ୍ୟବ୍ରତ ନାୟକ ହତ୍ୟାକାଣ୍ଡରେ ଗିରଫ ମାନସଙ୍କ ସମେତ ୭ ଅଭିଯୁକ୍ତ ତଳକୋର୍ଟରେ କରିଥିବା ଜାମିନ ଆବେଦନ ନାମଞ୍ଜୁର ହୋଇଯାଇଛି। ଏହାପରେ ଶୁକ୍ରବାର ଅତିରିକ୍ତ ଜିଲା ଦୌରାଜଜ୍-୧ଙ୍କ କୋର୍ଟରେ ପୁନଃ ଜାମିନ ଆବେଦନ କରାଯାଇଛି। ଏହାର ଶୁଣାଣି ସେପ୍ଟେମ୍ବର ୧୩ରେ ହେବ।
