ଅମରପାଲି,୧୯।୧୧(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ଥାନା ଅନ୍ତର୍ଗତ ବହଳପଦର ପଞ୍ଚାୟତର ଗୌଡଗାଡ ଗ୍ରାମରେ ଗତ ସୋମବାର ରାତିରେ ଜେସିବି ଧକ୍କାରେ ଏକ କନଷ୍ଟ୍ରକସନ କମ୍ପାନୀର ମ୍ୟାନେଜରଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିଲ। ମୃତଦେହ ଉଦ୍ଧାର ପାଇଁ ପୋଲିସ ଘଟଣାସ୍ଥଳକୁ ଆସିଥିଲେ ମଧ୍ୟ ସେଠାରେ ଚାପା ଉତ୍ତେଜନା ଦେଖାଦେବାରୁ ମୃତଦେହ ଉଦ୍ଧାର ହୋଇପାରି ନ ଥିଲା। ଦୀର୍ଘ ୧୬ ଘଣ୍ଟା ମୃତଦେହ ପଡି ରହିବା ପରେ ମଙ୍ଗଳବାର ଦିନ ପୂର୍ବାହ୍ନ ୧୧ ଘଣ୍ଟା ସମୟରେ ପୋଲିସ ଉଦ୍ଧାର କରିଛି। ମୃତଦେହ ବ୍ୟବଚ୍ଛେଦ ପରେ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଏନେଇ ମୃତକଙ୍କ ଭାଇ ରୋହନ କୁମାର ଭୁକ୍ତାଙ୍କ ଅଭିଯୋଗ ଆଧାରରେ ବୀରମହାରାଜପୁର ଥାନାରେ ( କେସ ନଂ ୨୩୯ /୨୫)ରେ ଏକ ମାମଲା ରୁଜୁ ହୋଇଛି। ଅଭିଯୋଗ ଅନୁସାରେ ଅମରପାଲି ପୂର୍ତ୍ତ ବିଭାଗ ରାସ୍ତାରୁ ଗୌଡ଼ଗାଡ ଦେଇ ଠେଙ୍ଗୋ ଡ୍ୟାମ ପର୍ଯ୍ୟନ୍ତ ଆରଡି ବିଭାଗ ତରଫରୁ ରାସ୍ତା ନିର୍ମାଣ କାମ ହେଉଛି। ନୂଆପଡ଼ା( ଖରିଆର ରୋଡ) ଅଞ୍ଚଳର ଏକ କନଷ୍ଟ୍ରକସନ କମ୍ପାନୀକୁ ଏହାର ନିର୍ମାଣ କାମ ଦିଆଯାଇଛି। ଏହି କନଷ୍ଟ୍ରକସନ କମ୍ପାନୀରେ ମୃତକ ପପୁନ ଭୁକ୍ତା(୨୮) ମ୍ୟାନେଜର ଭାବେ କାର୍ଯ୍ୟ କରୁଥିଲେ। ସୋମବାର ଏକ ଜେସିବି ପପୁନଙ୍କୁ ତାଙ୍କ କ୍ୟାମ୍ପ ସମ୍ମୁଖରେ ଧକ୍କା ଦେବାରୁ ପ୍ରବଳ ରକ୍ତସ୍ରାବ ହୋଇ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ଘଟଣାସ୍ଥଳରେ ପୋଲିସ ପହଞ୍ଚିଥିଲେ ମଧ୍ୟ ମୃତକଙ୍କ ପରିବାର ଲୋକେ ଓ ସ୍ଥାନୀୟ ଲୋକେ ନିର୍ମାଣ ସଂସ୍ଥାର ମାଲିକ ଆସିବା ସହିତ ଜେସିବିକୁ ଜବତ ଓ ଡ୍ରାଇଭରକୁ ଗିରଫ ସହିତ କ୍ଷତି ପୂରଣ ଦାବି କରିଥିଲେ। ଫଳରେ ଘଟଣାସ୍ଥଳରେ ଚାପା ଉତ୍ତେଜନା ଦେଖା ଦେଇଥିଲା। ବୀରମହାରାଜପୁରର ଏକ ପୋଲିସ ଟିମ ଆସି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିଥିଲେ ମଧ୍ୟ କେହି ଶୁଣି ନ ଥିଲେ। ସାରାରାତି ଘଟଣାସ୍ଥଳରେ ମୃତଦେହ ପଡି ରହିଥିବା ବେଳେ ଲୋକେ ମୃତଦେହ ପାଖରେ ବସି ରହିଥିଲେ। ମଙ୍ଗଳବାର ସକାଳୁ ପୁଣି ପୋଲିସ ଲୋକଙ୍କୁ ବୁଝାସୁଝା କରିଥିଲା। ତେବେ ପୂର୍ବାହ୍ନ ୧୧ ଘଣ୍ଟା ସମୟରେ ଲୋକେ ରାଜି ହେବା ପରେ ମୃତଦେହକୁ ବୀରମହାରାଜପୁରକୁ ନିଆଯାଇଥିଲା। ସେଠାରେ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ପୋଲିସ ଦୁର୍ଘଟଣା ଘଟାଇଥିବା ଜେସିବିକୁ ଜବତ କରିଛି। ଗ୍ରାମର ଶ୍ମଶାନରେ ଅନ୍ତିମ ସଂସ୍କାର କରାଯାଇଛି। ମୃତ ପପୁନ ମୁର୍ଷୁଣ୍ଢି ପଞ୍ଚାୟତ ଚୌକା ଗ୍ରାମର ଅଟନ୍ତି। ସେ ତାଙ୍କ ପରିବାରର ପାଞ୍ଚ ପୁଅ ମଧ୍ୟରୁ ସବୁଠୁ ସାନ ହୋଇଥିବା ବେଳେ ସେ ଅବିବାହିତ ଥିଲେ। ତେବେ ସେ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ହୋଇଥିବାରୁ ତାଙ୍କ ପରିବାରକୁ ସରକାରୀ ସହାୟତା ପ୍ରଦାନ କରିବାକୁ ସାଧାରଣରେ ଦାବି ହେଉଛି।
