ଜଳେଶ୍ୱର, ୧୯ା୬ (ନବୀନ ସାହୁ): ମହିଳାଙ୍କ ଗୋପନୀୟତାକୁ ନେଇ ଅତି ସମ୍ବେଦନଶୀଳ ତଥା ଲଜ୍ଜାଜନକ ଘଟଣା ସାମ୍ନାକୁ ଆସିଛି। ବାଲେଶ୍ୱର ଜିଲା ଜଳେଶ୍ୱର ବ୍ଲକ ରାଇବଣିଆ ଥାନା ଦକ୍ଷିଣ ପ୍ରହରାଜପୁର ପଞ୍ଚାୟତ ପ୍ରହରାଜପୁର ଗ୍ରାମରେ ମହିଳାମାନେ ଗାଧୋଉଥିବା ବେଳେ ଭିଡିଓ ରେକର୍ଡିଂ କରିବା ଅଭିଯୋଗରେ ଜଣେ ୨୯ ବର୍ଷୀୟ ଯୁବକଙ୍କ ନାମରେ ଥାନାରେ ଏତଲା ଦିଆଯାଇଛି। ପୋଲିସ ଏହି ଘଟଣାରେ ମୋବାଇଲ ଜବତ କରିବା ସହ ତଦନ୍ତ ଆରମ୍ଭ କରିଥିବା ବେଳେ ଅଭିଯୁକ୍ତ ଯୁବକ ଫେରାର ଅଛନ୍ତି। ସୂଚନା ଅନୁଯାୟୀ, ଦକ୍ଷିଣ ପ୍ରହରାଜପୁର ପଞ୍ଚାୟତ ପ୍ରହରାଜପୁର ଗ୍ରାମର ୩ଜଣ ମହିଳା ତାଙ୍କ ଘର ପରିସରରେ ଥିବା ଏକ ନଳକୂପରେ ଗାଧୋଉଥିଲେ। ଏହି ସମୟରେ ପଡ଼ୋଶୀ ଘରର ଉକ୍ତ ଯୁବକଜଣକ କାନ୍ଥ ଉପରେ ଚତୁରତାର ସହ ମୋବାଇଲ ରଖି ସେମାନଙ୍କ ଗାଧୋଇବାର ଭିଡିଓ ଶୁଟିଂ କରୁଥିଲେ। ଜଣେ ମହିଳାଙ୍କ ନଜର ଏହା ଉପରେ ପଡ଼ିବା ପରେ ସେ ତୁରନ୍ତ ନିଜ ପରିବାର ଲୋକଙ୍କୁ ଏ ବିଷୟରେ ଜଣାଇଥିଲେ। ଘଟଣା ଜାଣିବା ପରେ ପରିବାର ଲୋକେ ଉକ୍ତ ଯୁବକଙ୍କ ଘରକୁ ଯାଇ ପଚରାଉଚୁରା କରିବା ସହ ତାଙ୍କ ମୋବାଇଲ ଫୋନ ଯାଞ୍ଚ କରିଥିଲେ। ମୋବାଇଲ ଫୋଲଡର ଖୋଲିବା ମାତ୍ରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। ସେଥିରେ କେବଳ ସେହି ସମୟର ଭିଡିଓ ନୁହେଁ, ବରଂ ପୂର୍ବରୁ ମଧ୍ୟ ଅନେକ ଥର ସେହି ମହିଳାମାନଙ୍କ ଗାଧୋଇବା ସମୟର ଅଶ୍ଳୀଳ ଭିଡିଓ ରେକର୍ଡ କରି ରଖାଯାଇଥିବା ଦେଖିବାକୁ ମିଳିଥିଲା। ଅଭିଯୁକ୍ତ ଯୁବକ ଅଶ୍ଳୀଳ ସାଇଟରେ ଭିଡିଓ ବିକ୍ରି କରୁଥିବା ସନ୍ଦେହ କରାଯାଉଛି। ଏହି ଘଟଣାକୁ ନେଇ ବୁଧବାର ରାତିରେ ପୀଡ଼ିତାଙ୍କ ପରିବାର ପକ୍ଷରୁ ରାଇବଣିଆ ଥାନାରେ ଏକ ଲିଖିତ ଅଭିଯୋଗ କରାଯାଇଛି। ଅଭିଯୋଗ ପାଇ ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଭିଡିଓ ରେକର୍ଡ ହୋଇଥିବା ମୋବାଇଲ ଜବତ କରିଛି। ତେବେ ପୋଲିସ ପହଞ୍ଚିବା ପୂର୍ବରୁ ହିଁ ଅଭିଯୁକ୍ତ ଯୁବକଜଣକ ଗ୍ରାମରୁ ଫେରାର ହୋଇଯାଇଛନ୍ତି। ଗ୍ରାମବାସୀଙ୍କ କହିବା ଅନୁଯାୟୀ, ଉକ୍ତ ଯୁବକ ଜଣକ ଦୀର୍ଘ ଦିନ ଧରି ଏଭଳି ଭିଡିଓ ଶୁଟିଂ କରି ବିଭିନ୍ନ ଅଶ୍ଳୀଳ ୱେବସାଇଟରେ ଅପଲୋଡ କରୁଥିଲେ ଏବଂ ସେଥିରୁ ଟଙ୍କା ରୋଜଗାର କରୁଥିଲେ।
