ମଥୁରା,୧।୩: ଉତ୍ତରପ୍ରଦେଶର ମଥୁରାର ଏକ ରାସ୍ତା କଡ଼ରୁ ଜଳନ୍ତା କାର୍ ସହ ପୋଡି ଯାଇଥିବା ଜଣେ ଯୁବକଙ୍କ ମୃତଦେହ ପୋଲିସ ଉଦ୍ଧାର କରିଥିଲା। ଏହି ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଥିଲା। ପୋଲିସ ତଦନ୍ତ ପରେ ଘଟଣାର ପର୍ଦ୍ଦାଫାଶ କରିଛି। ଏହା ଏକ ସୁପରିକଳ୍ପିତ ହତ୍ୟା କାଣ୍ଡ ବୋଲି ପୋଲିସ କହିଛି। ଏନେଇ ପୋଲିସ ଏକ ହତ୍ୟା ମାମଲା ରୁଜୁ କରି ଯୁବକଙ୍କ ୨୦ ବର୍ଷୀୟା ପ୍ରେମିକା ଏବଂ ପ୍ରେମିକାଙ୍କ ମା’ଙ୍କୁ ଗିରଫ କରିଛି। ଘଟଣାର ମୁଖ୍ୟ ମାଷ୍ଟରମାଇଣ୍ଡ ପ୍ରେମିକାଙ୍କ ବାପା ଫେରାର ଥିବା ପୋଲିସ କହିଛି।
ମୃତକ ଯୁବକ ହେଲେ ପୁଷ୍ପେନ୍ଦ୍ର ଯାଦବ। ପୁଷ୍ପେନ୍ଦ୍ର ଆଗ୍ରାରେ ଟ୍ରାନ୍ସପୋର୍ଟ ବେପାର କରୁଥିଲେ। ପୁଷ୍ପେନ୍ଦ୍ର ଏବଂ ୨୦ ବର୍ଷୀୟା ଯୁବତୀଙ୍କ ସହ ପ୍ରେମ ସମ୍ପର୍କ ରହିଥିଲା। ହେଲେ ଯୁବତୀଙ୍କ ପରିବାର ଲୋକେ ଏହାକୁ ନେଇ ଖୁସି ନ ଥିଲେ। ସେମାନେ ପୁଷ୍ପେନ୍ଦ୍ରଙ୍କୁ ରାସ୍ତାରୁ ହଟାଇବାକୁ ଏକ ଯୋଜନା ପ୍ରସ୍ତୁତ କରିଥିଲେ। ଝିଅଙ୍କ ଜରିଆରେ ପରିବାର ଲୋକେ ପୁଷ୍ପେନ୍ଦ୍ରଙ୍କୁ ଘରକୁ ଡାକିଲେ। ପରେ ପରିବାର ଲୋକେ ମିଶି ପୁଷ୍ପେନ୍ଦ୍ରଙ୍କୁ ପିଟିପିଟି ହତ୍ୟା କରିଥିଲେ। ଏହାକୁ ଏକ ଦୁର୍ଘଟଣାର ରୂପ ଦେବାକୁ ଯାଇ ପରିବାର ଲୋକେ ଏକ କାର୍ରେ ମୃତଦେହ ରଖି କିଛି ଦୂରକୁ ନେଇଯାଇ କାରରେ ନିଆଁ ଲାଗାଇ ଦେଇଥିଲେ। ପରବର୍ତ୍ତି ସମୟରେ ପୋଲିସ ଜଳନ୍ତା କାର୍ ସହ ପୋଡି ଯାଇଥିବା ଯୁବକଙ୍କ ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଥିଲା।
ସୂଚନା ଯୋଗ୍ୟ, ପ୍ରେମିକାଙ୍କ ବାପାଙ୍କ ନାମରେ ପୂର୍ବରୁ ଅପହରଣ,ଦାଦାବଟି ଆଦାୟ, ହତ୍ୟା ପରି ବହୁ ମାମଲା ରହିଥିବା ଜଣାପଡିଛି। ଏହି ହତ୍ୟା କାଣ୍ଡରେ ପ୍ରେମିକାଙ୍କ ସମ୍ପର୍କୀୟ ମଧ୍ୟ ସାମିଲ ଥିବା ଜଣାପଡିଛି। ପୋଲିସ ସେମାନଙ୍କୁ ଗିରଫ କରିବା ପାଇଁ ଉଦ୍ୟମ ଚଲାଇଛି।
