କୁତ୍ରା,୯ା୬ (ଦେବାଶିଷ ସାହୁ):ପ୍ରେମିକା ବାହାହେବାକୁ ମନାକରିବାରୁ ଜଣେ ଯୁବକ ଉଚ୍ଚ କ୍ଷମତାସମ୍ପନ୍ନ ବିଦ୍ୟୁତ ଖୁଣ୍ଟରେ ଚଢ଼ି ହଙ୍ଗାମା କରିଛନ୍ତି। ଏଭଳି ଘଟଣା ଦେଖିବାକୁ ମିଳିଛି ସୁନ୍ଦରଗଡ଼ ଜିଲା କୁତ୍ରା ବ୍ଲକ ଅନ୍ତର୍ଗତ ବୁଡାକଟା ଅଞ୍ଚଳରେ। ଘଟଣାକୁ ନେଇ ଅଞ୍ଚଳରେ ଦୀର୍ଘ ସମୟ ଧରି ଉତ୍ତେଜନା ଓ ଆତଙ୍କର ପରିସ୍ଥିତି ସୃଷ୍ଟି ହୋଇଥିଲା।
ସୂଚନା ଅନୁସାରେ, ଯୁବକ ଜଣକ ରବିବାର ରାତି ପ୍ରାୟ ୧୦ଟାରେ ବିଦ୍ୟୁତ ଖୁଣ୍ଟରେ ଚଢ଼ି ଉଚ୍ଚ ସ୍ବରରେ ଚିତ୍କାର କରିବା ସହ କାନ୍ଦୁଥିଲେ। ତାଙ୍କର କାନ୍ଦ ଶୁଣି ସ୍ଥାନୀୟ ଗ୍ରାମବାସୀ ଘଟଣାସ୍ଥଳରେ ପହଞ୍ଚିଥିଲେ। ଗ୍ରାମବାସୀଙ୍କୁ ଦେଖି ଯୁବକ ଜଣକ ତାଙ୍କ ପ୍ରେମିକାକୁ ତୁରନ୍ତ ଡାକିବାକୁ ଦାବି କରିଥିଲେ। ନଚେତ ସେ ନିଜ ଜୀବନକୁ ବିପଦରେ ପକାଇବେ ବୋଲି ଧମକ ଦେଇଥିଲେ। ଗ୍ରାମବାସୀମାନେ ତୁରନ୍ତ ପୋଲିସ ଓ ଅଗ୍ନିଶମ ବିଭାଗକୁ ଖବର ଦେଇଥିଲେ। ଖବର ପାଇ ପୋଲିସ ଏବଂ ଅଗ୍ନିଶମ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଯୁବକଙ୍କୁ ବୁଝାସୁଝା କରି ତଳକୁ ଓହ୍ଲାଇବା ପାଇଁ ଚେଷ୍ଟା କରିଥିଲେ। ତେବେ ସେମାନଙ୍କର ସମସ୍ତ ପ୍ରୟାସ ପ୍ରାରମ୍ଭରେ ବିଫଳ ହୋଇଥିଲା। ପରିସ୍ଥିତି ଜଟିଳ ହେବାରୁ ପୋଲିସ ଯୁବକଙ୍କ ପ୍ରେମିକାଙ୍କୁ ଘଟଣାସ୍ଥଳକୁ ଡାକିଥିଲା। ପ୍ରେମିକା ପହଞ୍ଚି ପ୍ରେମିକକୁ ବିବାହର ପ୍ରତିଶ୍ରୁତି ଦେବାରୁ ପରେ ଯୁବକଙ୍କ ମନୋଭାବରେ ପରିବର୍ତ୍ତନ ଆସିଥିଲା। ଶେଷରେ ପ୍ରାୟ ୪ ଘଣ୍ଟା ଧରି ଚାଲିଥିବା ଏହି ହାଇଡ୍ରାମାର ଅନ୍ତ ଘଟିଥିଲା ଏବଂ ରାତି ପ୍ରାୟ ୨ଟା ବେଳେ ଯୁବକ ଜଣକ ସୁରକ୍ଷିତ ଭାବେ ଖୁଣ୍ଟରୁ ତଳକୁ ଓହ୍ଲାଇଥିଲେ। ପୁଣିଥରେ ସୋମବାର ଅପରାହ୍ନ ୫ଟାରେ ବିଦ୍ୟୁତ ଖୁଣ୍ଟରେ ଚଢ଼ିଥିଲେ। କିଛି ସମୟ ରହିବା ପରେ ସୁରକ୍ଷିତଭାବେ ତଳକୁ ଓହ୍ଲାଇ ଥିଲେ। ଏଠାରେ ଉଲ୍ଲେଖଯୋଗ୍ୟ ଯେ, ଯୁବତୀ ଜଣଙ୍କ ପୂର୍ବରୁ ବିବାହ କରିଥିଲେ। ତାଙ୍କ ସ୍ବାମୀଙ୍କ ମୃତ୍ୟୁ ପରେ ଉକ୍ତ ଯୁବକଙ୍କ ସହ ତାଙ୍କର ପ୍ରେମ ସମ୍ପର୍କ ଗଢ଼ି ଉଠିଥିଲା। ପରେ ଯୁବତୀ ଜଣକ ବିବାହ କରିବାକୁ ମନା କରିଦେଇଥିଲେ। ପୋଲିସ ଘଟଣାର ଅଧିକ ତଦନ୍ତ କରୁଛି।
Dharitri – Odisha’s No.1 Odia Daily
