ଜଣେ ବିବାହିତ ବ୍ୟକ୍ତି ପଡ଼ୋଶୀ ମହିଳାଙ୍କ ସହିତ ପ୍ରେମସମ୍ପର୍କ ରଖିବା ପାଇଁ ବେଡ୍ରୁମ୍ ତଳେ ଏକ ସୁଡ଼ଙ୍ଗ ତିଆରି କରିଥିଲେ। ମହିଳା ଜଣଙ୍କ ତାଙ୍କ ସ୍ବାମୀଙ୍କ ସହ ଘରେ ରୁହନ୍ତି। ମାତ୍ର ଯେତେବେଳେ ସ୍ବାମୀ କାମ କରିବାକୁ ବାହାରକୁ ଯାଆନ୍ତି ସେହି ସମୟରେ ଏହି ସୁଡ଼ଙ୍ଗ ମଧ୍ୟ ଦେଇ ପ୍ରେମିକ ଜଣକ ମହିଳାଙ୍କ ଘରକୁ ଆସିଥାନ୍ତି। ଏପରି ଘଟଣା ମେକ୍ସିକୋରେ ଦେଖିବାକୁ ମିଳିଛି।
ଏକ ରିପୋର୍ଟ ଅନୁଯାୟୀ, ପ୍ରେମିକଙ୍କ ନାମ ଅଲବର୍ଟୋ। ସେ ମେକ୍ସିକୋର ତିଜୁଆନା ଅଞ୍ଚଳରେ ରୁହନ୍ତି। ତାଙ୍କ ପଡ଼ୋଶୀ ମହିଳା ପାମେଲାଙ୍କ ଘର ପର୍ଯ୍ୟନ୍ତ ଯିବା ପାଇଁ ଏକ ଗୁପ୍ତ ସୁଡ଼ଙ୍ଗ ତିଆରି କରିଥିଲେ। ଏହି ଘଟଣା ଜଣାପଡ଼ିଲା ଯେତେବେଳେ ପାମେଲାଙ୍କ ସ୍ବାମୀ ଜର୍ଜ କାମରୁ ଶୀଘ୍ର ଘରକୁ ଚାଲି ଆସିଥିଲେ। ସେହି ସମୟରେ ପ୍ରେମିକଙ୍କ ସହ ସ୍ତ୍ରୀଙ୍କୁ ଏକାଠି ଦେଖିବାକୁ ପାଇଥିଲେ। ଜର୍ଜ ଦେଖିଲେ ଅଲବର୍ଟୋ ଖଟ ତଳେ କେଉଁଠି ଲୁଚିଗଲେ। ସେ ବେଡ୍ରୁମ୍ରେ ଅଲବର୍ଟଙ୍କୁ ବହୁ ଖୋଜାଖୋଜି କରିଥିଲେ ସୁଦ୍ଧା ତାଙ୍କୁ ପାଇଲେ ନାହିଁ। ଏଥିରେ ଜର୍ଜଙ୍କ ସନ୍ଦେହ ଆହୁରି ବଢ଼ିଗଲା। ଜର୍ଜ ଯେତେବେଳେ ଖଟ ତଳେ ଏକ ସୁଡ଼ଙ୍ଗ ଦେଖିଲେ ଆଶ୍ଚର୍ଯ୍ୟ ହୋଇଗଲେ। ଏହି ସୁଡ଼ଙ୍ଗ ଦେଇ ଜର୍ଜ ଯେତେବେଳେ ତଳକୁ ଗଲେ ସିଧା ଯାଇ ଅଲବର୍ଟୋଙ୍କ ଘରେ ପହଞ୍ଚିଗଲେ।
ଏହି ସୁଡ଼ଙ୍ଗଟି ବେଶ୍ ଭଲ ଭାବେ ତିଆରି ହୋଇଥିଲା। ତେବେ କେତେଦିନ ପୂର୍ବରୁ ଏହା ନିର୍ମାଣ କରାଯାଇଥିଲା ତାହା ଜଣାପଡ଼ିନାହିଁ। ଅଲବର୍ଟୋ ଜର୍ଜଙ୍କୁ ଅନୁରୋଧ କରିଥିଲେ ଏ ବିଷୟରେ ତାଙ୍କ ସ୍ତ୍ରୀ ଙ୍କୁ ନ ଜଣାଇବା ପାଇଁ। ତେବେ ଜର୍ଜ ତାଙ୍କ ଅନୁରୋଧକୁ ପ୍ରତ୍ୟାଖ୍ୟାନ କରି ପରସ୍ପର ମଧ୍ୟରେ ଝଗଡ଼ା ଆରମ୍ଭ କରିଥିଲେ। ଏହା ପରେ ପୋଲିସକୁ ଫୋନ୍ କରିଥିଲେ। ପୋଲିସ ପହଞ୍ଚି ଅଲବର୍ଟୋଙ୍କୁ ଗିରଫ କରିଛି।
