କୁହାଯାଏ, ଭାଗ୍ୟର ପରିବର୍ତ୍ତନ ହେଲେ ରାତାରାତି ଗରିବରୁ ଜଣେ କୋଟିପତି ହୋଇଯାଏ। ଠିକ୍ ଏମିତି ଏକ ଘଟଣା ଘଟିଛି ତାଞ୍ଜାନିଆରେ। ଗାତ ଖୋଳିବା ସମୟରେ ଜଣେ ବ୍ୟକ୍ତିଙ୍କୁ ଏକ ନିଆରା ପଥର ମିଳିଥିଲା, ଯାହାକୁ ବିକି ସେ ୧୪.୭ କୋଟି ଟଙ୍କା ରୋଜଗାର କରିଛନ୍ତି। ମାତ୍ର ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା ବ୍ୟକ୍ତି ଜଣଙ୍କ କିଛିଦିନ ତଳେ ଆଉ ଏକ ପଥର ପାଇଥିଲେ। ତାହା ବିକ୍ରି କରି ୨୩.୫ କୋଟି ଟଙ୍କା ରୋଜଗାର କରିଥିଲେ। ଦୁଇଦୁଇ ଥର କୋଟିକୋଟି ଟଙ୍କାର ପଥର ଜିତିଥିବା ଏହି ବ୍ୟକ୍ତିଙ୍କ ନାମ ହେଉଛି ସାନିନିୟୁ ଲାଜରସ୍। ସେ ତାଞ୍ଜାନିଆର ଏକ ଖଣିରେ କାମ କରୁଥିବା ବେଳେ ଏହି ପଥରଗୁଡ଼ିକୁ ପାଇଥିଲେ। ଯାହାକୁ ତାଞ୍ଜାନାଇଟ୍ ପଥର କୁହାଯାଏ। ତାଞ୍ଜାନିଆ ହେଉଛି ପୂର୍ବ ଆଫ୍ରିକୀୟ ଦେଶ, ଯାହା କେନିଆ ଏବଂ ଜିମ୍ବାଓ୍ବେ ନିକଟରେ ଅବସ୍ଥିତ।
ସାନିନିୟୁ ଯେଉଁ ପଥର ପାଇଥିଲେ, ତାହାର ଓଜନ ୬.୩ କିଲୋଗ୍ରାମ ଥିଲା। ସେ ଏହାକୁ ଗତ ସୋମବାର ଏକ ସ୍ବତନ୍ତ୍ର ସମାରୋହରେ ୧୪.୭ କୋଟିରେ ବିକ୍ରି କରିଛନ୍ତି। ଏହାକୁ ଦେଖିବା ପାଇଁ ଶତାଧିକ ଲୋକ ଉପସ୍ଥିତ ଥିଲେ।
ସାନିନୟୁଙ୍କର ୪ ପତ୍ନୀ ଏବଂ ୩୦ ପିଲା ଅଛନ୍ତି। ପଥର ବିକି ଏତେ ଟଙ୍କା ରୋଜଗାର କରିବା ପରେ ସେ କହିଛନ୍ତି, କିଛି ଟଙ୍କା ଦେଇ ସେ ଏକ ସ୍କୁଲ ଏବଂ ଶପିଂ ମଲ୍ ନିର୍ମାଣ କରିବେ। ସେ ଏହା ମଧ୍ୟ କହିଛନ୍ତି, ଏତେ ଟଙ୍କା ରୋଜଗାର କଲେ ମଧ୍ୟ ସେ ନିଜ ମୂଳ କର୍ମକୁ ଛାଡ଼ିବେ ନାହିଁ। ଅର୍ଥାତ୍ ପୂର୍ବପରି ରଖିଥିବା ୨୦୦୦ ଗୋରୁଙ୍କ ଯତ୍ନ ନେବେ।
