କୋଲକାତା,୨୫ା୨: ପଶ୍ଚିମବଙ୍ଗ ଭାଜପା ମୁଖ୍ୟ ଶୁଭେନ୍ଦୁ ଅଧିକାରୀ ସନ୍ଦେଶଖାଲି ମାମଲାର ମୁଖ୍ୟ ଅଭିଯୁକ୍ତ ଶେଖ୍ ଶାହାଜାହାନଙ୍କୁ ଗିରଫ କରିବାରେ ବିଳମ୍ବକୁ ନେଇ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ କଟାକ୍ଷ କରିଛନ୍ତି। ଶେଖ୍ ଶାହାଜାହାନଙ୍କୁ ଗିରଫ କରିବାରେ ବିଫଳ ହୋଇଥିବାରୁ ମମତାଙ୍କୁ ତେର୍ଚ୍ଛାବାଣ ମାରିଛନ୍ତି ଶୁଭେନ୍ଦୁ।
ସେ କହିଛନ୍ତି, ମମତା ଆଉ ଦିଦି ନୁହନ୍ତି, ସେ ବର୍ତ୍ତମାନ ଆଣ୍ଟି ହୋଇଗଲେଣି। ତେଣୁ ତାଙ୍କୁ ଦିଦି କହିବା ବନ୍ଦ କରାଯାଉ। ବିଧାନସଭା ନିର୍ବାଚନରେ ଯେତେବେଳେ ମୁଁ ତାଙ୍କୁ ନନ୍ଦିଗ୍ରାମରେ ପରାସ୍ତ କରିଥିଲି, ସେତେବେଳେ ସେ ମୋ ଉପରେ ରାଗି ଯାଇ ମୋ ବିରୋଧରେ ୪୨ଟି ମାମଲା ଦାୟର କରିଥିଲେ। ସେ ଜଣେ ଅତି ନିଷ୍ଠୁର ମହିଳା ବୋଲି କହି ଶୁଭେନ୍ଦୁ ତାଙ୍କ ଉପରେ ବର୍ଷିଛନ୍ତି।
ସେ କହିଛନ୍ତି, ମମତା କେବେ ବି ଶାହାଜାହାନଙ୍କୁ ଗିରଫ କରିବେ ନାହିଁ। କାରଣ ଏହା କରିବା ଦ୍ୱାରା ଟିଏମ୍ସି ବସିରହାଟ ଆସନ ହରାଇବ। ସେ କହିଛନ୍ତି, ପୋଲିସ ଭୋଟ ନିୟନ୍ତ୍ରଣ କରୁଥିବାରୁ ଶେଖ ଶାହାଜାହାନ୍ଙ୍କୁ ଗିରଫ କରିବ ନାହିଁ। ମାର୍ଚ୍ଚ ୬ରେ ସିଜେଆଇର ବେଞ୍ଚରେ ଶୁଣାଣି ହେବ।
