ନୂଆଦିଲ୍ଲୀ, ୨୮ା୬ (ପି.ଟି.): ଦେଶର ୫୪ଟି ଜାତୀୟ କ୍ରୀଡ଼ା ମହାସଂଘ (ଏନ୍ଏସ୍ଏଫ୍)ଉପରୁ ବର୍ଷକ ପାଇଁ ସ୍ବୀକୃତି ପ୍ରତ୍ୟାହାର କରାଯାଇଥିବାରୁ ଅଲ୍ ଇଣ୍ଡିଆ କାଉନ୍ସିଲ ଅଫ୍ ସ୍ପୋଟର୍ସ ସଭାପତି ଭି.କେ. ମାଲହୋତ୍ରା ଚିନ୍ତା ପ୍ରକଟ କରିଛନ୍ତି। ତୁରନ୍ତ ଦିଲ୍ଲୀ ହାଇକୋର୍ଟ ଏବଂ ସୁପ୍ରିମକୋର୍ଟରେ ଆବେଦନ ଲାଗି ଜଣେ ଆଟର୍ନି ଜେନେରାଲ (ଏଜି)ଙ୍କୁ ନିଯୁକ୍ତି ଦେବା ପାଇଁ ସେ କ୍ରୀଡ଼ାମନ୍ତ୍ରୀ କିରେନ ରିଜିଜୁଙ୍କୁ ଅନୁରୋଧ କରିଛନ୍ତି। ଦିଲ୍ଲୀ ହାଇକୋର୍ଟଙ୍କ ନିର୍ଦ୍ଦେଶକ୍ରମେ କ୍ରୀଡ଼ା ମନ୍ତ୍ରଣାଳୟ ମଙ୍ଗଳବାର ୫୪ଟି ଜାତୀୟ କ୍ରୀଡ଼ା ମହାସଂଘ ଉପରୁ ସାମୟିକ ବାର୍ଷିକ ସ୍ବୀକୃତି ପ୍ରତ୍ୟାହାର କରିଛି। ପୁନଃ ନିର୍ଦ୍ଦେଶ ନ ପର୍ଯ୍ୟନ୍ତ ସ୍ଥିତାବସ୍ଥା ବଜାୟ ରଖିବା ଲାଗି ଏଥିରେ କୁହାଯାଇଥିଲା। କ୍ରୀଡ଼ାମନ୍ତ୍ରୀ କିରେନ ରିଜିଜୁଙ୍କ ନିକଟକୁ ମାଲହୋତ୍ରା ପଠାଇଥିବା ଚିଠିରେ ଉଲ୍ଲେଖ କରିଛନ୍ତି ଯେ, ବର୍ତ୍ତମାନ କୋଭିଡ୍-୧୯ ମହାମାରୀ ଯୋଗୁ ବିଶ୍ୱ କ୍ରୀଡ଼ା ସଂଘର୍ଷ ଚଳାଇଛି। ସ୍ବୀକୃତି ପ୍ରତ୍ୟାହାର ଦ୍ୱାରା ଆସନ୍ତାବର୍ଷ ଅଲିମ୍ପିକ ଗେମ୍ସ ପାଇଁ ପ୍ରସ୍ତୁତି ଚଳାଇଥିବା ଭାରତୀୟ ଆଥଲେଟଙ୍କ ଉପରେ ପ୍ରତିକୂଳ ପ୍ରଭାବ ପକାଇବ। ଭେଟେରାନ ସ୍ପୋଟର୍ସ ପ୍ରଶାସକ ଦର୍ଶାଇଛନ୍ତି ଭାରତୀୟ ଅଲିମ୍ପିକ ଆସୋସିଏଶନ (ଆଇଓଏ) ଅବା ଅନ୍ତର୍ଜାତୀୟ ମହାସଂଘଗୁଡ଼ିକ ସେମାନଙ୍କ ଉପରୁ ସ୍ବୀକୃତି ପ୍ରତ୍ୟାହାର କରି ନାହାନ୍ତି। ତେଣୁ ମନ୍ତ୍ରୀ ତୁରନ୍ତ ଜଣେ ଆଟର୍ନି ଜେନେରାଲ/ ସଲିସିଟର ଜେନେରାଲଙ୍କ ନିଯୁକ୍ତିର ବ୍ୟବସ୍ଥା କରି ତାଙ୍କ ଜରିଆରେ ହାଇକୋର୍ଟଙ୍କ ନିର୍ଦ୍ଦେଶନାମାକୁ ରଦ୍ଦ କରିବା ଲାଗି ହାଇକୋର୍ଟ ଏବଂ ସୁପ୍ରିମକୋର୍ଟରେ ଆବେଦନର ବ୍ୟବସ୍ଥା କରନ୍ତୁ। ବାର୍ଷିକ ସ୍ବୀକୃତି ପାଇବା ଦ୍ୱାରା ଜାତୀୟ କ୍ରୀଡ଼ା ମହାସଂଘଗୁଡ଼ିକ ଟ୍ରେନିଂ ଓ ପ୍ରତିଯୋଗିତା ପାଇଁ ସରକାରଙ୍କଠାରୁ ଆର୍ଥିକ ଅନୁଦାନ ଏବଂ ସହାୟତା ପାଇଥାନ୍ତି। କରୋନା ମହାମାରୀ ବ୍ୟାପିବା ପରେ ମାର୍ଚ୍ଚ ମାସଠାରୁ ସମଗ୍ର ଦେଶରେ କ୍ରୀଡ଼ା କାର୍ଯ୍ୟକଳାପ ସ୍ଥାଣୁ ପାଲଟିଯାଇଛି। ଖେଳ ଆରମ୍ଭ ହେବାମାତ୍ରେ ଅଲିମ୍ପିକ୍ସ ପ୍ରସ୍ତୁତି କାର୍ଯ୍ୟ ଆଗେଇବ। ହେଲେ ସ୍ବୀକୃତି ପ୍ରତ୍ୟାହାରଜନିତ ପରିସ୍ଥିତି ଯୋଗୁ ପ୍ରଶାସନିକ ନିଷ୍ପତ୍ତିରେ ବିଳମ୍ବ ଘଟିପାରେ। ଆଥଲେଟ୍ମାନଙ୍କ ଟ୍ରେନିଂ କାର୍ଯ୍ୟରେ ଏହା ବାଧା ଉପୁଜାଇପାରେ ବୋଲି ମାଲହୋତ୍ରା କହିଛନ୍ତି।
