ନୂଆଦିଲ୍ଲୀ,୨୮।୬: ଜେଟ୍ ଏୟାରଓ୍ବେଜର ପ୍ରମୋଟର ନରେଶ ଗୋୟଲ ଏବଂ ତାଙ୍କ ସ୍ତ୍ରୀ ଅନୀତାଙ୍କ ବିରୋଧରେ ତଦନ୍ତ ବନ୍ଦକୁ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ବିରୋଧ କରିଥିବା ଜଣାପଡିଛି। ବର୍ତ୍ତମାନ ଜେଟ୍ ଏୟାରଓ୍ବେଜ ବନ୍ଦ ହୋଇ ପଡିଛି। ନରେଶ ଗୋୟଲଙ୍କ ବିରୋଧରେ ଚାଲିଥିବା ଠକେଇ ମାମଲାର କ୍ଲୋଜର ରିପୋର୍ଟ ମୁମ୍ବାଇ ପୋଲିସ ଫାଇଲ କରିଛି। ଏହି ମାମଲାର ଗୁରୁତ୍ୱପୂର୍ଣ୍ଣ ତଥ୍ୟକୁ ପୋଲିସ ଗ୍ରହଣ କରୁ ନ ଥିବା ଇଡି ପ୍ରକାଶ କରିଛି। ଏହାକୁ ନେଇ ଏହି ପ୍ରମୁଖ ଏଜେନ୍ସି କୋର୍ଟରେ ଏକ ହସ୍ତକ୍ଷେପ ଆବେଦନ କରିଛି। ଗୋୟଲଙ୍କ ବିରୋଧରେ ଚଳିତ ବର୍ଷ ଫେବୃୟାରୀରେ ୪୬ କୋଟି ଟଙ୍କାର ଏକ ଠକେଇ ମାମଲା ହୋଇଥିଲା। ଏହି ମାମଲାରେ କୌଣସି ଠୋସ୍ ପ୍ରମାଣ ନ ଥିବା ଦର୍ଶାଇ ପୋଲିସ କ୍ଲୋଜର ରିପୋର୍ଟ ପ୍ରଦାନ କରିଛି। ତାଙ୍କ ବିରୋଧରେ ଠିକ୍ ତଥ୍ୟ ପ୍ରମାଣକୁ ବ୍ୟବହାର କରିବାରେ ପୋଲିସ ବିଫଳ ହୋଇଛି ବୋଲି ଇଡି ଆବେଦନରେ କହିଛି। ଏହି ମାମଲାରେ ଗୋୟଲଙ୍କ ବିରୋଧରେ ଆକବର ଟ୍ରାଭେଲ ଇଣ୍ଡିଆ ପ୍ରାଇଭେଟ ଲିମିଟେଡ୍ ଅଭିଯୋଗ ଆଣିଥିଲା। କ୍ଲୋଜର ରିପୋର୍ଟକୁ ଆକବର ଟ୍ରାଭେଲ୍ସ ପକ୍ଷରୁ ମଧ୍ୟ ଚ୍ୟାଲେଞ୍ଜ କରାଯାଇଛି। ପୋଲିସ ଠିକ୍ ତଦନ୍ତ ନ କରି ଏଭଳି ରିପୋର୍ଟ ପ୍ରଦାନ କରିଛି ବୋଲି ଆକବର ଟ୍ରାଭେଲ ପକ୍ଷରୁ ମାମଲା ଲଢୁଥିବା ଓକିଲ ଧର୍ମେଶ ଜୋଷୀ କହିଛନ୍ତି। ବିଗତ ଦିନଗୁଡିକରେ ଜେଟ ଏୟାର ଏହି ସଂସ୍ଥା ସହ ୯୦୦ କୋଟି ଟଙ୍କାର କାରବାର କରିଛି। ବିମାନ କମ୍ପାନୀ କ୍ଷତିରେ ଚାଲିଥିଲେ ମଧ୍ୟ ନରେଶ ଗୋୟଲ ବୁକିଂ ବାବଦ ଏହି ଅର୍ଥ ନେଇ ଆଉ ଫେରାଇ ନାହାନ୍ତି। ବେଆଇନ କଳାଟଙ୍କା କାରବାର ନିରୋଧୀ ଆଇନ ଏବଂ ବିଦେଶୀ ବିନିମୟ ପରିଚାଳନା ଆଇନରେ ଇଡି ନରେଶ ଗୋୟଲ ଏବଂ ଜେଟ ଏୟାରଓ୍ବେଜ ବିରୋଧରେ ତଦନ୍ତ ଜାରି ରଖିଛି।
