ରାୟଗଡ଼ା,୩୧/୩(ଆଶିଷ ରଞ୍ଜନ ପଣ୍ଡା): ରାୟଗଡ଼ା ନିର୍ବାଚନମଣ୍ଡଳୀରେ ରାଜ୍ୟର ଏକମାତ୍ର ସ୍ୱାଧୀନ ବିଧାୟକ ଭାବେ ୨୦୧୯ରେ ବିଜୟୀ ହୋଇଥିଲେ ମକରନ୍ଦ ମୁଦୁଲି । ବିଜେଡ଼ିର ପ୍ରାର୍ଥି ତଥା ପୂର୍ବତନ ମନ୍ତ୍ରୀ ଲାଲବିହାରୀ ହିମିରିକା, କଂଗ୍ରେସର ବରିଷ୍ଠ ନେତା ଆପଲସ୍ୱାମୀ କାଡ୍ରାକା ଓ ଭାଜପାର ବସନ୍ତ ଉଲାକାଙ୍କୁ ପଛରେ ପକାଇ ଦେଇଥିଲେ । ଯାହା ସମସ୍ତଙ୍କୁ ଚକିତ କରିଥିଲା । ନିର୍ବାଚନରେ ୫୨୮୪୪ ଖଣ୍ଡ ଭୋଟ ପାଇ ବିଜେଡ଼ି ପ୍ରାର୍ଥି ଲାଲବିହାରୀ ହିମିରିକାଙ୍କୁ ୪୮୭୦ଭୋଟରେ ପରାସ୍ତ କରିଥିଲେ ।
ଏହାପୂର୍ବରୁ ସେ ୨୦୧୪ ନିର୍ବାଚନରେ କଂଗ୍ରେସରୁ ପ୍ରାର୍ଥି ହୋଇ ୬୧୩୪୩ ଖଣ୍ଡ ଭୋଟ ପାଇ ଦ୍ୱିତୀୟ ରହି ବିଜେଡ଼ି ପ୍ରାର୍ଥି ଲାଲ ବିହାରୀ ହିମିରିକାଙ୍କ ଠାରୁ ୮୨୮୬ ଭୋଟରେ ପରାସ୍ତ ହୋଇଥିଲେ । ତେବେ ୨୦୧୯ରେ ବିଧାୟକ ହେବା ପରେ କିନ୍ତୁ ପରବର୍ତି ସମୟରେ ଦଳରେ ସାମିଲ ହୋଇନଥିଲେ ମଧ୍ୟ ବିଜେଡ଼ି ଶିବିରରେ ଦେଖିବାକୁ ମିଳିଥିଲା ମକରନ୍ଦଙ୍କୁ । ଆଗାମୀ ସାଧାରଣ ନିର୍ବାଚନରେ ବିଜେଡ଼ି ପକ୍ଷରୁ ବିଧାୟକ ପ୍ରାର୍ଥି ହେବା ନେଇ ବିଜେଡ଼ି କର୍ମୀ ମହଲରେ ଚର୍ଚ୍ଚା ମଧ୍ୟ ଉଠିଥିଲା ।
ତେବେ ବର୍ତମାନ ଆଗାମୀ ସାଧାରଣ ନିର୍ବାଚନରେ ମକରନ୍ଦଙ୍କୁ ପଛରେ ପକାଇ ବିଜେଡ଼ିରୁ ପ୍ରାର୍ଥିନୀ ହୋଇଛନ୍ତି ଅନୂସୟା ମାଝି । ଯାହାଫଳରେ ବର୍ତମାନ ମକରନ୍ଦଙ୍କୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠିଛି। ଚା’ ଖଟି ଠାରୁ ଆରମ୍ଭ କରି ସମସ୍ତ ସ୍ଥାନରେ ନିର୍ବାଚନ ଆଲୋଚନାରେ ଗୋଟିଏ କଥା ଆଲୋଚନା ଧରିଛି ଯେ, ଏଥର କଣ କରିବେ ମକରନ୍ଦ । ବିଜେଡ଼ି ପ୍ରାର୍ଥିଙ୍କୁ ସମର୍ଥନ କରିବେ ନା ସ୍ୱାଧୀନ ଭାବେ ଲଢ଼ିବେ । ଅନ୍ୟପଟେ ଅନୂସୟାଙ୍କୁ ପ୍ରାର୍ଥି ଘୋଷଣା କରିବା ପରେ ଦଳରେ ତାଙ୍କ ପ୍ରାର୍ଥିତ୍ୱକୁ ନେଇ ତୀବ୍ର ବିରୋଧ ଓ ଅସନ୍ତୋଷ ସୃଷ୍ଟି ହୋଇଛି ।
ପ୍ରାର୍ଥି ପରିବର୍ତ୍ତନ ପାଇଁ ଦାବି କରିଛନ୍ତି ନିର୍ବାଚନମଣ୍ଡଳୀର କର୍ମୀ, ଦଳୀୟ ନେତା ଓ ନିର୍ବାଚିତ ପ୍ରତିନିଧି । ବର୍ତମାନ ଅନୂସୟାଙ୍କ ପ୍ରାର୍ଥିତ୍ୱକୁ ନେଇ ଦଳରେ ବିଦ୍ରୋହ ସୃଷ୍ଟି ହୋଇଥିବାରୁ ମକରନ୍ଦ ଏହାର ଲାଭ ଉଠାଇବାକୁ ପୁଣି ଥରେ ସ୍ୱାଧୀନ ଭାବେ ନିର୍ବାଚନ ଲଢ଼ିପାରନ୍ତି ବୋଲି ରାଜନୈତିକ ସମୀକ୍ଷକମାନେ ମତ ପ୍ରକାଶ କରିଛନ୍ତି । ଏନେଇ ମକରନ୍ଦଙ୍କୁ ପଚାରିବାରୁ ଜନସାଧାରଣ ଓ ସମର୍ଥକ ଚାହିଁଲେ ଜନମାନସ ସେବା ପାଇଁ ପୁଣି ଥରେ ସ୍ୱାଧୀନ ଭାବେ ନିର୍ବାଚନ ଲଢ଼ିବେ ବୋଲି କହିଛନ୍ତି ।
