ମ୍ୟୁନିଚ,୧୩।୨: ଆମେରିକା-ୟୁକ୍ରେନ ବୈଠକ ପୂର୍ବରୁ ବଡ଼ ଅଘଟଣ। ହେଲା ବଡ଼ ଦୁର୍ଘଟଣା। ଜର୍ମାନୀର ମ୍ୟୁନିଚରେ ଫେବୃଆରୀ ୧୪ରେ ଏକ ସୁରକ୍ଷା ସମ୍ମିଳନୀ ଅନୁଷ୍ଠିତ ହେବାକୁ ଯାଉଛି। ଯେଉଁଥିରେ ଆମେରିକା ସହ ୟୁକ୍ରେନ ମଧ୍ୟରେ ବୈଠକ ବସିବାକୁ ଯାଉଛି। କିନ୍ତୁ ଏସବୁ ଭିତରେ ଏଠାରେ ଏକ ବଡ଼ ଦୁର୍ଘଟଣା ଘଟିଛି। ଜର୍ମାନୀ ସଡକରେ ଏକ କାର ଲୋକ ଗହଳିକୁ ମାଡି ଯାଇଛି। ଯେଉଁଥିରେ କାର୍ଟି ଲୋକଙ୍କୁ ଧକ୍କା ଦେବାରୁ ୨୦ଜଣ ଗୁରୁତର ଆହତ ହୋଇଛନ୍ତି।
କହିରଖୁଛୁ କି, ଆସନ୍ତାକାଲିର ଏହି ବୈଠକରେ ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ ଏବଂ ୟୁକ୍ରେନୀୟ ରାଷ୍ଟ୍ରପତି ଭ୍ଲାଦିମିର ଜେଲେନ୍ସି ଯୋଗ ଦେବାକୁ ଯାଉଛନ୍ତି। ଏହି ଘଟଣାଟି ମ୍ୟୁନିଚ୍ର କେନ୍ଦ୍ରୀୟ ରେଳ ଷ୍ଟେସନ ନିକଟରେ ଡାଚାଉର ଷ୍ଟ୍ରାସ ଏବଂ ସିଡଲଷ୍ଟ୍ରାସ ଅଞ୍ଚଳରେ ଘଟିଛି। ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଘଟଣାସ୍ଥଳରୁ ଡ୍ରାଇଭରଙ୍କୁ ଅଟକ ରଖିଛି। ସ୍ଥାନୀୟ ଗଣମାଧ୍ୟମ ଅନୁଯାୟୀ, ଏକ ଟ୍ରେଡ ୟୁନିଅନ ଦ୍ୱାରା ଆୟୋଜିତ ଏକ ପ୍ରଦର୍ଶନ ସମୟରେ ଏହି ଘଟଣା ଘଟିଥିଲା। ଏଠାରେ ଏକ ଧଳା କାର ପ୍ରଦର୍ଶନକାରୀଙ୍କ ମଧ୍ୟରେ ପ୍ରବେଶ କରି ଅନେକ ଲୋକଙ୍କୁ ଧକ୍କା ଦେଇଥିଲା।
