ଭଞ୍ଜନଗର,୧।୧୦(ଡି.ଏନ.ଏ): ବେଲଗୁଣ୍ଠା ଓ ଭଞ୍ଜନଗର ଆମ ପୋଲିସ ସମିତିର ସଚେତନତା ବୈଠକ ପୃଥକ ଭାବେ ଶୁକ୍ରବାର ଅନୁଷ୍ଠିତ ହୋଇଛି। ବେଲଗୁଣ୍ଠା ପୋଲିସ ପକ୍ଷରୁ ଇଙ୍ଗିନାଠିରେ ହୋଇଥିବା ବୈଠକରେ ଥାନା ଅଧିକାରୀ ପି.କେ.ସାହୁ ଅଧ୍ୟକ୍ଷତା କରିଥିଲେ । ସେହିପରି ଭଞ୍ଜନଗର ଆମ ପୋଲିସ ସମିତି ପକ୍ଷରୁ ଏନଏସି ସମ୍ମିଳନୀ କକ୍ଷରେ ସଚେତନତା ବୈଠକ ହୋଇଥିଲା। ଏଥିରେ ଏସ୍ଡ଼ିପିଓ ଶୁଭ୍ରାଂଶୁ ମିଶ୍ର ଅଧ୍ୟକ୍ଷତା କରିଥିଲେ। ଥାନା ଅଧିକାରୀ ଧିରେଶ ଦାସ, ନିର୍ବାହୀ ଅଧିକାରୀ ଆଶୁତୋଷ ଗୌରବକର, ଅବସରପ୍ରାପ୍ତ କଲେଜ ଅଧ୍ୟକ୍ଷ କୃତିବାସ ବିଶ୍ୱାଳ, ଡ଼. ପୂର୍ଣ୍ଣଚନ୍ଦ୍ର ତ୍ରିପାଠୀ, ଅବସରପ୍ରାପ୍ତ ରେଞ୍ଜର ଅନୁପମ ବାନାର୍ଜି, ବରିଷ୍ଠ ନାଗରିକ ଅନ୍ତର୍ଯ୍ୟାମି ତ୍ରିପାଠୀ, ରବି ନାରାୟଣ ମହାନ୍ତି, ମୃତ୍ୟୁଞ୍ଜୟ ସୁବୁଦ୍ଧି, ସୁଶାନ୍ତ ମହାପାତ୍ର, ବିଷ୍ଣୁପ୍ରିୟା ସେନାପତି ପ୍ରମୁଖ ଯୋଗଦେଇ ଆଲୋଚନାରେ ଭାଗ ନେଇଥିଲେ। ଦୁର୍ଗାପୂଜାରେ କିଭଳି ଶାନ୍ତିଶୃଙ୍ଖଳା ବଜାୟ ରହିବ, ଟ୍ରାଫିକ ସମସ୍ୟା ନ ରହିବ ସେ ଉପରେ ଆଲୋଚନା ହୋଇଥିଲା। ଦୂର୍ଗା ପୂଜା ସମୟରେ ଭଞ୍ଜନଗର ସହରରେ ଭିଡ ହେବ। ଏହି ସମୟରେ ଚୋରି ହୋଇପାରେ। ତେଣୁ ଯେଉଁମାନେ ଅଳଙ୍କାର ପିନ୍ଧି ଆସିବେ ସେମାନେ ସତର୍କତା ଅବଲମ୍ବନ କରନ୍ତୁ। ଏଥିପ୍ରତି ମହିଳା ମାନେ ଦୃଷ୍ଟି ଦେବା ପାଇଁ ବୈଠକରେ ବକ୍ତାମାନେ ଅନୁରୋଧ କରିଥିଲେ। ଚୋରା ନିଶାଦ୍ରବ୍ୟ କାରବାର କେତେକ ଅଞ୍ଚଳରେ ବଢୁଛି। ଭଞ୍ଜନଗର ରେ ଏହା କମଏ । ତଥାପି ଏଥିପ୍ରତି ଦୃଷ୍ଟି ଦିଆଯିବ। ଭଞ୍ଜନଗର ସହର ଏକ ସୁରକ୍ଷିତ ସହର। ଅନ୍ୟ ଅଞ୍ଚଳ ଅପେକ୍ଷା ଏଠାରେ ଅପରାଧ କମ ଅଛି। ଲୋକଙ୍କ ସୁରକ୍ଷା ହେଉଛି ଆମର କର୍ତ୍ତବ୍ୟ। ଏଥିପ୍ରତି ଦୃଷ୍ଟି ଦିଆଯାଉଛି ବୋଲି ଏସଡିପିଓ ଶୁଭ୍ରାଂଶୁ ମିଶ୍ର କହିଥିଲେ। ଅତିରିକ୍ତ ଥାନା ଅଧିକାରିଣୀ ବିଦ୍ୟା ଭାରତୀ ନାୟକ, ସଭ୍ୟା ଗୀତା ସୁବୁଦ୍ଧି, ଲାବଣ୍ୟ ବେହେରା, ଯନ୍ତ୍ରୀ ସୁଶାନ୍ତ ସାହୁ, ଜଗଦୀଶ ପାଣିଗ୍ରାହୀ ପ୍ରମୁଖ ଅତିଥି ଭାବେ ଯୋଗଦେଇଥିଲେ। ଅଶୋକ ମହାପାତ୍ର ଭଞ୍ଜ ସଙ୍ଗୀତ ପରିବେଷଣ କରିଥିଲେ। ରବି ମହାନ୍ତି ଧନ୍ୟବାଦ ପ୍ରଦାନ କରିଥିଲେ।
