ନୂଆଦିଲ୍ଲୀ,୨୧।୮: ଶ୍ରୀଲଙ୍କାର ମହାନ ଅଫ୍ ସ୍ପିନର ମୁଥିୟା ମୁରଲୀଧରନ୍ ଭାରତୀୟ କ୍ରିକେଟର ଐତିହାସିକ ମୁହୂର୍ତ୍ତକୁ ମନେ ପକାଇଛନ୍ତି। ଇଏସ୍ପିଏନ୍କ୍ରିକ୍ଇନ୍ଫୋ ସହ ସାକ୍ଷାତକାରରେ ମୁରଲୀଧରନ୍ କହିଛନ୍ତି, ଯେତେବେଳେ ମୁଁ ଚେନ୍ନାଇରେ ମହେନ୍ଦ୍ର ସିଂହ ଧୋନୀଙ୍କୁ ବୋଲିଂ କରିଥିଲି, ତାଙ୍କୁ ଭଲ ଭାବେ ବୁଝିପାରିଥିଲି। ୨୦୧୧ ବିଶ୍ୱକପ୍ରେ ମୋର ‘ଦୁସ୍ରା’ ବୋଲିଂକୁ ନେଇ ଯୁବରାଜ ସିଂହଙ୍କର କୌଣସି ଧାରଣା ନ ଥିଲା। ସେ ପ୍ରଥମେ ବ୍ୟାଟିଂ କରିବାକୁ ଆସିଥାନ୍ତେ, ହେଲେ ମୁଁ ବୋଲିଂ କରିବା ଯୋଗୁ ଧୋନୀ ବଡ଼ ନିଷ୍ପତ୍ତି ନେଇ ପ୍ରଥମେ ବ୍ୟାଟିଂ କରିବାକୁ ପଡ଼ିଆକୁ ଓହ୍ଲାଇଥିଲେ ବୋଲି ମୁରଲୀଧରନ୍ କହିଛନ୍ତି।
କହିରଖୁଛୁ, ଫାଇନାଲରେ ଧୋନୀ ପ୍ରଥମେ ଖେଳିବାକୁ ଆସିବା ନିଷ୍ପତ୍ତି ସେତେବେଳେ ଅନେକଙ୍କୁ ଚକିତ କରିଥିଲା। ହେଲେ ସେ ଉକ୍ତ ମ୍ୟାଚ୍ରେ ଅପରାଜିତ ୯୧ ରନ୍ କରିଥିଲେ। ଏଥିରେ ଭାରତ ବିଜୟୀ ମଧ୍ୟ ହୋଇଥିଲା। ଦୀର୍ଘ ୨୮ ବର୍ଷ ପରେ ଧୋନୀଙ୍କ ନେତୃତ୍ୱରେ ଭାରତ ବିଶ୍ୱ ଚାମ୍ପିୟନ ହେବାର ଗୌରବ ଅର୍ଜନ କରିଥିଲା। ଏହି ବିଶ୍ୱକପ୍କୁ ଧୋନୀ ଭାରତର ମହାନ ବ୍ୟାଟ୍ସମ୍ୟାନ୍ ସଚିନ ତେନ୍ଦୁଲକରଙ୍କୁ ଉତ୍ସର୍ଗ କରିଥିଲେ। ତେବେ ପୂର୍ବରୁ ଧୋନୀଙ୍କ ନିଷ୍ପତ୍ତି ଏକ ମାଷ୍ଟରଷ୍ଟ୍ରୋକ୍ ପ୍ରମାଣିତ ହୋଇଥିବା ଅନେକେ କହୁଥିବା ବେଳେ ଏବେ ମୁରଲୀଧରନଙ୍କ କଥା କାହାଣୀକୁ ଭିନ୍ନ ମୋଡ଼ ଦେଇଛି।
