ବଲାଙ୍ଗୀର, ୨୫।୧(ସୁନିଲ କୁମାର ମହାନ୍ତି) : ଆସନ୍ତା ୨୭ ଜାନୁଆରୀ ଠାରୁ ୧ ଫେବୃୟାରୀ ପର୍ଯ୍ୟନ୍ତ ମହାରାଜା ରାଜେନ୍ଦ୍ର ସିଂଦେଓ ମେମୋରିଆଲ ସର୍ବଭାରତୀୟ ଫୁଟବଲ ଟୁର୍ଣାମେଣ୍ଟ ବଲାଙ୍ଗୀର ଗାନ୍ଧୀ ଷ୍ଟାଡ଼ିୟମ୍ ଠାରେ ଆରମ୍ଭ ହେବ । ମହାରାଜା ଫୁଟବଲ ଏସୋସିଏସନ୍ ବଲାଙ୍ଗୀର ସହଯୋଗରେ ଏହି ଟୁର୍ନାମେଣ୍ଟ କରାଯାଉଛି । ଟୁର୍ଣ୍ଣାମେଣ୍ଟ କମିଟି ଅଧ୍ୟକ୍ଷ ଅନଙ୍ଗ ଉଦୟ ସିଂଦେଓ, ସଭାପତି ବଲାଙ୍ଗୀର ବିଧାୟକ କଳିକେଶ ନାରାୟଣ ସିଂଦେଓ ଅଛନ୍ତି । ବଲାଙ୍ଗୀର ବିଧାୟକ ସିଂଦେଓଙ୍କ ତତ୍ତ୍ୱାବଧାନରେ ଏହି ଫୁଟବଲ ଟୁର୍ଣାମେଣ୍ଟ ଆୟୋଜିତ କରାଯାଉଛି ।
ଏହି ଟୁର୍ନାମେଣ୍ଟରେ ରାଜ୍ୟ ତଥା ରାଜ୍ୟ ବାହାରର ୮ଟି ଦଳ ଅଂଶଗ୍ରହଣ କରିବେ । ଏଥିରେ ଭିଲେଇ, କଲିକତା, ରାଉରକେଲା, ଫୁଲବାଣୀ, ବରଗଡ଼, ସମ୍ବଲପୁର କୁଚିନ୍ଡ଼ା, ସୁବର୍ଣ୍ଣପୁର ଓ ବଲାଙ୍ଗୀର ମହାରାଜା ଫୁଟବଲ ଆସୋସିଏସନ୍ ଭାଗ ନେଇଛନ୍ତି । ପ୍ରତ୍ୟେକ ଦିନ ‘ଏ’ ପୁଲର ଦୁଇଟି ମ୍ୟାଚ୍ ଅନୁଷ୍ଠିତ ହେବ । ପ୍ରଥମଟି ବଲାଙ୍ଗୀର ସହିତ ସମ୍ବଲପୁର କୁଚିନ୍ଡ଼ା ମଧ୍ୟରେ ଓ ଦ୍ଵିତୀୟଟି ଫୁଲବାଣୀ ସହିତ ରାଉରକେଲା ମଧ୍ୟରେ ମ୍ୟାଚ୍ ଅନୁଷ୍ଠିତ ହେବ । ପ୍ରଥମ ସେମିଫାଇନାଲ ୨୮ ଜାନୁୟାରୀରେ ଖେଳାଯିବ । ସେହିପରି ‘ବି’ ପୁଲର ପ୍ରଥମ ମ୍ୟାଚ୍ ୨୯ରେ ଭିଲାଇ, ଛତିଶଗଡ଼ ସହିତ ସୁବର୍ଣ୍ଣପୁର, ୩୦ ଜାନୁଆରୀ କୋଲକତା, ପଶ୍ଚିମବଙ୍ଗ ସହିତ ବରଗଡ଼ ଦଳ ମଧ୍ୟରେ ମ୍ୟାଚ ଖେଳାଯିବ ।
ଜାନୁଆରୀ ୩୧ରେ ସେମିଫାଇନାଲ ଓ ୧ ଫେବୃଆରିରେ ଫାଇନାଲ ମ୍ୟାଚର ମୁକାବିଲା ହେଵ ବୋଲି ମହାରାଜା ରାଜେନ୍ଦ୍ର ନାରାୟଣ ସିଂଦେଓ ମେମୋରିଆଲ ପକ୍ଷରୁ ଏକ ସାମ୍ବାଦିକ ସମ୍ମୀଳନୀ କରାଯାଇ କାର୍ଯ୍ୟକାରୀ ବିଦୁଭୂଷଣ ତ୍ରିପାଠୀ, ଉପସଭାପତି ଶମ୍ଭୁ ନାଗ ସୂଚନା ଦେଇଛନ୍ତି ।
