ଫୁଲବାଣୀ ଅଫିସ, ୧୩ା୪: କନ୍ଧମାଳ ଜିଲା ଫୁଲବାଣୀ ଗ୍ରାମ୍ୟ ନିର୍ମାଣ ବିଭାଜନ(ଆରଡି) ବିଭାଗ ଅଧୀନରେ ଚାଲିଥିବା ଏକ ବକ୍ସ କଲ୍ଭର୍ଟ(ପୋଲ) କାମ ଅତ୍ୟନ୍ତ ନିମ୍ନମାନର ହେଉଛି। ଏହି କାର୍ଯ୍ୟରେ ରଡ଼, ମେଟାଲ, ଚିପ୍ସ, ସିମେଣ୍ଟ, ବାଲି ଆଦି ନିମ୍ନମାନର ବ୍ୟବହୃତ ହେଉଛି। କାର୍ଯ୍ୟର ପୁଙ୍ଖାନୁପୁଙ୍ଖ ବିଷୟରେ ବିଭାଗୀୟ ଯନ୍ତ୍ରୀ, ଏସ୍ଡିଓଙ୍କୁ ପଚାରିଲେ ସେମାନେ ଠିକ୍ ତଥ୍ୟ ଦେଉନାହାନ୍ତି ା ପାଖାପାଖି ୬୬ ଲକ୍ଷ ଟଙ୍କାରେ ନିର୍ମିତ ହେଉଥିବା ଏହି ବକ୍ସ କଲ୍ଭର୍ଟର ସ୍ଥାୟିତ୍ୱକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ଠିକାଦାର, ଯନ୍ତ୍ରୀ ଏବଂ ଏସ୍ଡିଓଙ୍କ ଜାଣତରେ ଏହି ନିମ୍ନମାନର କାର୍ଯ୍ୟ ହେଉଥିବା ସ୍ଥାନୀୟ ଲୋକେ କହିଛନ୍ତି।
ଫୁଲବାଣୀ ବ୍ଲକ କଟ୍ରିଙ୍ଗିଆ-କଷାକାଠି ରାସ୍ତା ମଧ୍ୟଭାଗରେ ଦୁଡୁକି ପଞ୍ଚାୟତ ରହିଛି। ପଞ୍ଚାୟତ କାର୍ଯ୍ୟାଳୟ ପାଖରେ ମୁଖ୍ୟ ରାସ୍ତାରେ ଏକ ବକ୍ସ କଲଭର୍ଟ ଆରଡି ବିଭାଗ ପକ୍ଷରୁ ଚାଲିଛି। ଏହି କାର୍ଯ୍ୟରେ ଲୋକାଲ ମେଟାଲ ବ୍ୟବହୃତ ହେଉଛି, ଯାହା ଅତି ନିମ୍ନମାନର। ସେହିପରି କଂକ୍ରିଟରେ ବ୍ୟବହୃତ ରଡ଼ ନାମୀ କମ୍ପାନୀର ନୁହେଁ। ବାଲି, ସିମେଣ୍ଟ ବି ନିମ୍ନମାନର। କଂକ୍ରିଟ ପଡିବା ବେଳେ ଭାଇବ୍ରେଟର ବ୍ୟବହାର କରାଯିବା କଥା, କିନ୍ତୁ ଏଠାରେ ତାହା ହେଉନାହିଁ। ହାତରେ କଂକ୍ରିଟକୁ ଚପାଯାଉଛି। ଯେହେତୁ ଏହା ସମ୍ପୂର୍ଣ୍ଣ ଭାବେ କଂକ୍ରିଟ କାର୍ଯ୍ୟ, କାମ ବେଳେ ଠିକାଦାର ଏବଂ ଯନ୍ତ୍ରୀ ଉପସ୍ଥିତ ରହିବା କଥା ା କିନ୍ତୁ କେହି ରହୁନାହାନ୍ତି ା ମିସ୍ତ୍ରି ତା’ ମନଇଚ୍ଛାରେ ଭାଗ ମାପ କରି କାମ କରୁଛି ା ନିମ୍ନମାନର କଂକ୍ରିଟ ହେଉଥିବାରୁ ଏହି କଲ୍ଭର୍ଟର ସ୍ଥାୟିତ୍ୱକୁ ନେଇ ସ୍ଥାନୀୟ ଲୋକେ ପ୍ରଶ୍ନ ଉଠାଇଛନ୍ତି। ସେମାନେ କାମ ଠିକ୍ ଭାବେ କରିବାକୁ କହୁଥିଲେ ମଧ୍ୟ ନା ଠିକାଦାର ନା ବିଭାଗୀୟ ଅଧିକାରୀ କେହି ଶୁଣୁନାହାନ୍ତି।
ଯେଉଁ କାମ ହେଉଛି ତାହା ଠିକ୍ ହେଉନାହିଁ ା ଏଠାରେ ଶଙ୍ଖ ଥିଲା ା ଯାତାୟାତରେ ବହୁ ଅସୁବିଧା ହେଉଥିଲା ା ବର୍ଷା ହେଲେ ଏହା ଉପରେ ଗାଡ଼ି ଯାଇ ପାରୁ ନ ଥିଲା ା ଏବେ ସେଠାରେ ପୋଲ ହେଉଛି ା ଲୋକାଲ ମେଟାଲ ସହ ପଟୁ ବାଲି ଆଣି କାମ କରୁଛନ୍ତି। କାମ ଆଦୌ ଭଲ ହେଉନାହିଁ ବୋଲି ଦୁଡୁକି ପଂଚାୟତ ବିଲାବାଡି ଜାରୁପଙ୍ଗାପଡା ସାହିର ବିଶ୍ୱମ୍ବର କହଁର କହିଛନ୍ତି। କାମ ଅତ୍ୟନ୍ତ ନିମ୍ନମାନର ହେଉଛି ା ଯନ୍ତ୍ରୀ ଉପସ୍ଥିତ ରହୁନାହାନ୍ତି। ଲୋକାଲ ମେଟାଲରେ କି କାମ ହେବ ବୋଲି ସରପଞ୍ଚ ସୁରେନ୍ଦ୍ର କହଁର ପ୍ରକାଶ କରିଛନ୍ତି ା ୩ ଥର ଟେଣ୍ଡର ବାହାରିଲା, କେହି ପକାଇଲେ ନାହିଁ ା ଏଥର ଜଣେ କାମ ପାଇଛନ୍ତି ା ମେନ କଂକ୍ରିଟ ୱାଲ କାମ କ୍ରଶର ମେଟାଲରେ ହେଉଛି ା ମୁଁ ନିଜେ ଯାଇ କାମ ଦେଖୁଛି ା କାମର ଷ୍ଟାଣ୍ଡାର୍ଡ ମେଂଟେନ କରାଯାଉଛି ବୋଲି ବିଭାଗୀୟ ଯନ୍ତ୍ରୀ ମହେନ୍ଦ୍ର ପ୍ରଧାନ କହିଛନ୍ତି। ସେହିପରି ଏସ୍ଡିଓ ସୁଶୀଲ କୁମାର ମହାନ୍ତି ମଧ୍ୟ ଅନୁରୂପ ମନ୍ତବ୍ୟ ଦେବା ସହ ସାଧାରଣ ଲୋକେ କଂକ୍ରିଟ ବିଷୟରେ କ’ଣ ଜାଣିଛନ୍ତି ବୋଲି ଓଲଟା ପ୍ରଶ୍ନ କରିଛନ୍ତି। ସୂଚନାଯୋଗ୍ୟ, ଗତ ମଙ୍ଗଳବାର ଜିଲା ପରିଷଦ ବୈଠକରେ ବିଭିନ୍ନ ବିଭାଗରେ କାମ ଅତ୍ୟନ୍ତ ନିମ୍ନମାନର ହେଉଥିବା ନେଇ ଅଭିଯୋଗ ହୋଇଥିଲା। ବିଧାୟକମାନେ କାମ ଭଲରେ କରିବାକୁ ଏବଂ ଯନ୍ତ୍ରୀ କାର୍ଯ୍ୟସ୍ଥଳରେ ଉପସ୍ଥିତ ରହିବାକୁ ସ୍ପଷ୍ଟ ନିର୍ଦ୍ଦେଶ ଦେଇଥିଲେ। ଏହା ନ ହେଲେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଶୁଣାଇଥିଲେ ା
