କୋକସରା,୨୫।୧୨ (ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲାରେ ଲଘୁଚାପଜନିତ ବର୍ଷା ମଙ୍ଗଳବାର ରାତିରୁ ଲଗାଣ ବର୍ଷା ଲାଗି ରହିଛି। ବ୍ଲକରେ ମଙ୍ଗଳବାର ରାତିରୁ ବୁଧବାର ସକାଳ ପର୍ଯ୍ୟନ୍ତ ୬୫ ମିଲିମିଟର ବର୍ଷା ରେକର୍ଡ କରାଯାଇଛି। ବ୍ଲକର ୨୨ ପଞ୍ଚାୟତରେ ୮୦ ପ୍ରତିଶତ ଧାନ ଅମଳ ହୋଇ ସାରିଥିବା ବେଳେ ବିକ୍ରି ଅପେକ୍ଷାରେ ଚାଷୀମାନେ ଟୋକନ ଅବଧି ଆସି ଥିବାରୁ ନିଜ ଖଳା ଓ ସାଧ୍ୟ ମତେ ଖୋଲା ଆକାଶ ତଳେ ରଖିଛନ୍ତି। ଧାନକୁ ଶୁଖାଇବା ସହ ମଣ୍ଡିକୁ ନେବା ଅପେକ୍ଷାରେ ରହିଥିବା ବେଳେ ଅଦିନିଆ ବର୍ଷା ଚାଷିଙ୍କ ଦୁଃଖକୁ ଦ୍ବିଗୁଣିତ କରିଛି।
କୋକସରା ବ୍ଲକର କୋକସରା ପେକ୍ସ ଅଧୀନରେ ଝରିଆଗୁଡା ଉପମଣ୍ଡି, ଟେମରା ପେକ୍ସ ଅଧୀନରେ ଡେଙ୍ଗାଗୁଡା, ଡୁଡୁକାଠେଙ୍ଗା, ଗୋତମୁଣ୍ଡା ଉପମଣ୍ଡି , କାଶିବାହାଲ ପେକ୍ସ ଅଧୀନରେ ଫୁଫଗାଁ, ଧନସରା କନ୍ଦାବୁଟୁରା, ତୁନଗାଁ ଉପମଣ୍ଡି, ଡ଼ହଗାଁ ପେକ୍ସ ଅଧୀନରେ ଖୁଣ୍ଟିଆ, ଡାଲଗୁମା, ମୂଷାପାଲି ଉପମଣ୍ଡି, ଲଡୁଗାଁ ପେକ୍ସ ଅଧୀନରେ ଗମ୍ଭାରୀଗୁଡା ଉପମଣ୍ଡି, ଆମପାଣି ପେକ୍ସ ଅଧୀନରେ ଆମପାଣି, କାଉଡୋଳା, ବଡ଼ପୋଡ଼ାଗୁଡା ଉପମଣ୍ଡି ଓ ଚାରବାହାଲ ପେକ୍ସ ଅଧୀନରେ ମୋଟେର ମଣ୍ଡି ରହିଛି।
ଏହିସବୁ ମଣ୍ଡିରେ ଧାନ କିଣା ଆରମ୍ଭ ହୋଇଥିବା ବେଳେ କିଛି ମଣ୍ଡିକୁ ଛାଡି ଦେଲେ ଅନ୍ୟ ସବୁ ମଣ୍ଡି ଖୋଲା ଆକାଶ ତଳେ ଚାଲିଛି। ଲଗାଣ ବର୍ଷା ଯୋଗୁଁ ଏବେ ଖୋଲା ମଣ୍ଡିରେ ପଡି ରହିଥିବା ଚାଷିଙ୍କ ହଜାର ହଜାର କ୍ୱିଣ୍ଟାଲ ଧାନ ବର୍ଷାରେ ଭିଜି ଗୁଣବତ୍ତା ନଷ୍ଟ ହେବାର ଆଶଙ୍କା ରହିଛି । ଅଦିନିଆ ବର୍ଷାରେ କାଦୋପଦର ଗ୍ରାମର ସମସ୍ତ ଖଳାରେ ସବୁ ଖଳାରେ ଆଣ୍ଠୁଏ ପାଣି ଜମି ରହିଛି ।
ଅନ୍ୟପକ୍ଷରେ ଧାନର ଗୁଣବତ୍ତା ନଷ୍ଟ ହେଲେ ମଣ୍ଡିରୁ ଧାନ ଉଠାଇବାରେ ମିଲର୍ସ ଏଫଏକ୍ୟୁ ଆଲରେ କଟନୀ କରିବା ପାଇଁ ବାଧ୍ୟ କରିବେ। ମଣ୍ଡିରେ ଚାଷିଙ୍କ ଧାନର ସୁରକ୍ଷା ଦାୟିତ୍ୱ ଆରଏମସି ବିଭାଗ ରହିଥିବା ବେଳେ ପର୍ଯ୍ୟାପ୍ତ ପରିମାଣରେ ଧାନ ଢାଙ୍କିବା ପାଇଁ ପଲିଥିନ ନଥିବା ନେଇ ଚାଷୀମାନେ ଅଭିଯୋଗ କରିଛନ୍ତି। ଏନେଇ କୋକସରା ବ୍ଲକ ଯୋଗାଣ ଅଧିକାରୀ ଜଗାରାମ ମୁର୍ମୁଙ୍କ ପ୍ରତିକ୍ରିୟା ନେବାରୁ ବର୍ତ୍ତମାନ ସୁଦ୍ଧା ବ୍ଲକର ୩୧୦୫ ଜଣ ଚାଷୀଙ୍କ ଠାରୁ ୧ଲକ୍ଷ ୨୭ହଜାର ୮୬୭.୦୯ କ୍ୱିଣ୍ଟାଲ କ୍ରୟ ହୋଇଥିବା ବେଳେ ବର୍ତ୍ତମାନ ବିଭିନ୍ନ ମଣ୍ଡିରେ ୨୧୦ ଜଣ ଚାଷୀଙ୍କ ୮୨୫୧.୯୭ କ୍ୱିଣ୍ଟାଲ ଧାନ ପଡି ରହିଥିବା ସୂଚନା ଦେଇଛନ୍ତି।
