ଗଞ୍ଜାମ,୨୧।୯(ବିଦ୍ୟାଧର ସାହୁ ): ଉତ୍ତର ଆଣ୍ଡାମାନ ସାଗରରେ ସୃଷ୍ଟି ହୋଇଥିବା ଲଘୁଚାପ ଗଭୀର ଅବପାତର ରୂପ ନେଇ ବଙ୍ଗୋପସାଗର ଆଡ଼କୁ ଗତି କରିବା ନେଇ ଭାରତୀୟ ପାଣିପାଗ ବିଜ୍ଞାନ ବିଭାଗ ପକ୍ଷରୁ ସୂଚନା ଦିଆଯାଇଛି। ଏନେଇ ଗଞ୍ଜାମ ଜିଲାକୁ ଅରେଞ୍ଜ ୱାର୍ନିଂ ଦିଆଯାଇଥିବା ବେଳେ ଆସନ୍ତା ୨୩ ଏବଂ ୨୪ ତାରିଖ ରେଡ ୱାର୍ନିଂ ଜାରି କରାଯାଇଛି l
ଗଭୀର ଅବପାତ ଦକ୍ଷିଣ ଓଡ଼ିଶା- ଉତ୍ତର ଆନ୍ଧ୍ର ପ୍ରଦେଶ ଦେଇ ଗତି କରିବା ନେଇ ପାଣିପାଗ ବିଭାଗ ଆକଳନ କରିଛି l ଏହି ସମ୍ଭାବ୍ୟ ବାତ୍ୟା ଅର୍ଣ୍ଣବକୁ ନେଇ ବ୍ଲକ କନଫରେନ୍ସ ହଲଠାରେ ବାତ୍ୟା ମୁକାବିଲା ପ୍ରସ୍ତୁତି ସୋମବାର ଅନୁଷ୍ଠିତ ହୋଇଥିଲା l
ଏଥିରେ ବିଡ଼ିଓ ଅଚ୍ୟୁତାନନ୍ଦ ଯାନୀ, ତହସିଲଦାର ସୁକାନ୍ତ ଚନ୍ଦ୍ର ମିଶ୍ର, ଅତିରିକ୍ତ ଗଞ୍ଜାମ ଥାନା ଆଇଆଇସି ଶୁଭଲକ୍ଷ୍ମୀ କଂହର, ବ୍ଲକ ଅଧକ୍ଷା ଶର୍ମିଷ୍ଠା ପ୍ରଧାନ, ଜିଲା ପରିଷଦ ସଭ୍ୟ ସନାତନ ବେହେରା, ସିଡିପିଓ ସଲୀଳା ପ୍ରଧାନ, ବ୍ଲକ ଶିକ୍ଷା ଅଧିକାରୀ ସରୋଜ କୁମାର ସାହୁ, ସହକାରୀ ନିର୍ବାହୀ ଯନ୍ତ୍ରୀ ଅତ୍ୟୁତାନନ୍ଦ ପଟ୍ଟନାୟକ, ଜିପିଓ ଅପର୍ଣ୍ଣା ଅଭିଲିପ୍ସା ପ୍ରମୁଖ ମଞ୍ଚାସିନ ଥିଲେ।
ବୈଠକରେ ସମସ୍ତ ବିଦ୍ୟୁତ୍ ବିଭାଗ କର୍ମଚାରୀ, ଅଗ୍ନିଶମ ବିଭାଗ କର୍ମଚାରୀ, ପଞ୍ଚାୟତ ନିର୍ବାହୀ ଅଧିକାରୀ ପ୍ରମୁଖ ଉପସ୍ଥିତ ଥିଲେ l ବାତ୍ୟା ଆସିଲେ ଭୟଭୀତ ନ ହୋଇ ଏହାର ସଠିକ ମୁକାବିଲା କରିବାକୁ ବୈଠକରେ ଆଲୋଚନା ହୋଇଥିଲା।
ଏପରିକି ସମସ୍ତ ବିଭାଗକୁ ଜରୁରୀକାଳୀନ ପରିସ୍ଥିତି ସହ ମୁକାବିଲା କରିବା ପାଇଁ ପ୍ରସ୍ତୁତ ରହିବାକୁ ବିଡ଼ିଓ ଯାନୀ ନିର୍ଦ୍ଦେଶ ଦେଇଛନ୍ତି l ପ୍ରବଳରୁ ଅତି ପ୍ରବଳ ବର୍ଷା ହେବା ସାଙ୍ଗକୁ ଘଣ୍ଟା ପ୍ରତି ୭୫ କିମି ବେଗ ପର୍ଯ୍ୟନ୍ତ ପବନ ବହିବାର ପୂର୍ବାନୁମାନ କରିଛି ପାଣିପାଗ ବିଭାଗ l
ଏହା ପ୍ରଭାବରେ ଜାଗା ଜାଗାରେ ପାଣି ଜମା ହେବା, ବନ୍ୟା ପରିସ୍ଥିତି ସୃଷ୍ଟି ହେବା ସହ ରାସ୍ତା ଓ ଅନ୍ୟ ସମ୍ବେଦନଶୀଳ ସ୍ଥାନରେ ଗଛ ଓ ବିଦ୍ୟୁତ ଖୁଣ୍ଟ ପଡ଼ିବା ଆଶଙ୍କା ରହିଛି। ବାତ୍ୟା ସମୟରେ ଘର ବାହାରକୁ ନ ବାହାରିବା,ବିଶେଷ କରି ଚାଷୀଙ୍କୁ ବିଲକୁ ନ ଯିବାକୁ ପ୍ରଶାସନ ପକ୍ଷରୁ ହାଇଆଲର୍ଟ କରାଯାଇଛି l ଏଥିସହ ସମୁଦ୍ର ଓ ନଦୀ ତଟବର୍ତ୍ତୀ ଅଞ୍ଚଳବାସୀଙ୍କୁ ସ୍ଥାନାନ୍ତରିତ କରିବା ବୈଠରେ ଆଲୋଚନା ହୋଇଥିଲା l
ସମ୍ବେଦନଶୀଳ ସ୍ଥାନଗୁଡ଼ିକୁ ଚିହ୍ନଟ କରିଯାଇ ସେଠାରେ ସତନ୍ତ୍ର ତଦାରଖ କରିବା ସହିତ ଓଡ୍ରାଫ ଟିମ, ପୋଲିସ ବିଭାଗ, ସ୍ବାସ୍ଥ୍ୟ ସେବା, ବିଦ୍ୟୁତ୍ ବିଭାଗ ସହ ସମସ୍ତ ବିଭାଗ ସଜାଗ ରହିଥିବା ବିଡ଼ିଓ ଯାନୀ ଗଣମାଧ୍ୟମକୁ ସୂଚନା ଦେଇଛନ୍ତି
