ବାଲିକୁଦା,୧୯।୨(ସ୍ବ.ପ୍ର.): ଆଧୁନିକ ମଣିଷ ଏବେ ବଣଜଙ୍ଗଲ କାଟି ଧ୍ୱଂସକରି ଚାଲିଥିବାବେଳେ ଜଗତ୍ସିଂହପୁର ଜିଲା ବାଲିକୁଦା ବ୍ଳକ ଅନନ୍ତପୁର ପଞ୍ଚାୟତ ଭୁଆସୁଣୀ ଗ୍ରାମର ରବିନାରାୟଣ ପରିଡ଼ା (୪୫) ଗଛ ପ୍ରେମରେ ପଡ଼ିଯାଇଛନ୍ତି। ସେ ନିଜ ବାଡ଼ିରେ ଶତାଧିକ ଜାତିର ଫୁଲ, ଫଳ, ପରିବା ଏବଂ ଔଷଧୀୟ ଗଛ ଲଗାଇଛନ୍ତି ା ଯେଉଁଥିରେ ସେ ଦୈନିକ ୬ ଘଣ୍ଟାରୁ ଊର୍ଦ୍ଧ୍ୱ ସମୟ ବିନିଯୋଗ କରିଥାନ୍ତି। ଯଦିଓ ସେଥିରୁ ତାଙ୍କର ନିଜସ୍ବ କୌଣସି ରୋଜଗାର ହେଉନାହିଁ କିନ୍ତୁ ବିଭିନ୍ନ ଜାତିର ଗଛ ଦେଖିଲେ ସେ ବଜାରରୁ କିଣି ତା’ର ଯତ୍ନ ନେଇଥାନ୍ତି ା ଏଥିପାଇଁ ଲକ୍ଷାଧିକ ଟଙ୍କା ବିନିଯୋଗ ମଧ୍ୟ କରିଛନ୍ତି। ଲଗାଇଥିବା ଗଛର ଫୁଲ, ଫଳ ଓ ପରିବା ଇତ୍ୟାଦିକୁ ତାଙ୍କ ବଗିଚା ଦେଖିବାକୁ ଆସୁଥିବା ଲୋକଙ୍କୁ ବାଣ୍ଟିଥାନ୍ତି ା ସେଥିରେ ବହୁତ ଖୁସି ମିଳେ ବୋଲି କୁହନ୍ତି ରବି ା ପ୍ରତିଦିନ ସକାଳେ ୩ ଘଣ୍ଟା, ଅପରାହ୍ନରେ ୨ ଘଣ୍ଟା ଓ ରାତିରେ ୮ଟାରୁ ୯ଟା ପର୍ଯ୍ୟନ୍ତ ସେ ଏସବୁ ଗଛ ପାଇଁ କାର୍ଯ୍ୟ କରିଥାନ୍ତି ା ପ୍ର୍ରତ୍ୟେକ ଗଛରେ ଜୈବିକ ଖତ ପ୍ରୟୋଗ କରାଯାଇଛି। ଏହା ମଧ୍ୟରେ ମାଟି ଗୋବର ଖତ ରହିଛି ା ରବିଙ୍କ ବଗିଚାରେ ୨୦ରୁ ଊର୍ଦ୍ଧ୍ୱ ଜାତିର ଫୁଲ ରହିଛି ା ସେଗୁଡିକ ମଧ୍ୟରେ ବିଭିନ୍ନ ରଙ୍ଗର ପ୍ରାୟ ୧୨ ପ୍ରକାର ଗୋଲାପ ରହିଛି ା ସେଭଳି ୧୦ ପ୍ରକାର ମନ୍ଦାର ଥିବାବେଳେ ୩୦ ପାଖୁଡାବିଶିଷ୍ଟ ମନ୍ଦାର ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି।
ଏହାଛଡ଼ା କୁସୁମ, ସୁଗନ୍ଧରାଜ, ସଦାବିହାରୀ ଓ ବିଭିନ୍ନ ପ୍ରକାର କନିଅର ଫୁଲ ରହିଛି ା ସେହିପରି ବିଭିନ୍ନ ଫଳଗଛ ମଧ୍ୟରେ ୩ ପ୍ରକାର କମଳା, ୫ ପ୍ରକାର ଲେମ୍ବୁ ଯଥା ବାରମାସୀ, ଦେଶୀ, କାଗେଜି ଲେମ୍ବୁ, ଅଷ୍ଟ୍ରେଲିଆନ ଲେମ୍ବୁ , କାଶୀ ବରକୋଳି, ପିଜୁଳି, ପଣସ, ଆମ୍ବ, ନଡ଼ିଆ, ସପେଟା, ବେଲ, ଡାଳିମ୍ବ ସହ ଚଳିତବର୍ଷ ସେଓଗଛ ମଧ୍ୟ ଲଗାଇଛନ୍ତି ା ଏହାଛଡ଼ା ସେ ବାଡ଼ିରେ ବିଭିନ୍ନ ପରିବା ଗଛ ମଧ୍ୟ ଲଗାଇଛନ୍ତି। ସେଗୁଡ଼ିକ ମଧ୍ୟରେ ବିଭିନ୍ନ ଜାତିର ବିଲାତି ବାଇଗଣ, ପିଆଜ, ଲଙ୍କା, କାପ୍ସିକମ୍, ଅମୃତଭଣ୍ଡା, ସଜନା, ଭୃଷଙ୍ଗ ଆଦି ରହିଛି ା ତାଙ୍କର ଯଦିଓ ସ୍ଥାନୀୟ ଅନନ୍ତପୁର ବଜାରରେ ମୋବିଲ ଦୋକାନ ରହିଛି ମାତ୍ର ଅଧିକାଂଶ ସମୟ ସେ ଏହି ଗଛ ପାଇଁ ଦେଇଥାନ୍ତି ା ଏହି ବାଡ଼ିରେ କୌଣସି ଅପରିଷ୍କାର ଦେଖିବାକୁ ମିଳି ନ ଥାଏ, ଯେଉଁଥିପାଇଁ ସ୍ଥାନୀୟ ଅଞ୍ଚଳର ଲୋକମାନେ ଏହି ଗଛଗୁଡିକୁ ଦେଖିବା ପାଇଁ ଆସିବା ସହ ବିଭିନ୍ନ ଫଳ ଓ ଫୁଲ ଆଦି ନେଇଥାନ୍ତି ା ସ୍ଥାନୀୟ ଖଡ଼ିକାଦଣ୍ଡା ଗ୍ରାମର ପୀତବାସ ସ୍ବାଇଁ କୁହନ୍ତି, ରବି ବାଡ଼ିରେ ବିଭିନ୍ନ ଫୁଲ, ଫଳ, ପରିବା ଏବଂ ଔଷଧୀୟ ବୃକ୍ଷ ଆଦି ଗଛ ଲଗାଇ ଅନ୍ୟମାନଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି। ସେଠାରେ ଅତିକମ୍ରେ ୨ ଘଣ୍ଟା ନ ବୁଲିଲେ ଆସିବାକୁ ଇଚ୍ଛା ହୁଏନି ବୋଲି ସେ କହିଛନ୍ତି।
