ଇସ୍ଲାମାବାଦ୍: ପ୍ରେମ ସୀମା ସରହଦ, ବାଧା ବନ୍ଧନ କି ବୟସ ମାନେନା। ଏ କଥା ପ୍ରମାଣିତ ହୋଇଛି ପୋଲାଣ୍ଡର ଜଣେ ୮୩ ବର୍ଷୀୟା ମହିଳାଙ୍କ କ୍ଷେତ୍ରରେ, ଯିଏକି ନିଜ ୨୮ ବର୍ଷୀୟ ପୁରୁଷ ବନ୍ଧୁଙ୍କୁ ବାହାହେବା ପାଇଁ ପାକିସ୍ତାନ ଚାଲିଯାଇଛନ୍ତି। ତାଙ୍କ ନାଁ ବ୍ରୋମା। ଅଟୋ ମେକାନିକ୍ ହାଫିଜ୍ ମହମ୍ମଦ ନଦିମ୍ ପାକିସ୍ତାନର ହାଫିଜବାଦ୍ରେ ରୁହନ୍ତି। ୬ ବର୍ଷ ତଳେ ସେ ପୋଲାଣ୍ଡର ବ୍ରୋମାଙ୍କ ସହ ଫୋନ୍ରେ କଥା ହୋଇଥିଲେ। କଥା ହେଉ ହେଉ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ପରସ୍ପରକୁ କେବେ ସାକ୍ଷାତ୍ କରି ନ ଥିଲେ ମଧ୍ୟ ବାହାହେବା ପାଇଁ ଦୁହେଁ ନିଷ୍ପତ୍ତି ନେଇଥିଲେ। ବୟସରେ ଏତେ ବ୍ୟବଧାନ ଥାଇ ବି ପାରମ୍ପରିକ ରୀତିନୀତିରେ ବିବାହ ବନ୍ଧନରେ ଆବଦ୍ଧ ହୋଇଥିଲେ ଏହି ଯୋଡ଼ି। ବ୍ରୋମା ନାଲି ରଙ୍ଗର ଟ୍ରାଡିଶ୍ନାଲ ଡ୍ରେସ୍ ପିନ୍ଧି ବିବାହବେଳେ ଇସ୍ଲାମୀୟ ଆଇନ ଓ ପ୍ରଥା ଅନୁଯାୟୀ ‘ହକ୍ ମେହର୍’ ପାଉଣା ପୈଠ କରିଥିଲେ। ଦୁହେଁ ଏବେ ଭଲରେ ଅଛନ୍ତି ବୋଲି ହାଫିଜ୍ ଗଣମାଧ୍ୟମକୁ ଜଣାଇଛନ୍ତି। ଏହାପୂର୍ବରୁ ହାଫିଜ୍ଙ୍କ ବିବାହ ତାଙ୍କର ଜଣେ ସମ୍ପର୍କୀୟା ଭଉଣୀଙ୍କ ସହ ସ୍ଥିର ହୋଇଥିଲା।
ଗତମାସରେ ଆଉ ଏକ ଲଭ୍ ଷ୍ଟୋରି ଶୁଣିବାକୁ ମିଳିଥିଲା। ଫିଲିପାଇନ୍ସର ରଶଦ ମଙ୍ଗାକୋପ୍ (୭୮) ଜଣେ ୧୮ ବର୍ଷୀୟା ଝିଅକୁ ବାହା ହୋଇଥିଲେ। ପୂର୍ବରୁ କୃଷି କାର୍ଯ୍ୟ କରୁଥିବା ରଶଦ କାଗାୟାନର ଏକ ଡିନର ପାର୍ଟିରେ ସ୍ବଳ୍ପ ବୟସ୍କା ହାଲିମା ଅବ୍ଦୁଲାଙ୍କୁ ଦେଖିବା ପରେ ପ୍ରେମରେ ପଡ଼ିଯାଇଥିଲେ। ହାଲିମାଙ୍କୁ ସେତେବେଳେ ୧୫ ବର୍ଷ ହୋଇଥିଲା। ଏହାପୂର୍ବରୁ ରଶଦ ବାହା ହୋଇ ନ ଥିଲେ କି ତାଙ୍କର କେହି ଗର୍ଲଫ୍ରେଣ୍ଡ ବି ନ ଥିଲେ। ଗତ ଅଗଷ୍ଟ ୨୫ରେ ଏହି ପ୍ରେମୀ ଯୁଗଳ ଜୀବନସାଥୀ ପାଲଟିବା ପୂର୍ବରୁ ୩ ବର୍ଷ ଏକାଠି ରହିଥିଲେ।
ଗତ ଅକ୍ଟୋବରରେ ଜଣେ ମହିଳା ନିଜ ଘରଠାରୁ ୧୪,୪୦୦ କିଲୋମିଟର ଯାତ୍ରା କରି କେନିଆର ମାସାଇ ସମ୍ପ୍ରଦାୟର ଜଣେ ଯୁବକଙ୍କୁ ବାହାହେଲେ, ଯିଏକି ତାଙ୍କଠାରୁ ୩୦ ବର୍ଷ ସାନ। ସେହିପରି ଦେବୋରାହ ବାବୁ ନାମ୍ନୀ ଜଣେ ୬୦ ବର୍ଷୀୟା ମହିଳା ସାମାଜିକ ନିନ୍ଦା ଅପବାଦକୁ ଖାତିର ନ କରି ଜଣେ କମ୍ ବୟସର ପୁଅଙ୍କୁ ବାହା ହୋଇଥିଲେ। ୨୦୧୭ ଅକ୍ଟୋବରରେ ଦେବୋରାହ ନିଜ ଝିଅଙ୍କ ସହ ତାଞ୍ଜାନିଆ ଯାତ୍ରା କରୁଥିବାବେଳେ ତାଙ୍କ ସ୍ବପ୍ନର ମଣିଷ ସଇଟୋଟିଙ୍କୁ ଭେଟିଥିଲେ।
