ଭୁବନେଶ୍ୱର,୨୩।୧୨(ବ୍ୟୁରୋ): ଦିନକୁ ଦିନ କ୍ରମଶଃ ଅପରାଧ ବଢ଼ିବାରେ ଲାଗିଛି। ଏହାକୁ ରୋକିବାକୁ ସୁରକ୍ଷା ବ୍ୟବସ୍ଥାରେ ଉନ୍ନତୀକରଣ କରାଯାଉଛି। ଏପରି କି ନୂଆ ବୈଷୟିକ ଜ୍ଞାନକୌଶଳ ବ୍ୟବହାର କରାଯାଉଥିବା ମଧ୍ୟ ପୋଲିସ ପକ୍ଷରୁ କୁହାଯାଉଛି। ହେଲେ ଅପରାଧୀ ପୋଲିସ୍କୁ ଚକ୍ମା ଦେବାରେ ଅନେକ କ୍ଷେତ୍ରରେ ସଫଳ ହେଉଛନ୍ତି। ଏଥିପାଇଁ ଢିଲା ସୁରକ୍ଷା ବ୍ୟବସ୍ଥା ମୁଖ୍ୟ କାରଣ। ବିଶେଷକରି କମିଶନରେଟ ପୋଲିସରେ ବିଭିନ୍ନ ମାମଲାରେ ଗିରଫ ହୋଇଥିବା ଅଭିଯୁକ୍ତମାନେ ପୋଲିସ ହେପାଜତରୁ ଫେରାର ହେବା ସୁରକ୍ଷା ବ୍ୟବସ୍ଥା ପ୍ରତି ଅଙ୍ଗୁଳି ନିର୍ଦ୍ଦେଶ କରୁଛି। ବର୍ଷକ ମଧ୍ୟରେ କମିଶନରେଟ ପୋଲିସର ଭୁବନେଶ୍ୱର ସହରାଞ୍ଚଳ ପୋଲିସ ଜିଲା(ୟୁପିଡି)ର ୬ଟି ଥାନାରୁ ୯ଜଣ ଅଭିଯୁକ୍ତ ଫେରାର ହୋଇଛନ୍ତି। ସେମାନଙ୍କ ମଧ୍ୟରୁ ୫ଜଣଙ୍କୁ ପୋଲିସ ଗିରଫ କରିବାରେ ସକ୍ଷମ ହୋଇଥିବାବେଳେ ଏଯାବତ୍ ୪ଅଭିଯୁକ୍ତଙ୍କ ପତ୍ତା ମିଳିପପାରି ନ ଥିବା କମିଶନରେଟ ପୋଲିସ ପକ୍ଷରୁ ସୂଚନା ଦିଆଯାଇଛି।
ମିଳିଥିତ୍ବା ସୂଚନା ଅନୁସାରେ ୨୦୨୧ ଜାନୁୟାରୀ ୧ରୁ ଡିସେମ୍ବର ୨୨ ମଧ୍ୟରେ କମିଶନରେଟ୍ ପୋଲିସର ୬ ଥାନା ଯଥା, କ୍ୟାପିଟାଲ, ଚନ୍ଦକା, ତମାଣ୍ଡୋ, ଭରତପୁର, ଖଣ୍ଡଗିରି ଏବଂ ଚନ୍ଦ୍ରଶେଖରପୁର ଥାନାରୁ ୯ଜଣ ଫେରାର୍ ହୋଇଛନ୍ତି। ସେମାନଙ୍କ ମଧ୍ୟରୁ କ୍ୟାପିଟାଲ୍, ତମାଣ୍ଡୋ, ଚନ୍ଦକା ଓ ଚନ୍ଦ୍ରଶେଖରପୁର ଥାନାରୁ ଫେରାର ହୋଇଥିବା ୫ ଅଭିଯୁକ୍ତଙ୍କୁ ଗିରଫ କରାଯାଇଛି। ସେଥିମଧ୍ୟରୁ ୩ଟି ମାମଲାର ତଦନ୍ତ ଶେଷ କରାଯାଇ କ୍ୟାପିଟାଲ, ଚନ୍ଦକା ଓ ତମାଣ୍ଡୋ ପୋଲିସ ପକ୍ଷରୁ ଚାର୍ଜଶିଟ୍ ଦାଖଲ ହୋଇଛି। ସେହିପରି କ୍ୟାପିଟାଲ, ଭରତପୁର, ଖଣ୍ଡଗିରି ଓ ଚନ୍ଦକା ଥାନାରୁ ଫେରାର୍ ହୋଇଥିବା ୪ ଅଭିଯୁକ୍ତଙ୍କୁ ଧରିବାକୁ ପ୍ରୟାସ ଜାରି ରହିଥିବା ପୋଲିସ ପକ୍ଷରୁ କୁହାଯାଇଛି।
କମିଶନରେଟ ପୋଲିସ ତା’ର ସୁରକ୍ଷା ବ୍ୟବସ୍ଥା ସୁଦୃଢ ବୋଲି ଗଣମାଧ୍ୟମକୁ ବିଭିନ୍ନ ସମୟରେ କହି ଆସୁଛି। ହେଲେ ବର୍ଷକରେ ପୋଲିସ ହେପାଜତରୁ ୯ ଅଭିଯୁକ୍ତ ଫେରାର ଘଟଣା ପୋଲିସର ପାରିବାପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି। ସୁରକ୍ଷା ବ୍ୟବସ୍ଥା କଡ଼ାକଡ଼ି ରଖାଯାଇଛି, ପ୍ରତି ଥାନାରେ ସିସିଟିଭି ଲଗାଯାଇଛି ଏବଂ ଦକ୍ଷ ପୋଲିସ ଅଧିକାରୀଙ୍କୁ ଥାନା ଦାୟିତ୍ୱ ଦିଆଯାଇଛି। ଏତେସବୁ ସୁରକ୍ଷା ବ୍ୟବସ୍ଥା ସତ୍ତ୍ୱେ ଅଭିଯୁକ୍ତମାନେ ଥାନା ହାଜତରୁ ଚମ୍ପଟ ମାରିବା ଘଟଣାକୁ ସାଧାରଣ ଲୋକେ ସହଜରେ ଗ୍ରହଣ କରିପାରୁ ନାହାନ୍ତି। ଅଭିଯୁକ୍ତ ଫେରାର ହେବା ଘଟଣା ପଛରେ ପୋଲିସ ଅଧିକାରୀଙ୍କ ହାତ ଥିବା ସନ୍ଦେହ କରାଯାଉଛି। ଏନେଇ ପୋଲିସ କମିଶନରଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ସୁଦ୍ଧା କୌଣସି ମତାମତ ମିଳିପାରି ନାହିଁ।
