କେନ୍ଦୁଝର,୩ା୪(ସ୍ବ.ପ୍ର.): ସୁସ୍ଥ ପରିବେଶ ଓ ବାତାବରଣ ସୃଷ୍ଟି ଲକ୍ଷ୍ୟରେ ଲକ୍ଷାଧିକ ଟଙ୍କା ବ୍ୟୟରେ ସ୍ବଚ୍ଛଭାରତ ମିଶନ ଅଭିଯାନରେ ଗୋଷ୍ଠୀ ପାଇଖାନା ନିର୍ମାଣ କରାଯାଇଛି। ଲୋକେ ବାହାରକୁ ଶୌଚ ହେବାକୁ ନ ଯାଇ ଏହି ପାଇଖାନାରେ ଶୌଚ ହେବେ। ଏଥିପାଇଁ ସ୍ବତନ୍ତ୍ର ବୋରଓ୍ବେଲ ଖନନ କରାଯାଇଛି। ପରିଚାଳନା ଦାୟିତ୍ୱ ସ୍ଥାନୀୟ ମହିଳା ସ୍ବୟଂ ସହାୟିକା ଗୋଷ୍ଠୀମାନଙ୍କୁ ଦିଆଯାଇଛି। ଏନେଇ ସେମାନଙ୍କୁ ମାସକୁ ୩ ହଜାର ଟଙ୍କା ଯୋଗାଇ ଦିଆଯାଉଛି। ସେମାନଙ୍କ କାମକୁ ତଦାରଖ ନିମନ୍ତେ ସ୍ବଚ୍ଛସାଥୀ ନିଯୁକ୍ତି ପାଇଛନ୍ତି। ପାଇଖାନା ପ୍ରତି ଲୋକଙ୍କୁ ଆକୃଷ୍ଟ କରିବା ପାଇଁ କାନ୍ଥରେ ଚିତ୍ରିତ କରାଯାଇଛି। ତେବେ ଏହାର ଠିକ୍ ତଦାରଖ ଅଭାବରୁ କେନ୍ଦୁଝର ପୌରପାଳିକାର ପ୍ରାୟ ସମସ୍ତ ଗୋଷ୍ଠୀ ପାଇଖାନାରେ ତାଲା ଝୁଲୁଥିବା ବେଳେ ଅସ୍ବାସ୍ଥ୍ୟକର ପରିବେଶ ସୃଷ୍ଟି କରୁଛି। ରୋଗବ୍ୟାଧି ବ୍ୟାପୁଥିବାରୁ ସରକାରଙ୍କ ଯୋଜନା କେତେ ସଫଳ ହୋଇଛି ପୌରପାଳିକାର ପୁରୁଣା ସହର ୧ନଂ. ଓ୍ବାର୍ଡର ଗୋଷ୍ଠୀଗତ ପାଇଖାନା ଅବସ୍ଥା ଦେଖିଲେ ଜଣାପଡ଼ିବ।
ଓ୍ବାର୍ଡରେ ସମୁଦାୟ ୬ଟି ଗୋଷ୍ଠୀ ପାଇଖାନା ରହିଛି। ଗୁଣ୍ଡିଚାସାହି, ହାଟପଦା, ପୋଡ଼ା ଉଆସରେ ଗୋଟିଏ ଲେଖାଏଁ ପାଇଖାନା ଥିବା ବେଳେ ସୁଲୋଖମାରରେ ତିନୋଟି ପାଇଖାନା ନିର୍ମାଣ ହୋଇଛି। ତେବେ ସେସବୁ ପାଇଖାନା ଠିକ୍ ଭାବରେ ସଫେଇ ହେଉନାହିଁ କିମ୍ବା ରକ୍ଷଣାବେକ୍ଷଣ ଅଭାବରୁ କାମରେ ଲାଗୁନାହିଁ। କେଉଁଠି ବିଦ୍ୟୁତ୍ ସଂଯୋଗ ବିଚ୍ଛିନ ହୋଇଥିବାରୁ ପାଣି ଆସୁ ନାହିଁ ତ କେଉଁଠି ସଫେଇ ହେଉ ନ ଥିବାରୁ ଅସ୍ବାସ୍ଥ୍ୟକର ପରିବେଶ କାରଣରୁ ଲୋକେ ବ୍ୟବହାର କରୁନାହାନ୍ତି। ଶୌଚାଳୟରେ କବାଟ ଭାଙ୍ଗିଯାଇଛି। ବାଲ୍ଟି, ମଗ, ଲାଇନ କି ପାଣି ନାହିଁ। ଫଳରେ ସମସ୍ତେ ବାଧ୍ୟ ହୋଇ ଆଗଭଳି ବାହାରକୁ ଶୌଚ ହେବାକୁ ଯାଉଛନ୍ତି। ସୁଲେଇଖମାର ସାହିରେ ତିନୋଟି ଯାକ ପାଇଖାନା କାମରେ ଲାଗୁନାହିଁ ବୋଲି ମା’ ହେଙ୍ଗୁଳା ସ୍ବୟଂ ସହାୟିକା ଗୋଷ୍ଠୀର ସଭାପତି ସୁକୁମାରୀ ନାଏକ, ରଜନୀ ନାଏକଙ୍କ ସମେତ ଅନ୍ୟମାନେ କହିଛନ୍ତି। ଆମ ବ୍ୟାଙ୍କ ଖାତାକୁ ପଇସା ଆସୁଛି। ସ୍ବଚ୍ଛସାଥୀ ସଫେଇ ଓ ରକ୍ଷଣାବେକ୍ଷଣ କରିବା ପାଇଁ ଉଠାଇ ନେଉଛନ୍ତି। କିନ୍ତୁ ସେସବୁ କରୁନାହାନ୍ତି ବୋଲି ସେମାନେ ଅଭିଯୋଗ କରିଛନ୍ତି। ଏ ନେଇ ସେମାନେ ପୌରପାଳିକାକୁ ଅଭିଯୋଗ କରିଥିଲେ ହେଁ ପଦକ୍ଷେପ ନିଆଯାଉନାହିଁ। ଏଣୁ ସ୍ବଚ୍ଛସାଥୀଙ୍କୁ ବଦଳାଇବାକୁ ଦାବି କରିଛନ୍ତି। ସେହିପରି ପୋଡ଼ାଉଆସ ସାହିର ଗୁରା ନାଏକ କହିଛନ୍ତି, ପାଇଖାନା ସଫେଇ ଠିକ ଭାବରେ ହେଉନାହିଁ। ଏଣୁ ମଇଳା ଜମା ହୋଇରହିଛି। ସଫେଇ ପାଇଁ ଆସୁଥିବା ଅର୍ଥକୁ ସ୍ବଚ୍ଛସାଥୀ ନେଇ ଖର୍ଚ୍ଚ କରୁଛନ୍ତି। ଫଳରେ ଶୌଚାଳୟରେ ତାଲା ଝୁଲୁଛି। ଲୋକମାନେ ବାହାରକୁ ଶୌଚ ହେବାକୁ ଯାଉଛନ୍ତି। ଏଥିପ୍ରତି ପ୍ରଶାସନ ଦୃଷ୍ଟି ଦେବାକୁ ମହିଳା ଓ ସ୍ଥାନୀୟ ବାସିନ୍ଦା କହିଛନ୍ତି। ସହରାଞ୍ଚଳ ବିକାଶ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ଘଷିନାଥ ମାଝି କହିଛନ୍ତି, ଉକ୍ତ ଟଙ୍କା ଏସ୍ଏଚଜି ଗୋଷ୍ଠୀଙ୍କୁ ଦିଆଯାଉଛି। ସେମାନେ ଉକ୍ତ ଟଙ୍କାରେ ସଫେଇ କାମ କରିବା କଥା। ତେବେ କାହିଁକି ସ୍ବଚ୍ଛସାଥୀଙ୍କୁ ଦେଉଛନ୍ତି। କ’ଣ ପାଇଁ ଗୋଷ୍ଠୀଗତ ପାଇଖାନାଗୁଡ଼ିକ କାର୍ଯ୍ୟକ୍ଷମ ହେଉନାହିଁ ସେ ନେଇ ପଦକ୍ଷେପ ନେବେ।
