ରସୁଲପୁର,୨୨ା୧୨(ଡି.ଏନ.ଏ.): ଯାଜପୁର ଜିଲା କୋରେଇ ନିର୍ବାଚନମଣ୍ଡଳୀ ଅଧୀନ ରସୁଲପୁର ବ୍ଲକର ବାହାଦଲାପୁର, ମୁଗୁପାଳ, ନରସିଂହପୁର ପଞ୍ଚାୟତର ବିଭିନ୍ନ କାର୍ଯ୍ୟକ୍ରମରେ ଯୋଗଦେଇଛନ୍ତି କୋରେଇର ପୂର୍ବତନ ବିଧାୟକ ଆକାଶ ଦାସନାୟକ। ଏହାକୁ ନେଇ ସ୍ଥାନୀୟ ଅଞ୍ଚଳର ରାଜନୀତି ପାଣିପାଗ ଉଷ୍ମ ହୋଇଛି। ଗତ ସୋମବାର ସେ ବାହାଦଲାପୁର, ମୁଗୁପାଳ ଓ ନରସିଂହପୁର ପଞ୍ଚାୟତର ୪ଟି ସ୍ଥାନରେ ବିଭିନ୍ନ କାର୍ଯ୍ୟକ୍ରମରେ ଯୋଗଦେଇଥିଲେ। ତାଙ୍କୁ ୨୦ନଂ. ଜାତୀୟ ରାଜପଥ ପାର୍ଶ୍ୱସ୍ଥ ଗରିପୁର ଗାଁ ନିକଟସ୍ଥ ହରପାର୍ବତୀ ମନ୍ଦିର ନିକଟରେ ସମ୍ବର୍ଦ୍ଧିତ କରାଯାଇଥିଲା। ଆକାଶ ମୁଗୁପାଳ ପଞ୍ଚାୟତରେ ବୁଲିବା ସହ ନରସିଂହପୁର ପଞ୍ଚାୟତର ଜଗନ୍ନାଥ ମଠରେ ଏକ ସାଂସ୍କୃତିକ କାର୍ଯ୍ୟକ୍ରମରେ ଯୋଗଦେଇଥିଲେ। ପରେ ପଞ୍ଚାୟତର ବିଭିନ୍ନ ସାମାଜିକ କାର୍ଯ୍ୟକ୍ରମରେ ସାମିଲ ହୋଇଥିଲେ। ତାଙ୍କ ଗସ୍ତବେଳେ ୩୩ ନଂ. ଜିଲା ପରିଷଦ ଜୋନ୍ ସଭ୍ୟ ଶିଶିର କୁମାର ମହାନ୍ତି, ସାମାଜିକ କର୍ମୀ ପ୍ରହ୍ଲାଦ ପଣ୍ଡା, ନରସିଂହପୁର ସରପଞ୍ଚ ପ୍ରଶାନ୍ତ କୁମାର ଦାସ, ଯୁବନେତା ସୁବାସ ନାୟକ ଓ ପଦ୍ମଲୋଚନ ନାୟକ ପ୍ରମୁଖ ଉପସ୍ଥିତ ଥିଲେ। ଆକାଶ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ, ଶ୍ରଦ୍ଧାଞ୍ଜଳି ସଭା, ବ୍ୟବସାୟିକ ପ୍ରତିଷ୍ଠାନର ଉଦ୍ଘାଟନୀ ସଭା ଜରିଆରେ ଲୋକଙ୍କୁ ଭେଟୁଛନ୍ତି। କାର୍ଯ୍ୟକ୍ରମଗୁଡ଼ିକୁ ମାଧ୍ୟମକରି ସେ ତାଙ୍କ ସ୍ଥିତି ସାବ୍ୟସ୍ତ ପାଇଁ ପ୍ରୟାସ କରୁଥିବା ଚର୍ଚ୍ଚା ହେଉଛି।
୨୦୧୪ରେ ଆକାଶ କୋରେଇରୁ ବିଜେଡି ଟିକେଟ ହାତେଇ ବିଧାୟକ ହୋଇଥିଲେ। ବିଧାୟକ ପ୍ରୀତିରଞ୍ଜନ ଘଡ଼ାଇଙ୍କୁ ଦଳ ସୁକିନ୍ଦାରୁ ପ୍ରାର୍ଥୀ କରାଇ ଏହି ନିର୍ବାଚନମଣ୍ଡଳୀରୁ ଆକାଶଙ୍କୁ ପ୍ରାର୍ଥୀ କରାଇଥିଲା। ୨୦୧୭ ପଞ୍ଚାୟତ ନିର୍ବାଚନରେ ବିଜେଡି କୋରେଇ ବ୍ଲକରେ ଅଧ୍ୟକ୍ଷ ପଦ ହାତେଇବାକୁ ଅସମର୍ଥ ହୋଇଥିଲା। ଏହାକୁ କେନ୍ଦ୍ରକରି ୨୦୧୯ ସାଧାରଣ ନିର୍ବାଚନରେ ଦଳ ଆକାଶଙ୍କୁ ଟିକେଟରୁ ବଞ୍ଚତ୍ତ କରି ତାଙ୍କ ସ୍ଥାନରେ ଅଶୋକ ବଳଙ୍କୁ ପ୍ରାର୍ଥୀ କରାଇଥିଲା। ମାତ୍ର ଦଳ ଆକାଶଙ୍କ ଉପରୁ ଆସ୍ଥା ହରାଇ ନ ଥିଲା। ଦଳୀୟସ୍ତରରେ ତାଙ୍କୁ ଥଇଥାନ ବି କରାଯାଇଛି। ମୋ କଲେଜ ଅଧ୍ୟକ୍ଷ ପଦରେ ରହି ସେ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସୁଦୃଷ୍ଟିରେ ଥିବା ଆଲୋଚନା ହେଉଛି। ତେଣୁ ଦଳ ତାଙ୍କୁ ପୁଣି ପ୍ରାର୍ଥୀ କରିବ ବୋଲି ସେ ଆଶାପୋଷଣ କରୁଛନ୍ତି। ଏଥିସହ ସାଧାରଣ ନିର୍ବାଚନ ପାଖେଇ ଆସିବା ଓ ସମ୍ଭବତଃ ୨୦୨୪ ବଦଳରେ ୨୦୨୩ରେ ନିର୍ବାଚନ ହେବା ସମ୍ଭାବନାକୁ ନେଇ ତାଙ୍କ ଗସ୍ତ ଅଧିକ ଶାଣିତ ହେଉଥିବା ଲକ୍ଷ୍ୟ କରାଯାଉଛି। ଆସନ୍ତା ନିର୍ବାଚନରେ ସେ ଦଳୀୟ ପ୍ରାର୍ଥୀ ହେବା ଆଶା ରଖି ବିଭିନ୍ନ କାର୍ଯ୍ୟକ୍ରମରେ ଯୋଗଦାନ କରୁଛନ୍ତି ବୋଲି ରାଜନୈତିକ ସମୀକ୍ଷକ ମତ ରଖିଛନ୍ତି।
ଏହି ନିର୍ବାଚନମଣ୍ଡଳୀରେ ରସୁଲପୁର ବ୍ଲକ୍ ଅଧୀନ ୯ ପଞ୍ଚାୟତର ଭୋଟ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣରେ ପ୍ରମୁଖ ଭୂମିକା ଗ୍ରହଣ କରିଥାଏ। ଏହାକୁ ଦୃଷ୍ଟିଦେଇ ଆକାଶ ଏଭଳି ଗସ୍ତ କରୁଛନ୍ତି ବୋଲି କେତେଜଣ ମତ ରଖିଛନ୍ତି। ତେବେ ଧାମନଗର ଉପନିର୍ବାଚନରେ ବିଜେଡି ପ୍ରାର୍ଥୀ ହାରିବା ପରେ ନିର୍ବାଚନ ଦାୟିତ୍ୱରେ ଥିବା ଯାଜପୁରର ଜଣେ ନେତାଙ୍କ କ୍ଷମତା ପ୍ରଭାବିତ ହୋଇଛି। ଏହାକୁ ଆକାଶ ସୁଯୋଗ ବୋଲି ମନେ କରୁଥାଇ ପାରନ୍ତି ବୋଲି ଚର୍ଚ୍ଚା ହେଉଛି। ଅଶୋକ ଦାସଙ୍କ ଜନତା ଦଳ ଓ ପରବର୍ତ୍ତୀ ଅବସ୍ଥାରେ ବିଜୁ ଜନତାଦଳ ଏହି ନିର୍ବାଚନମଣ୍ଡଳୀରେ କାହାରିକୁ ଲଗାତର ୨ୟ ଥର ଦଳୀୟ ପ୍ରାର୍ଥୀ କରିବାକୁ ସୁଯୋଗ ଦେଇନାହିଁ। ଏହି ଇତିହାସକୁ ଅବଲୋକନ କଲେ ଆକାଶ ପୁଣିଥରେ କୋରେଇରୁ ଦଳୀୟ ଟିକେଟ ହାତେଇବାକୁ ମନରେ ଆଶା ବାନ୍ଧିଛନ୍ତି। ଆକାଶ କୋରେଇ ରାଜନୀତିରେ ସକ୍ରିୟ ହୋଇ ଉଠିବା ପଛରେ ଦଳୀୟ ସୁପ୍ରିମୋଙ୍କ ସବୁଜ ସଂକେତ ରହିଛି ବୋଲି ତାଙ୍କ ସମର୍ଥକଙ୍କ ମହଲରେ ଆଲୋଚନା ହେଉଛି। ଏ ସମ୍ପର୍କରେ ଆକାଶଙ୍କୁ ପଚାରିବାରେ ସେ କହିଛନ୍ତି, ରସୁଲପୁର ବ୍ଲକ ହେଉଛି ତାଙ୍କ ଜନ୍ମମାଟି। ମାଟି ମା ସେବା କରିବାକୁ ସୁଯୋଗ ମିଳିବା ତାଙ୍କ ପାଇଁ ବଡ଼ ସୌଭାଗ୍ୟ ବୋଲି ସେ ମନେକରନ୍ତି। ଦଳରୁ ଟିକେଟ ଆଶାୟୀ ରହିବା ସ୍ବାଭାବିକ ପ୍ରକ୍ରିୟା। କେବଳ ନିର୍ବାଚନକୁ ଆଖି ଆଗରେ ରଖି ନୁହେଁ। ବିଭିନ୍ନ ସମୟରେ ସାମାଜିକ କାର୍ଯ୍ୟରେ ଯେଉଁମାନେ ନିମନ୍ତ୍ରଣ କରିଛନ୍ତି, ସେ ସେଠାରେ ପହଞ୍ଚତ୍ବାକୁ ଚେଷ୍ଟା କରିଛନ୍ତି। ସେହି ଆଧାରରେ ସେ ଲୋକଙ୍କ ସହ ସମ୍ପର୍କରେ ଅଛନ୍ତି। କରୋନା ସମୟରେ ସେ ଲୋକଙ୍କୁ ଭେଟି ନ ପାରିଲେ ବି ଫୋନ ଯୋଗେ ଭଲମନ୍ଦ ପଚାରି ବୁଝିଛନ୍ତି। ଏଭଳି ଭାବେ ସେ ଲୋକଙ୍କ ସହ ସମ୍ପର୍କରେ ରହି ଆସୁଛନ୍ତି। ତେଣୁ ଲୋକଙ୍କ ସେବା କରିବାକୁ ଦଳ ପୁଣି ସୁଯୋଗ ଦେଲେ ସେ ପ୍ରସ୍ତୁତ ବୋଲି ପ୍ରକାଶ କରିଛନ୍ତି।
