କୋକସରା,୧୦।୧୨(ଡି.ଏନ.ଏ.): ରାଜ୍ୟ ସରକାର ଗରିବ ସୀମା ରେଖା ତଳେ ଥିବା ହିତାଧିକାରୀଙ୍କୁ ଆବାସ ଘର ଯୋଗାଇ ଦେଉଛନ୍ତି। ହେଲେ ପଞ୍ଚାୟତସ୍ତରରେ ପଞ୍ଚାୟତ କର୍ମଚାରୀ, ସରପଞ୍ଚ ଓ ସ୍ଥାନୀୟ ଠିକାଦାରଙ୍କ ମଧୁଚନ୍ଦ୍ରିକା ଯୋଗୁ ହିତାଧିକାରୀଙ୍କ ଆବାସ ଘର ଅର୍ଥ ଲୁଟ କରାଯାଇଛି। ବ୍ଲକର ୨୨ ପଞ୍ଚାୟତରେ ୧୦୩୫ ଆବାସ ଘର ଅସମ୍ପୂର୍ଣ୍ଣ ରହିଥିବା ନେଇ ବ୍ଲକ ସୂତ୍ରରୁ ଜଣାପଡ଼ିଛି। କଳାହାଣ୍ଡି ଜିଲା କୋକସରା ବ୍ଲକ ଲଡୁଗାଁ ପଞ୍ଚାୟତ ସୁନାମାଲ ଗ୍ରାମର ସ୍ବର୍ଗତ ରାମଚନ୍ଦ୍ର ଠାକୁରଙ୍କ ଆବାସ ଘର ୫ ବର୍ଷ ପରେବି ସମ୍ପୂର୍ଣ୍ଣ ହୋଇ ନ ଥିବା ଜଣାପଡ଼ିଛି। ସୁନାମାଲ ଗାଁର ରାମଚନ୍ଦ୍ରଙ୍କୁ ଆବାସ ଘର ୫ ବର୍ଷ ତଳେ ମିଳିଥିଲା। ହେଲେ ଅଦ୍ୟାବଧି ଠିକାଦାର ଘର ଅସମ୍ପୂର୍ଣ୍ଣ କରି ରଖିଛନ୍ତି। ଫଳରେ ଅତି ଦୟନୀୟ ଭାବେ ଜୀବନ କାଟୁଛନ୍ତି ରାମଚନ୍ଦ୍ରଙ୍କ ପରିବାର। ରାମଚନ୍ଦ୍ର ଠାକୁରଙ୍କୁ ଆବାସ ଯୋଜନାରେ ଜୀବନ ଥିବା ସମୟରେ ଘର ମିଳିଥିଲା। ହେଲେ ଆଜି ସେ ଆରପାରିରେ। ଘରେ ଏବେ ବିଧବା ସ୍ତ୍ରୀ ଇନ୍ଦ୍ରା ଠାକୁର, ପୁଅ ବିପିନ ଓ ଝିଅ ଟିକି ରହିଛନ୍ତି। ଘର ପାଇଁ ୩ ପର୍ଯ୍ୟାୟରେ ୧ ଲକ୍ଷ ଟଙ୍କା ଉଠାଣ ହୋଇଥିବା ବ୍ଲକରୁ ମିଳିଥିବା ତଥ୍ୟରୁ ଜଣାପଡିଥିବା ବେଳେ ଘର ଏବେ ସମ୍ପୂର୍ଣ୍ଣ ହୋଇନାହିଁ। ବାରମ୍ବାର ସରପଞ୍ଚ, ପିଓଇ ଓ ଠିକାଦାରଙ୍କୁ ଅଭିଯୋଗ କରିଛନ୍ତି ମୃତ ହିତାଧିକାରୀଙ୍କ ବିଧବା ସ୍ତ୍ରୀ। ହେଲେ ଆଜି ପର୍ଯ୍ୟନ୍ତ କୌଣସି ସୁଫଳ ମିଳିନାହିଁ। ନିରାଶ ହୋଇ ଏବେ ଭାଗ୍ୟକୁ ଆଦରି ରହିଛନ୍ତି। ଆବାସ ଘର ଅସମ୍ପୂର୍ଣ୍ଣ ସମ୍ପର୍କରେ ବିଡିଓ ଉତ୍ତମ କୁମାର ବାଗଙ୍କ ପ୍ରତିକ୍ରିୟା ନେବାରୁ ଆବାସ ଘର ହିତାଧିକାରୀଙ୍କୁ ଦିଆଯାଇଛି, ସେମାନେ କାହିଁକି ଠିକାଦାରଙ୍କୁ ଘର ନିର୍ମାଣ କରାଉଛନ୍ତି। ଆମ ପାଖରେ କୌଣସି ଅଭିଯୋଗ ନାହିଁ। ଠିକାଦାରଙ୍କ ନାମରେ ଥାନାରେ ଅଭିଯୋଗ କରନ୍ତୁ ବୋଲି କହିବା ସହ ବ୍ଲକରେ ୧୦୩୫ ଆବାସ ଘର ଅସମ୍ପୂର୍ଣ୍ଣ ରହିଛି ବୋଲି ମଧ୍ୟ ସୂଚନା ଦେଇଛନ୍ତି। ହେଲେ ନିରୀହ ହିତାଧିକାରୀ ଏବେ କାହା ପାଖରେ ଅଭିଯୋଗ କରିବେ ନା ଭାଗ୍ୟକୁ ଆଦରି ଚୁପ ରହିବେ ନା ଖବର ପ୍ରକାଶ ପରେ ଜିଲା ପ୍ରଶାସନ ତଦନ୍ତ କରି କାର୍ଯ୍ୟାନୁଷ୍ଠାନ ନେବ ତାହା ଦେଖିବାକୁ ବାକି ରହିଲା।
