ମାର୍ଶାଘାଇ,୮ା୯(ଶୁଭେନ୍ଦୁ ପ୍ରସାଦ ଚୌଧୁରୀ ): ଆଷାଢ଼, ଶ୍ରାବଣ ଯାଇ ଭାଦ୍ରବ ହେଲାଣି କାଁ ଭାଁ କେମିତି କେତେବେଳେ ବର୍ଷା ହେଊଛି ଯେ ତାହା କାମକୁ ନୁହେଁ। କିଭଳି ଚାଷ କାର୍ଯ୍ୟହେବ, ବର୍ଷକର ଦାନା ଘରକୁ ଆସିବ ସେ ଚିନ୍ତାରେ ଚାଷୀ ପଡିଛନ୍ତି। ମାର୍ଶାଘାଇ ବ୍ଲକର ଜଳସେଚିତ ଜମିରେ ଧୀର ମନ୍ଥର ଗତିରେ ଚାଷ କାର୍ଯ୍ୟ ଚାଲିଥିବା ବେଳେ ଅଣଜଳସେଚିତ ଜମି ଏବେ ଚାରଣ ଭୂମି ପାଲଟିଛି। ଯେଉଁଟି ଖାଲୁଆ ଜାଗାରେ ଟିକେ ପାଣି ରହିଛି ସେଠାରେ ମୋଟର ପକାଯାଇ କିଛି ଜମିରେ ରୁଆ ବେଉଷଣ ହେଊଛି।
ଚଳିତବର୍ଷ ନିଅଣ୍ଟିଆ ବର୍ଷା ସାଙ୍ଗକୁ ବ୍ରାଞ୍ଚ କେନାଲରେ ଆବଶ୍ୟକ ପରିମାଣର ପାଣି ନ ଆସିବାରୁ କେନାଲ ପାଖ ଚାଷବାସ ଧୀମେଇ ଯାଇଛି। କୃଷି ବିଭାଗ ସୂଚନା ଅନୁଯାୟୀ, ବ୍ଲକର ୨୪ ପଞ୍ଚାୟତରେ ମୋଟ ୧୧,୪୧୬ ହେକ୍ଟର ଚାଷ ଜମି ରହିଛି। ସେଥିରୁ ୮,୭୦୦ ହେକ୍ଟର ଜମିରେ ଧାନ ଚାଷ ହେଉଥିବା ବେଳେ ଅବଶିଷ୍ଟ ଜମିରେ ପନିପରିବା, ଚିନା ବାଦାମ, ଆଖୁ, ନଳିତା ଆଦି ଚାଷ କରାଯାଏ। ବ୍ଲକର ମୋଟ ୭,୯୬୧ ହେକ୍ଟର ଜଳସେଚିତ ଜମି ରହିଛି। ବ୍ଲକର ଅନ୍ତେଇ, ବଟିରା, ମଙ୍ଗରାଜପୁର, ବେରୁହଁା, ତାଳସଙ୍ଗା, ଗରଜଙ୍ଗା, ପରକୁଳା, ରାଘବପୁର, ଆଖୁଆ ଦକ୍ଷିଣୀ, ଜଳପୋକ, ଆଈତିପୁର ଆଦି ପଞ୍ଚାୟତ ଅଣଜଳସେଚିତ ହୋଇଥିବା ବେଳେ ନିଅଣ୍ଟିଆ ବର୍ଷା ଯୋଗୁ ରୁଆ ବେଉଷଣ କାର୍ଯ୍ୟ ବିଳମ୍ବିତ ହୋଇଛି। ନିକଟରେ ବଛରାଉ ପଞ୍ଚାୟତରେ କେନାଲ ରେ ପାଣି ଆସୁ ନ ଥିବା ନେଇ ରମାନାଥ ସାମନ୍ତରାୟଙ୍କ ନେତୃତ୍ୱରେ ଶତାଧିକ ଚାଷୀ ରାସ୍ତାରୋକୋ କରିଥିଲେ। ଯେଉଁଠି ଏ ସମୟରେ ଚାଷଜମି ଶସ୍ୟ ଶ୍ୟାମଳା ହେବା କଥା ତାହା ଏବେ ଚାରଣ ଭୂମି ପାଲଟିଛି। ମାର୍ଶାଘାଇ ବ୍ଲକ ଅଞ୍ଚଳ ଏକ କୃଷି ପ୍ରବଣ ଅଞ୍ଚଳରେ ଚାଷ ଏକ ମାତ୍ର ପନ୍ଥା ହୋଇଥିବା ବେଳେ ନିଅଣ୍ଟିଆ ବର୍ଷା ଚାଷୀର ବର୍ଷକର ଆହାର ଛଡାଇ ନେବାର ଆଶଙ୍କା ସୃଷ୍ଟି ହୋଇଛି।
